ترامپ vs بايدەن: تارتىس شارىقتاۋ شەگىنە تايادى

بۇل ۇيىمنىڭ سوڭعى جىلدارداعى ۇستانىمى سالىقتى ازايتۋ، قارۋدى ۇستاۋ قۇقىعىن قولداۋ جانە كوشى- قونعا قاتىستى قاتاڭ شەكتەۋلەر ەنگىزۋ. شالعاي وڭىرلەردە قولداۋشىلارى كوپ. رەسپۋبليكالىق ەكس- پرەزيدەنتتەردىڭ قاتارىندا رونالد رەيگان مەن دجوردج بۋش بار.

ەكىنشى ۇمىتكەر دجو بايدەن. باراك وباما ەل باسشىسى بولعان كەزدە 8 جىل بويى ۆيتسە- پرەزيدەنت قىزمەتىن اتقارعان. ساياساتتاعى تاجىريبەسى 50 جىلعا جۋىقتايدى. دەموكراتتار پارتياسىنىڭ وكىلى. بۇل ساياسي ۇيىم ازاماتتىق قۇقىق، كوشى- قون جانە كليماتتىڭ وزگەرۋى سەكىلدى ماسەلەلەرگە دەگەن ليبەرالدىق كوزقاراسىمەن ەرەكشەلەنەدى. دەموكراتيالىق پارتيانىڭ ەكس- پرەزيدەنتتەرى قاتارىندا دجون كەننەدي، بيلل كلينتون مەن باراك وباما بار.

نەگىزى بيىل سىنعا ءتۇسىپ جاتقان قوس ۇمىتكەردىڭ دە جاسى 70 تەن اسقان. ءبىر قىزىعى، ەگەر جەڭىسكە دجو بايدەن جەتسە، ول ءبىرىنشى مەرزىمدەگى جاسى ەڭ ۇلكەن پرەزيدەنت بولايىن دەپ تۇر.

دونالد ترامپ، ا ق ش پرەزيدەنتى:

- مەنىڭ قارسىلاسىم پاندەميا كەسىرىنەن امەريكاندىقتاردى قيىن كەزەڭ كۇتىپ تۇرعانىن ايتادى. ونىڭ بۇعان دەيىنگى پىكىرتالاستاعى سوزدەرىن ەستىگەندەر بار ما ءوزى؟ بايدەن وسىنداي كوڭىل كونشىتپەيتىن بولجامدار ايتتى. ونى ۇناتاتىندار بار دەپ ويلامايمىن.

دجو بايدەن، ا ق ش پرەزيدەنتتىگىنەن ۇمىتكەر:

- ءبىز جۇيەلى ناسىلشىلدىكپەن كۇرەسەمىز. قارا ءناسىلدى امەريكاندىقتار ءۇشىن تەڭ ەكونوميكالىق مۇمكىندىكتەر بەرەمىز. بۇل جاي عانا ءسوز ەمەس. راس ايتامىن. ءبىز وسى باعىتقا بەت بۇرامىز. ءيا، ءبىز شىندىقتى تاڭدايمىز. ترامپ سەكىلدى وتىرىك ايتپايمىز.

شتاتتاردىڭ كوبىندە مەرزىمىنەن بۇرىن داۋىس بەرۋ كەزىندە سايلاۋشىلاردىڭ جوعارى بەلسەندىلىگى بايقالدى. ءسويتىپ، وسى كۇنگە دەيىن 90 ميلليوننان اسا امەريكاندىق ءوز تاڭداۋىن جاساپ قويعان. بۇل سايلاۋشىلادىڭ شامامەن جارتىسى. ولاردىڭ 60 ميلليونعا جۋىعى پوشتا ارقىلى داۋىس بەرگەن. بيىل پاندەمياعا بايلانىستى ساياساتكەرلەر بولىمشەلەرگە كەلمەستەن پوشتالىق بيۋللەتەندەردى كەڭىنەن قولدانۋعا شاقىرىپ وتىر. مۇنى دەموكراتتار دا قولدايدى. الايدا رەسپۋبليكاشىلدار، سونىڭ ىشىندە دونالد ترامپ بۇعان قارسى. ونىڭ ايتۋىنشا، مۇنداي ءادىس ارقىلى داۋىس بەرۋ كەزىندە ناتيجەلەر بۇرمالانۋى مۇمكىن.

ساراپشىلار پوشتا ارقىلى ءوز تاڭداۋىن جاساعاندار سانىنىڭ كوپتىگىنە بايلانىستى بيىل داۋىس بەرۋ ناتيجەلەرىن ساناۋ ادەتتەگىدەن ۇزاققا سوزىلۋى مۇمكىن ەكەنىن بىردەن ەسكەرتتى. ساۋالناماعا كەلسەك، نيۋ يورك تايمستىڭ اقپاراتى بويىنشا دجو بايدەن دونالد ترامپتان ايتارلىقتاي الدا كەلەدى. ول 52 پروتسەنت داۋىسقا يە، ترامپتىڭ ۇلەسى 41 پروتسەنت شاماسىندا. ونىڭ ۇستىنە دەموكراتيالىق پارتيانىڭ ۇمىتكەرى پەنسيلۆانيا، اريزونا، فلوريدا جانە ۋيسكونسين سىندى ءتورت نەگىزگى جانە ەڭ شەشۋشى شتاتتاردا كوش باستاپ كەلەدى.

