دونالد ترامپ رەسەي مەن ۋكراينا اراسىندا ءۇش كۇندىك ءبىتىم جاريالادى
استانا. KAZINFORM – ا ق ش پرەزيدەنتى دونالد ترامپ رەسەي مەن ۋكراينا اراسىندا 9، 10 -جانە 11- مامىر كۇندەرى ارەكەت ەتەتىن ءۇش كۇندىك اتىستى توقتاتۋ رەجيمى ەنگىزىلگەنىن مالىمدەدى، دەپ حابارلايدى Kazinform اگەنتتىگى.
امەريكا كوشباسشىسى بۇل ءۇش كۇندىك ءبىتىم قاقتىعىستى اياقتاۋعا باستاما بولۋى مۇمكىن دەگەن ءۇمىت ءبىلدىردى.
- بۇل ءبىتىم بارلىق بەلسەندى اسكەري ارەكەتتى توقتاتۋدى، سونداي-اق ءار تاراپتان 1000 ادامنان تۇراتىن تۇتقىندار الماسۋىن قامتيدى، - دەپ جازدى ترامپ ءوزىنىڭ Truth Social الەۋمەتتىك جەلىسىندەگى پاراقشاسىندا.
اق ءۇي باسشىسى تاراپتاردىڭ كۇن سايىن رەتتەۋگە جاقىنداپ كەلە جاتقانىن دا اتاپ ءوتتى.
- بۇل ءوتىنىش تىكەلەي مەنىڭ تاراپىمنان جاسالدى جانە ونىڭ ۆلاديمير پۋتين مەن ۆلاديمير زەلەنسكي تاراپىنان قولداۋ تاپقانىنا جوعارى ريزاشىلىعىمدى بىلدىرەمىن، - دەپ قوستى ول.
رەسەي ترامپتىڭ ۋكراينامەن ءبىتىمدى 11-مامىرعا دەيىن ۇزارتۋ جانە وسى مەرزىمگە دەيىن كيەۆپەن «مىڭعا مىڭ» فورماتى بويىنشا تۇتقىن الماسۋ تۋرالى باستاماسىن قولداۋعا كەلىستى.
ت ا س س اگەنتتىگىنىڭ حابارلاۋىنشا، ءبىتىمدى ۇزارتۋ مەن تۇتقىندار الماسۋ جونىندەگى كەلىسىمدەر ا ق ش پرەزيدەنتى اكىمشىلىگىمەن جۇرگىزىلگەن تەلەفون كەلىسسوزدەرى بارىسىندا جۇزەگە اسقان.
زەلەنسكي دە ترامپ جاريالاعان ءبىتىم مەن تۇتقىن الماسۋ كەلىسىمىن راستادى.
بۇعان دەيىن تاراپتار ۋاقىتشا اتىستى توقتاتۋ رەجيمى ەنگىزىلگەنىن مالىمدەگەن بولاتىن.
