تينا كاندەلاكي كوسمەتيكالىق برەندىنىڭ قازاقستاندىق سايتى اشىلماي تۇر

استانا. KAZINFORM - رەسەيلىك جۋرناليست تينا كاندەلاكيدىڭ كوسمەتيكالىق برەندى ەلدەگى دۇكەن سورەلەرىنەن جوعالا باستادى. Ansaligy برەندىنىڭ قازاقستاندىق سايتى دا اشىلماي تۇر.

قاڭتار ايىندا تينا كاندەلاكي قازاقستاندا ورىس ءتىلىنىڭ قولدانىس اياسى تارىلىپ بارا جاتقانىن ايتىپ، داۋ تۋدىرعان ەدى. كەيىنىرەك ق ر سىرتقى ىستەر مينيسترلىگى تينا كاندەلاكيدىڭ قازاقستانعا كىرگىزىلمەيتىنىن مالىمدەدى.

جاقىندا Ansaligy برەندىنىڭ تاۋارلارى ەلدەگى «زولتوە يابلوكو»، «Beautymania»  ،«Mon amie» سەكىلدى ءىرى كوسمەتيكالىق دۇكەن سايتتارىنان جوعالا باستادى. برەند تاۋارلارى Ozon, Wildberries, Kaspi ماركەتپلەيستەرىندە اشىق قولجەتىمدى.

سونداي-اق Ansaligy برەندىنىڭ رەسەي، ارمەنيا ەلدەرىنە ارنالعان رەسمي سايتتارى جۇمىس ىستەپ تۇر، ال قازاقستان، وزبەكستان سايتتارى ۋاقىتشا قولجەتىمسىز.