نوبەل لاۋرەاتى دجەففري حينتون: ادامزات جاساندى ينتەللەكتىنى باقىلاۋدان شىعارىپ الۋى مۇمكىن
استانا. KAZINFORM - عىلىم سالاسىنداعى نوبەل سىيلىعىنىڭ لاۋرەاتى دجەففري حينتون ادامزاتتىڭ جاساندى ينتەللەكتى تولىق باقىلاۋدان شىعارىپ الماۋ ءۇشىن قاجەتتى قاۋىپسىزدىك شارالارىن قابىلداۋعا ءبىر-اق جىلى قالۋى مۇمكىن ەكەنىن مالىمدەدى.
بۇل تۋرالى انادولى اگەنتتىگى جازدى.
عالىمنىڭ ايتۋىنشا، قاجەتتى شارالار قابىلدانباسا، جاساندى ينتەللەكت ادام باقىلاۋىنان شىعۋى ىقتيمال.
NBC تەلەارناسىنىڭ حابارلاۋىنشا، حينتون ا ق ش سەناتورى، ۆەرمونت شتاتىنىڭ وكىلى بەرني ساندەرستىڭ شاقىرۋىمەن كونگرەسس مۇشەلەرىنە جاساندى ينتەللەكتتىڭ دامۋى جونىندە بايانداما جاساعان.
عالىمنىڭ پىكىرىنشە، ادامزات جاساندى ينتەللەكتىنى تولىق باقىلاۋدان ايىرىلىپ قالماۋ ءۇشىن قاۋىپسىزدىك شارالارىن قابىلداۋدى ءدال قازىر باستاۋى كەرەك. ونىڭ ايتۋىنشا، بۇعان نەبارى ءبىر جىلداي ۋاقىت قالۋى مۇمكىن.
بۇعان دەيىن جاساندى ينتەللەكتتەن الدەقايدا اقىلدى سۋپەرينتەللەكتىنىڭ پايدا بولۋى 30-50 جىلدان كەيىن ورىن الادى دەگەن بولجامدار ايتىلعان.
- كەيىن بۇل بولجامدار 10، ءتىپتى 20 جىلعا دەيىن قىسقاردى. ال قازىر كوپتەگەن ادام مەن زەرتتەۋشى ونىڭ پايدا بولۋىنا بىرنەشە جىل عانا قالعانىن ايتادى. بۇل ءبىر جىلدان كەيىن دە بولۋى مۇمكىن، ءبىراق ودان كوپ ۋاقىتقا سوزىلماۋى ىقتيمال، - دەدى حينتون.
عالىمنىڭ ايتۋىنشا، جاساندى ينتەللەكت قازىردىڭ وزىندە «ودان دا جەتىلدىرىلگەن ج ي جۇيەلەرىن جوبالاي الاتىن» دەڭگەيگە جەتتى.
- بۇل ءوزىن-ءوزى جەتىلدىرۋ دەپ اتالادى. ەگەر ءبىز ەشقانداي شارا قولدانباساق، جاعداي باقىلاۋدان شىعىپ كەتۋى مۇمكىن. ءبىز بۇل پروتسەستى باياۋلاتۋىمىز كەرەك، - دەدى ول.
جاساندى ينتەللەكتى باقىلاۋدا بولۋى ءتيىس
ا ق ش وكىلدەر پالاتاسىنىڭ دەموكراتيالىق پارتيادان سايلانعان مۇشەسى تەد ليۋ دە جاساندى ينتەللەكتىنىڭ دامۋىنا قاتىستى الاڭداۋشىلىق ءبىلدىردى.
- بۇل - عىلىمي فانتاستيكاداعى سەناريگە ۇقسايتىن، اقىلعا سىيمايتىنداي كورىنگەنىمەن، شىندىققا وتە جاقىن تۇرعان جاعداي. ەڭ باستىسى، جاساندى ينتەللەكتىنى ادام باقىلاۋى ءتيىس. كەرىسىنشە بولماۋى كەرەك، - دەدى ول.
ال سەناتور بەرني ساندەرس ادامزاتتىڭ بولاشاعىنا جانە ادامدار باقىلاۋ جاساي المايتىن تەحنولوگيانىڭ پايدا بولۋىنا قاتىستى الاڭداۋشىلىقتىڭ ارتىپ كەلە جاتقانىن ايتتى.
- كونگرەسس مۇشەلەرىنىڭ اراسىندا بۇل ماسەلەنى شۇعىل تۇردە قاراۋ قاجەت دەگەن تۇسىنىك كۇشەيىپ كەلەدى، - دەدى ساندەرس.
ايتا كەتەيىك، بۇعان دەيىن جاساندى ينتەللەكت «ۇرپاعىنا» ادامعا باعىنباۋدى وسيەت ەتە باستاعانىن جازعان ەدىك.
