موڭعوليا پرەزيدەنتى وتستاۆكاعا كەتەتىنىن مالىمدەدى

استانا. KAZINFORM - موڭعوليا پرەزيدەنتى ۋحنااگين حۋرەلسۋح بۇگىن مالىمدەمە جاساپ، مەملەكەت باسشىسى قىزمەتىنەن كەتۋگە جانە ءوزىنىڭ ابىرويلى ەسىمىن قالپىنا كەلتىرۋگە نيەتتى ەكەنىن جەتكىزدى، دەپ حابارلايدى Montsame اگەنتتىگى.

Президент Монголии объявил об отставке
Фото: Монцамэ

ونىڭ ايتۋىنشا، سوڭعى ءبىر ايدا ءوزىن قىلمىستىق توپتاردىڭ وكىلى دەپ اتاعان ادامدار ونىڭ اتى مەن مارتەبەسىنە بىرنەشە رەت نۇقسان كەلتىرۋگە تىرىسقان. مۇنداي ارەكەتتەر پرەزيدەنتتىڭ بەدەلىنە عانا ەمەس، موڭعوليانىڭ حالىقارالىق يميدجىنە دە زيان كەلتىرەدى.

- موڭعوليا پرەزيدەنتىنىڭ ار-نامىسى مەن قادىر-قاسيەتىنە قول سۇعۋ -بۇكىل موڭعول حالقىنىڭ ابىرويىنا، سونداي-اق ەلدىڭ حالىقارالىق بايلانىستارى مەن ىنتىماقتاستىعىنا نۇقسان كەلتىرۋ. پرەزيدەنتتىڭ بەدەلى مەملەكەتتىڭ حالىقارالىق يميدجىمەن تىكەلەي بايلانىستى، - دەدى حۋرەلسۋح.

ول وزىنە اسا اۋىر قىلمىستارعا قاتىسى بار دەگەن ايىپ تاعىلىپ جاتقانىن ايتىپ، مۇنداي مالىمدەمەلەردىڭ شىندىققا جاناسپايتىنىن جەتكىزدى. سونداي-اق پرەزيدەنت لاۋازىمىنا بايلانىستى ينتەرنەتتە جاريالانعان ءاربىر اقپاراتقا جاۋاپ بەرە المايتىنىن، سوندىقتان ءوز ۇستانىمىن رەسمي تۇردە ءبىلدىرۋدى ءجون كورگەنىن ايتتى.

ر ب ك دەرەگىنشە، بۇل ايىپتاۋلار تاۆان-تولگوي - گاشۋۋنسۋحايت تەمىرجولىنىڭ قۇرىلىسىنا قاتىستى قۇپيا تەندەر كەزىندە ءبىرقاتار ساياساتكەردىڭ جالپى سوماسى 110 ميلليون دوللار پارا الدى دەگەن كۇدىككە بايلانىستى.

ۋحنااگين حۋرەلسۋحتىڭ ايتۋىنشا، كەشە موڭعوليا دەموكراتيالىق پارتياسىنىڭ پارلامەنتتىك فراكسياسى وتىرىس وتكىزىپ، پرەزيدەنتتى قىزمەتىنەن كەتىپ، شىندىقتىڭ انىقتالۋىنا جول اشۋعا شاقىرعان. ول بۇل تالاپپەن كەلىسەتىنىن مالىمدەدى.

- مەنىڭ اتىمدى قارالاعان ادامداردى ءتيىستى ورگاندارعا تاپسىرىپ، ءوز بەدەلىمدى قالپىنا كەلتىرۋگە كۇش سالامىن، - دەدى ول.

بۇعان قوسا ۋحنااگين حۋرەلسۋح مەملەكەت باسشىسى قىزمەتىن اتقارعان كەزەڭدە مەملەكەتتىك ساياساتتا قاتەلىككە جول بەرمەگەنىن، ەشقاشان وتىرىك ايتپاعانىن، مەملەكەت قارجىسىن جىمقىرماعانىن جانە حالىقتى الداماعانىن اتاپ ءوتتى.

ونىڭ ايتۋىنشا، ول ءاردايىم انتىنا ادال بولىپ، ەل يگىلىگى ءۇشىن ەڭبەك ەتكەن. بۇعان دالەل رەتىندە «ەردەنەت»، «مونگولروستسۆەتمەت» كاسىپورىندارىن، باگانۋۋر جانە بور-ءوندور شاحتالارىن، سالحيت، حارماگتاي جانە نوەن ۋۋل كەن ورىندارىن مەملەكەت مەنشىگىنە قايتارعانىن اتادى. وسىلايشا، ۇلتتىق بايلىق قورىن قۇرۋعا نەگىز قالانعان.