وبلىسىمىزدا قاتەردىڭ بەتى قايتقان جوق - اسحات شاحاروۆ
اقتوبە. KAZINFORM - اقتوبەدە 792 ءۇيدى سۋ باستى، 8978 ادام قاۋىپسىز جەرگە كوشىرىلدى. وبلىسىمىزدا قاتەردىڭ بەتى قايتقان جوق. بۇل تۋرالى اسحات شاحاروۆ الەۋمەتتىك جەلىدەگى پاراقشاسىندا حابارلادى.
اقتوبە وبلىسىنداعى سۋ تاسقىنى وتكەن اپتادا باستالدى. الدىمەن اقتوبە قالاسى مەن بايعانين، تەمىر اۋداندارىندا قاۋىپ كۇشەيىپ، جولدى سۋ باستى، ۇيگە سۋ كىردى. كەيىن قوبدا، ويىل، ايتەكە ءبي، مۇعالجار اۋداندارىندا سۋ دەڭگەيى كوتەرىلىپ، توتەنشە جاعداي جاريالاندى.
- وڭىرىمىزگە تونگەن اپات بىرنەشە كۇننەن بەرى ابىگەرگە سالىپ جاتىر. تاسقىنعا توسقاۋىل بولۋ ءۇشىن جەكە قۇرامنان 3140 ادام، 664 تەحنيكا، جالپى بارلىق كۇش جۇمىلدىرىلدى. وبلىسىمىزدا قاتەردىڭ بەتى قايتقان جوق. دەمەك، بوساڭسۋعا ءالى ەرتە دەگەن ءسوز. قولدا بار دەرەككە سۇيەنسەك، وڭىردە 792 ءۇيدى سۋ باستى. 8978 ادام قاۋىپسىز جەرگە كوشىرىلدى. وبلىستىڭ 5 اۋدانىندا، قوبدا، مۇعالجار، تەمىر، ايتەكە ءبي، ويىل جانە اقتوبە قالاسىندا جەرگىلىكتى اۋقىمداعى تابيعي سيپاتتاعى توتەنشە جاعداي جاريالاندى. قاۋىپتى ايماقتاردا سۋ سورۋ، تازالاۋ، توقتاتۋ جۇمىستارى ۇزدىكسىز جۇرگىزىلە بەرەدى. بۇل كۇرەستە تۇرعىنداردىڭ قوسقان ۇلەسى زور. ۇيىمشىلدىقپەن ىسكە كىرىسكەنىمىز - كۇشىمىزدىڭ بىرلىكتە ەكەندىگىنىڭ دالەلى، - دەدى اقتوبە وبلىسىنىڭ اكىمى اسحات شاحاروۆ.
ونىڭ ايتۋىنشا، قازىرگى كەزدە كوميسسيا قۇرىلىپ، شىعىن مەن كەلتىرىلگەن زالال ەسەپتەلىپ جاتىر.
- جاپا شەككەندەردىڭ شىعىنى تۇگەل دەرلىك وتەلەدى. ءۇي-جايلارىن قالىپقا كەلتىرىپ، باسقا دا قاجەتتىلىكتەرىن تولىق قامتاماسىز ەتەمىز. پرەزيدەنت مۇنى قاتاڭ باقىلاۋعا الدى. وڭىرىمىزگە مەملەكەت باسشىسىنىڭ تاپسىرماسى بويىنشا پرەمەر-مينيستر ولجاس بەكتەنوۆ كەلدى. ايماقتاعى احۋالدى اۋەدەن كورىپ، سۋ قويمالارىنىڭ بۇگىنگى كۇيىمەن تانىستى. احۋالدىق ورتالىققا باردى. رەسپۋبليكالىق شتاب وتىرىسىندا دا حالىققا كومەك ماسەلەسىن جان-جاقتى تالقىلادىق. قىمباتتى جەرلەستەر، ءار وتباسىنىڭ مۇڭ-مۇقتاجىن نازارعا الامىز. سىن ساعاتتا سابىرلىق تانىتقان سىزدەرگە اماندىق تىلەدىم، - دەپ جازدى اسحات شاحاروۆ.
اۆتور
التىناي ساعىندىقوۆا
