ون جەتى جاستا 100 كىتاپ: استانالىق وقۋشى كىتاپ وقۋدى قالاي ادەتكە اينالدىردى
استانا. KAZINFORM - استانالىق 11-سىنىپ وقۋشىسى رامازان ورال وسى ۋاقىتقا دەيىن 100 كىتاپ وقىعان. 17 جاستاعى جاس ءوسپىرىم كىتاپ وقۋدى ارنايى ماقساتقا اينالدىرماي، ءبىر شىعارمادان ەكىنشىسىنە كوشۋ ارقىلى وسى مەجەگە جەتكەن. بۇل تۋرالى ول Jibek Joly تەلەارناسىنىڭ «بۇگىن. LIVE» باعدارلاماسىندا ايتىپ بەردى.
رامازان ورال - استاناداعى № 101-مەكتەپتىڭ 11-سىنىپ وقۋشىسى. ول كىتاپ وقۋمەن قاتار ولەڭ جازادى. 200 ولەڭدى جاتقا بىلەدى، ءوزى دە 100 گە جۋىق ولەڭ جازعان.
ونىڭ ايتۋىنشا، باستاپقىدا الدىنا 100 كىتاپ وقۋ مىندەتىن قويماعان. كىتاپتى بىرىنەن سوڭ ءبىرىن وقي كەلە، ۋاقىت وتە بۇل ءىس ونىڭ تۇراقتى ادەتىنە اينالعان.
- كىتاپ وقۋدى باستاعاندا «100 كىتاپ وقىپ ءبىتىرۋىم كەرەك» دەپ الدىما ۇلكەن ماقسات قويىپ، ارنايى مەرزىم بەلگىلەگەن جوقپىن. ءبىر كىتاپتى اياقتاپ، ەكىنشىسىنە كوشىپ وتىردىم. ۋاقىت وتە كەلە كىتاپ وقۋ ەرمەككە اينالدى. كەيىن قاراسام، وسىنداي كورسەتكىشكە جەتىپ قالىپپىن، - دەدى رامازان ورال.
كىتاپ وقۋعا كىم ىقپال ەتتى؟
رامازاننىڭ سوزىنشە، ونىڭ كىتاپقا قىزىعۋىنا وتباسى مۇشەلەرى مەن ۇستازدارى ىقپال ەتكەن.
- كىشكەنتاي كەزىمىزدەن الدىمىزعا ۇلكەن ارماندار قويامىز. وسكەندە ۇلكەن تۇلعا بولىپ، جەتىستىككە جەتكىمىز كەلەدى. ءول ۇشىن اۋقىمدى ويلاي ءبىلۋ كەرەك دەپ ويلايمىن. بۇعان اكەم، اتام، اجەم، سىنىپ جەتەكشىلەرىم جانە ومىرىمدەگى باسقا دا ادامدار ءوز سەپتىگىن تيگىزدى. ولاردىڭ بارلىعىنا العىسىمدى بىلدىرگىم كەلەدى، - دەدى ول.
وقۋشى كىتاپتىڭ ادامنىڭ ويلاۋ قابىلەتى مەن سوزدىك قورىن دامىتۋعا كومەكتەسەتىنىن اتاپ ءوتتى.
- كىتاپ وقۋ دۇرىس ويلاۋعا ۇلكەن سەپتىگىن تيگىزەدى. ادامنىڭ ويلاۋ دەڭگەيىن جاقسارتىپ، سوزدىك قورىن دامىتادى. جالپى كىتاپ وقيتىن اداممەن سويلەسۋدىڭ ءوزى قىزىق، - دەدى رامازان.
«كىتاپقۇمار» جوباسىن باستادى
رامازان ءقازىر مەكتەپتە «كىتاپقۇمار» اتتى اۆتورلىق جوباسىن قولعا العان. ونىڭ ماقساتى - كىتاپ وقيتىن وقۋشىلاردى تانىستىرىپ، ولاردىڭ ادەبيەتكە قالاي قىزىققانىن كورسەتۋ.
جوبا اياسىندا وقۋشىلار كىتاپ وقۋعا نە سەبەپ بولعانىن، بۇل ادەتتىڭ قالىپتاسۋىنا كىم ىقپال ەتكەنىن اڭگىمەلەيدى. العاشقى كەيىپكەرلەردىڭ ءبىرى - رامازاننىڭ سىنىپتاسى اينابەك.
- الداعى ۋاقىتتا باسقا سىنىپتاستارىمىزدىڭ كىتاپ وقۋعا قالاي قىزىققانىن، كىتاپقۇمار بولۋىنا كىم نەمەسە نە سەبەپ بولعانىن كورسەتكىمىز كەلەدى. كىتاپ وقۋ بۇگىندە ترەند ەكەنىن كورسەتىپ، كىتاپ وقيتىن ادامداردىڭ سانىن ارتتىرۋ ءۇشىن وسى جوبانى جۇرگىزىپ جاتىرمىز، - دەدى ول.
كۇنىنە 10-15 مينۋتتان كىتاپ وقۋعا بولادى
رامازاننىڭ ايتۋىنشا، كىتاپ وقۋعا كۇن سايىن از ۋاقىت ءبولۋدىڭ ءوزى ناتيجە بەرەدى. بۇعان ول مەكتەپتەگى وقۋشىلاردىڭ تاجىريبەسىنەن كوز جەتكىزگەن.
گەوگرافيا ءپانىنىڭ مۇعالىمى وقۋشىلارىنا ءبىر كىتاپتى بىرگە وقۋدى ۇسىنعان. بالالار كىتاپتى ساتىپ الىپ، كۇن سايىن ساباق نەمەسە ءۇزىلىس كەزىندە 10-15 مينۋتتان وقىعان.
- العاشىندا 10-15 مينۋت از عوي دەپ ويلادىم. كەيىن بالالاردان سۇراسام، كىتاپتى وقىپ اياقتاعاندارىن ايتتى. سوندا تاڭعالدىم. راسىندا، كىشكەنتاي قادامدارمەن ۇلكەن ماقساتتارعا جەتۋگە بولادى، - دەدى رامازان ورال.
بۇعان دەيىن 800 كىتاپ وقىعان استانالىق وقۋشىنىڭ كىتاپقا قالاي قىزىققانى تۋرالى جازعان ەدىك.
