تەمىرتاۋدا مۇگەدەكتىگى بار ادامدارعا قىزمەت كورسەتپەگەن كومەكشىلەر 5 ميلليون تەڭگەدەن استام اقشا العان
استانا. KAZINFORM - تەمىرتاۋدا مۇگەدەكتىگى بار ادامداردىڭ جەكە كومەكشىلەرىنە ءىس جۇزىندە كورسەتىلمەگەن قىزمەتتەر ءۇشىن بيۋدجەتتەن 5 ميلليون تەڭگەدەن استام قاراجات تولەنگەن. زاڭسىز تولەمدەردى پروكۋراتۋرا انىقتادى.
تەمىرتاۋ پروكۋراتۋراسى الەۋمەتتىك قىزمەتتەر كورسەتۋ سالاسىنداعى زاڭنامانىڭ ساقتالۋىنا جۇرگىزىلگەن تالداۋ بارىسىندا بيۋدجەت قاراجاتىن نەگىزسىز جۇمساۋ فاكتىلەرىن انىقتادى.
اتاپ ايتقاندا، جەكە كومەكشىلەر ناقتى كورسەتىلمەگەن قىزمەتتەر ءۇشىن اقى العان. سونداي-اق قازاقستاننان تىس جەردە جۇرگەن كەزەڭدەرىنە قىزمەت كورسەتۋ اكتىلەرىن راسىمدەپ، ەڭبەك زاڭناماسىن بۇزعان جاعدايلار تىركەلدى.
تالداۋ ناتيجەسىندە مۇگەدەكتىگى بار ادامداردىڭ تۋىستارى بولىپ تابىلاتىن جەكە كومەكشىلەرگە فورمالدى تۇردە راسىمدەلگەن اكتىلەر نەگىزىندە 5 ميلليون تەڭگەدەن استام قاراجات نەگىزسىز ەسەپتەلگەنى بەلگىلى بولدى.
- قازاقستان رەسپۋبليكاسى الەۋمەتتىك كودەكسىنىڭ 163-بابىنىڭ 2-تارماعىنا سايكەس، جەكە كومەكشى ءبىرىنشى توپتاعى، ءجۇرىپ-تۇرۋى قيىن مۇگەدەكتىگى بار ادامدارعا كۇنىنە سەگىز ساعاتتان اسپايتىن ۋاقىت قىزمەت كورسەتەدى. تولەم ناقتى كورسەتىلگەن قىزمەت ۋاقىتىنا عانا جۇرگىزىلۋگە ءتيىس. مىسالى، جەكە كومەكشىلەردىڭ ءبىرى 2026 -جىلعى ساۋىردە جالپى ۇزاقتىعى 240 ساعات بولاتىن قىزمەت كورسەتۋ اكتىسىن ۇسىنعان. الايدا تەكسەرۋ بارىسىندا ونىڭ 16-24-ءساۋىر ارالىعىندا تۇركيانىڭ ىستانبۇل قالاسىندا بولعانى انىقتالدى. وسى كەزەڭدە ول مۇگەدەكتىگى بار ادامعا ءىس جۇزىندە قىزمەت كورسەتپەگەن، ءبىراق بۇل ۋاقىت تولەمگە ۇسىنىلعان اكتىگە ەنگىزىلگەن، - دەپ حابارلادى پروكۋراتۋرا.
ۆەدومستۆونىڭ مالىمەتىنشە، وسىنداي زاڭ بۇزۋشىلىقتار باسقا جاعدايلاردا دا انىقتالعان.
پروكۋراتۋرانىڭ قاداعالاۋ شارالارىنان كەيىن زاڭدىلىقتى قالپىنا كەلتىرۋ بويىنشا ءتيىستى جۇمىستار جۇرگىزىلدى. جەكە كومەكشى بولعان تۋىستارى نەگىزسىز العان اقشانى مەملەكەتكە ەرىكتى تۇردە قايتاردى.
پروكۋراتۋرا ناقتى كورسەتىلمەگەن قىزمەتتەر ءۇشىن تولەم الۋ جانە قىزمەت كورسەتۋ اكتىلەرىن فورمالدى تۇردە راسىمدەۋ زاڭ تالاپتارىنا قايشى ەكەنىن ەسكەرتتى. مۇنداي ارەكەتتەر زاڭدا كوزدەلگەن جاۋاپتىلىققا اكەپ سوعۋى مۇمكىن.
