دونالد ترامپ پەن شي جينپيڭ اق ۇيدە كەزدەستى

شي جينپيڭ قارسى الۋ راسىمىندە سويلەگەن سوزىندە ا ق ش- قا ساپارى ەكى ەل اراسىنداعى دوستىق پەن ىنتىماقتاستىقتى نىعايتۋعا، سونداي-اق ەكى حالىقتىڭ ءال-اۋقاتىن ارتتىرۋعا باعىتتالعانىن ايتتى، دەپ جازادى Xinhua.

ونىڭ ايتۋىنشا، قىتايدىڭ اشىقتىققا دەگەن ۇستانىمى وزگەرمەيدى. ەكى ەلدىڭ مۇددەلەرى ءوزارا تىعىز بايلانىستى جانە ىنتىماقتاستىق ءۇشىن اۋقىمدى مۇمكىندىكتەر بار.

ق ح ر ءتوراعاسى ا ق ش حالقىن ەل تاۋەلسىزدىگىنىڭ 250 جىلدىعىمەن قۇتتىقتادى. ول الداعى بەس جىلدا قىتايدىڭ 100 مىڭ امەريكالىق جاستى ءبىلىم بەرۋ جانە الماسۋ باعدارلامالارىنا قاتىسۋ ءۇشىن ەلگە شاقىراتىنىن مالىمدەدى. سونداي-اق جاقىن ارادا اتلانتا حايۋاناتتار باعىندا ەكى الىپ پاندا پايدا بولاتىنىن ايتتى.

شي جينپيڭ ءوز سوزىندە ءوزى مەن ا ق ش پرەزيدەنتى ەكى ەلدىڭ سىرتقى ساياسات، ساۋدا-ەكونوميكا، قارجى، قۇقىق قورعاۋ، گۋمانيتارلىق جانە باسقا دا سالالارداعى ۆەدومستۆولارى اراسىنداعى بايلانىستى نىعايتۋدى قولدايتىنىن اتاپ ءوتتى.

- قىتاي مەن ا ق ش اراسىنداعى ىنتىماقتاستىق الەمدەگى بارلىق ماسەلەنى شەشە المايدى، الايدا مۇنداي ىنتىماقتاستىقسىز كوپتەگەن پروبلەمانى شەشۋ قيىن، - دەدى ول.

شي جينپيڭ دونالد ترامپپەن بىرگە قىتاي-ا ق ش قارىم-قاتىناستارىنىڭ «ۇلكەن كەمەسىنىڭ» تۇراقتى ءارى ۇزاق مەرزىمدى دامۋىنا باعىت بەرۋگە دايىن ەكەنىن اتاپ ءوتتى.

ءوز كەزەگىندە ا ق ش پرەزيدەنتى دونالد ترامپ شي جينپيڭنىڭ ساپارى بارىسىندا جاساندى ينتەللەكتتىڭ بولاشاعى تالقىلاناتىنىن ايتتى. امەريكالىق كوشباسشىنىڭ ءسوزىن CNN كەلتىردى.

دونالد ترامپ ا ق ش پەن قىتاي اراسىنداعى ساۋدا قاتىناستارىندا جاڭا ىلگەرىلەۋشىلىك بار ەكەنىن ايتىپ، ءوزى مەن شي جينپيڭنىڭ ەكى ەل الدىندا تۇرعان ماسەلەلەردى شەشۋدە ايتارلىقتاي جەتىستىكتەرگە قول جەتكىزگەنىن مالىمدەدى.

ا ق ش پرەزيدەنتى سونداي-اق مامىر ايىندا بەيجىڭگە جاساعان ساپارىن جانە جاڭا ساۋدا پالاتاسىنىڭ قۇرىلعانىن اتاپ ءوتتى. ول جاڭا قۇرىلىمدى مۇلدەم جاڭا مەحانيزم ءارى «كەرەمەت تابىستى» جوبا دەپ اتادى.

- ءبىزدىڭ كوماندالار ساۋدا قاتىناستارىن تەڭگەرىمدى ەتۋ ءۇشىن جۇمىس ىستەپ جاتىر. بۇل امەريكالىق فەرمەرلەر مەن مال وسىرۋشىلەرگە جاڭا نارىقتارعا شىعۋعا مۇمكىندىك بەرۋدى دە قامتيدى، - دەدى ول.

سالتاناتتى راسىمنەن كەيىن شي جينپيڭ مەن دونالد ترامپ شاعىن قۇرامدا كەزدەسۋ وتكىزدى.

بۇعان دەيىن شي جينپيڭ نىڭ ا ق ش- قا 23-25-قىركۇيەك ارالىعىندا ساپارلايتىنى حابارلانعان بولاتىن.