تىستەرگە ميللياردتار كەتتى: زەينەتاقى ەسەبىنەن ەمدەلۋگە رەسمي شەكتەۋ قويىلدى

استانا. KAZINFORM - ءتىس ەمدەۋگە زەينەتاقىدان اقشا الۋ ءجيى تەرىس پايدالانىلعاندىقتان، دەنساۋلىق ساقتاۋ مينيسترلىگى بۇل مۇمكىندىكتى الىپ تاستادى، دەپ حابارلايدى د س م باسپا ءسوز قىزمەتى.

ستوماتولوگيالىق قىزمەتتەرگە اقى تولەۋ تۇرىندەگى زەينەتاقى جيناقتارىن زاڭسىز شىعارۋدىڭ كوپتەگەن فاكتىسىنە بايلانىستى دەنساۋلىق ساقتاۋ مينيسترلىگى 2021 -جىلعى 15-اقپانداعى «ەمدەلۋگە ءبىرجولعى زەينەتاقى تولەمدەرىن پايدالانۋ قاعيدالارىن بەكىتۋ تۋرالى» بۇيرىققا وزگەرىستەر ەنگىزەدى.

- جوبادا پروتەزدەۋ جانە تىستەردى يمپلانتاتتاۋ سياقتى ستوماتولوگيالىق قىزمەتتەرگە ءبىرجولعى زەينەتاقى تولەمدەرىن پايدالانۋ جونىندەگى نورمانى الىپ تاستاۋ كوزدەلەدى. شەشىم مەديتسينالىق قۇجاتتاردى فالسيفيكاتسيالاۋ جانە زەينەتاقى جيناقتارىن ماقساتسىز پايدالانۋدىڭ كوپتەگەن جاعدايىنا بايلانىستى، - دەلىنگەن قۇجات جوباسىندا.

ستوماتولوگيالىق قىزمەتتەرگە اقى تولەۋگە بەرىلگەن وتىنىمدەردى تالداۋ قورىتىندىسى بويىنشا ازاماتتار قاراجاتىنىڭ ءبىر بولىگى الاياقتىق سحەمالار ارقىلى ءبىرقاتار كلينيكانىڭ پايداسىنا شىعارىلعانىن حابارلاعان بولاتىن.

وسىعان بايلانىستى، بيىلعى جىلدىڭ 15-قىركۇيەگىنەن باستاپ بانك زەينەتاقى قاراجاتىنىڭ ەسەبىنەن مەديتسينالىق كومەكتىڭ وسى ءتۇرىن قارجىلاندىرۋعا وتىنىمدەردى قابىلداۋدى توقتاتىلعانىن ايتا كەتۋ كەرەك.

وتباسى بانكىنىڭ اقپاراتى بويىنشا، 2021 -جىلدان باستاپ 2025 -جىلعى 20-تامىزعا دەيىنگى كەزەڭدە پلاتفورما ارقىلى enpf-otbasy.kz تەك «ستوماتولوگيالىق قىزمەتتەر «ماقساتى بويىنشا 757 ميلليارد تەڭگە سوماسىنا 795424 ترانزاكتسيا جۇرگىزىلدى. تالداۋ كورسەتكەندەي، 222 ميلليارد تەڭگەدەن استام قاراجات توپ-20 ستوماتولوگيالىق كلينيكاعا جىبەرىلدى. نەگىزگى كلينيكالاردىڭ بولىگى قازاقستاننىڭ ءىرى قالالارىندا ورنالاسقان. اتالعان كەزەڭدە وتباسى بانكىنە 29797 ءوتىنىم بەرىلدى، ونىڭ %88,3 ى نەمەسە «ستوماتولوگيالىق قىزمەتتەر» ماقساتى بويىنشا 26312 ءوتىنىم بەرىلگەن. ۇسىنىلعان وزگەرىستەر اشىقتىقتى ارتتىرۋعا جانە دەنساۋلىق ساقتاۋ سالاسىندا قاراجاتتىڭ ماقساتتى قولدانىلۋىن قامتاماسىز ەتۋگە باعىتتالعان.

ايتا كەتەيىك، قازاقستاندا ستوماتولوگيالىق قىزمەتتەرگە اقى تولەۋ ءۇشىن زەينەتاقى جيناقتارىن پايدالانۋعا وتىنىشتەر قابىلداۋ توقتاتىلدى. شەكتەۋ 15-قىركۇيەكتەن باستاپ كۇشىنە ەندى.

جاقىندا اتىراۋدا قارجىلىق مونيتورينگ اگەنتتىگىنىڭ (قما) قىزمەتكەرلەرى زەينەتاقى جيناقتارىن ستوماتولوگيالىق كلينيكالار ارقىلى زاڭسىز قولما-قول اقشاعا اينالدىرۋ دەرەگىنە بايلانىستى اۋقىمدى وپەراتسيا جۇرگىزىپ جاتقانىن جازعان ەدىك.