تەڭىز كەن ورنىن يگەرۋگە نەلىكتەن شەتەلدىكتەر تارتىلدى - ساراپشى سەبەبىن ءتۇسىندىردى

ونىڭ اتاپ وتۋىنشە، 1990-جىلدارى قازاقستاننىڭ مۇناي كەن ورىندارىن ءوز كۇشىمەن يگەرۋگە قاجەتتى تەحنولوگيالارى بولماعان. ءتىپتى رەسەيدىڭ وزىندە دە مۇنداي كۇردەلى كەن ورىندارىن يگەرۋ مۇمكىندىگى شەكتەۋلى ەدى.

- مۇناي - ءبىزدىڭ باستى بايلىعىمىز. الايدا سول كەزدە، وكىنىشكە قاراي، ونى ءوزىمىز يگەرە المادىق، ويتكەنى قاجەتتى تەحنولوگيالار بولمادى. تەڭىز كەن ورنىنداعى بارلاۋ جۇمىستارى كەزىندە 37-ۇڭعىما ءبىر جىل بويى جانىپ تۇردى. كەڭەس وداعى بۇل ءورتتى سوندىرە المادى. اقىرى كانادادان كەلگەن كومپانيالار ءبىر جىلدان كەيىن عانا ءورتتى ءسوندىردى. سوندىقتان شەتەلدىك ينۆەستورلار قاجەت بولدى،-دەدى ول.

سپيكەردىڭ پىكىرىنشە، شەتەلدىك ينۆەستيتسيا تەك تەڭىز كەن ورنى ءۇشىن عانا ەمەس، قاراشىعاناق سياقتى ءىرى جوبالاردى يگەرۋ ءۇشىن دە ماڭىزدى بولدى.

ونىڭ سوزىنشە، تەڭىز جوباسىنان تۇسەتىن تازا پايدانىڭ شامامەن 60-65 پايىزى مەملەكەتكە تىكەلەي تۇسەدى. سونىمەن قاتار «قازمۇنايگاز» ۇلتتىق كومپانياسىنىڭ جوباعا 20 پايىزدىق ۇلەسى بار.

دەگەنمەن سپيكەر ۇلتتىق كومپانيانىڭ ۇلەسىنەن تۇسەتىن ديۆيدەندتەر مەن مەملەكەتكە تىكەلەي تۇسەتىن كىرىستەردى اجىراتا قاراۋ قاجەتتىگىن اتاپ ءوتتى. ويتكەنى ۇلتتىق كومپانيا ديۆيدەندتەردى باسقا جوبالارىن دامىتۋعا دا باعىتتاي الادى.

- مەملەكەت ءۇشىن ەڭ ماڭىزدىسى - تابيعي رەنتادان تۇسەتىن سالىقتار. مىسالى، تەڭىز جوباسىندا تازا پايدانىڭ 60-65 پايىزىنا دەيىن، ال قاراشىعاناق جوباسىندا 70 پايىزىنا دەيىن مەملەكەتكە تيەسىلى،-دەدى ول.

بۇدان بولەك، سپيكەردىڭ ايتۋىنشا، مۇناي-گاز كومپانيالارى تابيعي گاز، كۇكىرت، پروپان جانە بۋتان سەكىلدى ونىمدەردى ىشكى نارىققا ەكسپورتتىق باعادان تومەن باعامەن جەتكىزەدى.

ماسەلەن، ونىڭ كەلتىرگەن دەرەگىنە سايكەس، پروپان-بۋتاننىڭ ەكسپورتتىق باعاسى تونناسىنا 500 دوللار شاماسىندا بولسا، تەڭىزشيەۆرويل ىشكى نارىققا بۇل ءونىمدى شامامەن 180 دوللاردان ساتادى.