تەننيس: بۇگىن نيۋ-يوركتا US Open تۋرنيرى باستالادى
30- تامىز - 12- قىركۇيەك ارالىعىندا وتەتىن «ۇلكەن دۋلىعا» جارىسىندا قازاقستاننان جەكەلەي سىندا التى تەننيسشى باق سىنايدى. ەرلەر اراسىندا قازاقستاننىڭ ءبىرىنشى، الەمنىڭ 37-راكەتكاسى الەكساندر بۋبليك العاشقى اينالىمدا دۇنيەجۇزىلىك رەيتينگتە 134-ورىندا تۇرعان گەرمانيالىق ياننيك حانفمانمەن كەزدەسەدى.
رەيتينگتە 129-ورىنداعى ميحايل كۋكۋشكين الەمنىڭ 74-راكەتكاسى، يسپانيالىق پابلو اندۋحارمەن كورتقا شىعادى. ايەلدەر اراسىندا قازاقستاننىڭ ءبىرىنشى، الەمنىڭ 20-راكەتكاسى ەلەنا رىباكينا رەيتينگتە 90-ساتىداعى بەلارۋس وكىلى الەكساندرا ساسنوۆيچپەن شەبەرلىك بايقاسادى.
الەمنىڭ 33-راكەتكاسى يۋليا پۋتينتسيەۆانىڭ قارسىلاسى - رەيتينگتە 70-ورىنداعى ەستونيالىق كايا كانەپي. رەيتينگتە 110-ساتىدا تۇرعان زارينا دياستىڭ جولى الەمنىڭ 75-راكەتكاسى، امەريكالىق اماندا انيسيموۆامەن توقايلاسپاق.
قازاقستان ايەلدەر قۇراماسىنىڭ كاپيتانى، رەيتينگتە 452-ورىنداعى ياروسلاۆا شۆەدوۆا الەمنىڭ 99-راكەتكاسى، يتاليالىق ياسمين پاولينيدىڭ شاماسىن بايقاپ كورەدى.
ا ق ش اشىق چەمپيوناتىن ۇيىمداستىرۋشىلار بيىل ايتۋلى دودانى كورەرمەندەرمەن وتكىزگەلى وتىر. وتكەن جىلى US Open پاندەمياعا بايلانىستى كورەرمەندەرسىز ءوتىپ، ەرلەر اراسىندا اۋستريالىق دومينيك تيم، ايەلدەردەن جاپونيالىق ناومي وساكا چەمپيون اتانعان بولاتىن.
ەسكە سالا كەتەيىك، بۇدان بۇرىن قازاقستاندىق جاس تەننيسشىلەردىڭ بىشكەكتە وتكەن تۋرنيردە چەمپيون اتانعانىن جازعان بولاتىنبىز.