بليتس:

- بيىل دونالد ترامپ ءۇشىن داۋىس بەرەمىن. ونىڭ جەكە ءوزىن ەمەس، ۇستانعان ساياساتىن قولدايمىن. ول ەلىمىزدىڭ العا جىلجۋى ءۇشىن كوپ ەڭبەك ەتتى.

تۇرعىن:

- سوڭعى 4 -جىلدا دونالد ترامپ كوپ جالعان اقپارات تاراتىپ، كەلەڭسىزدىكتەرگە جول بەردى. ەندى بيلىك باسىنا دجو بايدەن كەلسە، ءبارى وزگەرەدى دەپ ويلايمىن. ول تاجىريبەسى مول ساياساتكەر. بايدەن ءۇشىن داۋىس بەرەمىن.

جالپى ساياسي دودا الدىنداعى سوڭعى جەكسەنبى كۇنى دونالدد ترامپ 5 شتاتتا 5 جيىن وتكىزىپ ۇلگەرىپ، جاقتاستارىنىڭ الدىندا ءسوز سويلەگەن. سوڭعى كەزدە اق ءۇي باسشىسى مۇنداي كەزدەسۋلەردى كوبەيتكەن. دجو بايدەن بولسا، جيىنداردان گورى جارناما جاعىنا كوپ كوڭىل بولگەن سىڭايلى. ءسويتىپ، ا ق ش تەلەارنالارىندا دەموكراتتاردىڭ جارنامالىق روليكتەرى ترامپپەن سالىستىرعاندا ءۇش ەسەگە اسىپ كەتكەن.

كوپتىڭ كوكەيىندەگى سۇراق: كىم پرەزيدەنت اتانادى؟

الەمدەگى بۋكمەكەرلىك كەڭسەلەردىڭ كوبى قازىرگى اق ءۇي باسشىسى جەڭىسكە جەتە المايدى دەپ بولجاپ وتىر. نەگىزى ترامپ مىرزا جازدىڭ باسىنا دەيىن كوش باستاپ كەلگەن. الايدا ەلدە ەپيدەميولوگيالىق احۋال ناشاراپ، ناسىلشىلدىككە قاتىستى جاپپاي ەرەۋىلدەردىڭ بەلەڭ الۋى ونىڭ بەدەلىنە نۇقسان كەلتىرمەي قويمادى.

ۋيليام حيلل، Betfred بۋكمەكەرلىك كەڭسەسىنىڭ وكىلى:

- شىنى كەرەك، ۇمىتكەرلەردىڭ تارتىسى تەاتر قويىلىمىنا ۇقساپ كەتتى. بۇل ماسەلە ءتىپتى ساياساتتان حابارى جوق ادامداردىڭ وزىنە قىزىق بولىپ تۇر. انگليا كۋبوگى سەكىلدى سپورتتىق شارالاردان گورى ساياسي دودانىڭ وسىنشاما قىزىق بولارىن كىم بىلگەن؟

ساۋالناما ناتيجەلەرى دە، بۋكمەكەرلىك كەڭسە وكىلدەرى دە دجو بايدەنننىڭ جەڭىسىن بولجاپ وتىر. الايدا بۇعان تورەشى - ەرتەڭگى كۇن. ءبارى دە وزگەرىپ شىعا كەلۋى مۇمكىن. ساراپشىلار 2016 -جىلعى سايلاۋدى مىسالعا كەلتىرەدى. ول كەزدە الەۋمەتتانۋشىلاردىڭ بولجامى بويىنشا حيللاري كلينتون 3 ميلليون داۋىسقا وزىپ تۇرسا دا، جەڭىسكە دونالد ترامپ جەتكەن. ويتكەنى بۇل ماسەلەدە سايلاۋشىلار القاسىنىڭ ماڭىزى زور. سوندىقتان ءبارىن ۋاقىت كورسەتەدى. ال ۆاشينگتونداعى كاسىپكەرلەر ساياسي دودا ناتيجەلەرىن كۇتپەستەن دايىندىق قامىنا كىرىسىپ كەتكەن. قوناق ءۇيى، بانك، دۇكەندەر مەن مەيرامحانا يەلەرى ءوز نىساندارىن سىرتىنا اعاش قاعىپ، بەكىتىپ تاستاعان. ياعني بۇلىك شىقسا، مۇلىك بۇلىنبەسىن دەپ دايىندالىپ وتىر. ال فەدەرالدىق عيماراتتاردىڭ الدىنا كۇشتىك قۇرىلىم وكىلدەرىنىڭ قوسىمشا كومەك جاساقتارى كەلگەن.

www.24.kz