تەڭىزدەن شولمەككە سالىنعان حات تاۋىپ العان يتاليا تۇرعىنى ونى جازعان بالانى ىزدەپ تاپتى
استانا. KAZINFORM - بوتەلكەدەگى جولداۋ... بۇل ەرتەگى نەمەسە ءاننىڭ اتاۋى سياقتى ەستىلەدى، ءبىراق يتاليانىڭ وڭتۇستىگىندەگى نەاپول پروۆينتسياسىنا قاراستى باكولي قالاسىنىڭ تۇرعىنى داريو گراندە ءبىر كۇنى جاعاجايدا سەرۋەندەپ جۇرگەندە ىشىنە حات سالىنعان بوتەلكە تاپتى، دەپ جازدى euronews.
«تەڭىزبەن ەرەكشە قارىم-قاتىناسىم بار، ول مەنىمەن سويلەسىپ، جاۋاپ بەرەتىن دوسىم سياقتى. بۇل قارىم-قاتىناس مىنە، 38 جاسىمدا دا جالعاسىپ جاتىر. بۇگىندە مەن تەڭىزدى ەڭ جاقىن دوسىم سانايمىن»، - دەيدى باكولي تۇرعىنى داريو گراندە.
تەڭىز داريوعا يسپانياداعى بالەار ارالدارىنان كۇتپەگەن جولداۋ جىبەردى. حات يەسى - 11 جاسار بالا ءوزى جانە ءحوببيى جايىندا جازعان.
بالەار ارالدارىنان تەڭىزگە لاقتىرىلعان بوتەلكە شامامەن 2000 تەڭىز ءميلىن اسىپ، 4 ايدان كەيىن وسى جاعاجايعا شىقتى. ينتەرنەت پەن الەۋمەتتىك جەلى ارقىلى جىلدام جانە ۋاقىتشا بايلانىس زامانىندا بوتەلكەدەگى حات ەرەكشە اسەر سىيلايتىنى ءسوزسىز.
تاعدىردىڭ جازۋىمەن ۇزاق تا قاۋىپتى ساپاردان كەيىن ىشىنە حات سالىنعان بوتەلكە ونىڭ مازمۇنىن باعالاي بىلگەن ادامنىڭ قولىنا ءتۇستى.
«مەن جاۋاپتى تەڭىزدەن ءجيى ىزدەيمىن. تەڭىز بالانىڭ حاتى ارقىلى ماعان جاۋاپ بەرگەندەي بولدى. 11 جاسار بالا جازعان حات مەنى قاتتى تەبىرەنتتى»، - دەيدى داريو.
تابىلعان بوتەلكەنىڭ وقيعاسى يسپان تەلەارناسىندا كورسەتىلىپ، گازەتتە جازىلدى. داريو بالانىڭ اتا-اناسىمەن بايلانىسقا شىقتى.
«ونىڭ اكەسى ماعان العىس ايتىپ قانا قويماي، بالاسىمەن قاراپايىم پوشتا ارقىلى بايلانىستا بولۋدىڭ ماڭىزىن اتاپ ءوتتى. مەن ونىڭ ءوتىنىشىن قاتتى قۇرمەتتەيمىن جانە بۇكىل وقيعانىڭ ءمانى ءدال وسىندا جاتىر دەپ ويلايمىن»، - دەيدى داريو.
الەۋمەتتىك جەلىلەردەگى ۆيرتۋالدى دوستاردان ايىرماشىلىعى، بوتەلكەگە سالىنعان حاتتان باستالعان دوستىق جالعاسۋعا ءتيىس.
«جاقىن ارادا مالوركاعا بارىپ، ونىمەن كەزدەسىپ، قولىن قىسىپ، وعان ءوز ءومىرىم جانە تۋعان جەرىم تۋرالى ايتىپ بەرگىم كەلەدى»، - دەپ جوسپارىن ءبولىستى د. گراندە.
