پۋتين ستراتەگيالىق شيكىزات ەكسپورتىن شەكتەۋدى ۇسىندى
استانا. KAZINFORM - رەسەي كەيبىر ستراتەگيالىق شيكىزاتتى، مىسالى، ۋران، تيتان نەمەسە نيكەلدى وزىنە زيان كەلتىرمەي سىرتقى نارىققا جەتكىزۋدى شەكتەي الادى. رەسەي پرەزيدەنتى ۆلاديمير پۋتين ۇكىمەتپەن كەڭەس بارىندا وسى ماسەلەنى ويلاستىرۋدى تاپسىردى، دەپ حابارلايدى تاسس اقپارات اگەنتتىگى.
«بىزگە ءبىرقاتار تاۋارلاردى جەتكىزۋ شەكتەلىپ جاتىر. ءبىز دە بەلگىلى ءبىر شەكتەۋ قويۋىمىز كەرەك شىعار؟» - دەدى پۋتين.
ونىڭ ايتۋىنشا، اڭگىمە رەسەي فەدەراتسياسىنىڭ الەمدىك نارىققا ۇلكەن كولەمدە جەتكىزىپ وتىرعان كەيبىر تاۋار تۇرلەرى تۋرالى بولىپ وتىر.
«ۋران، تيتان، نيكەل. وزىمىزگە زيان كەلتىرەتىن ەشتەڭە جاساماڭىزدار»، - دەدى پۋتين.
ونىڭ ايتۋىنشا، وسى جانە وزگە دە ءبىرقاتار تاۋاردى «سىرتقى نارىققا جەتكىزۋگە بەلگىلى ءبىر شەكتەۋلەر جايىندا ويلانۋ كەرەك».
پۋتين رەسەيدىڭ ستراتەگيالىق شيكىزات قورى بويىنشا كوشباسشى ەكەنىن ەسكە سالدى: وندا تابيعي گازدىڭ %22 دەرلىك، التىننىڭ %23 جۋىق جانە المازدىڭ %55 عا تارتا ۇلەسى بار.
«كەي ەلدەردە ستراتەگيالىق قور قۇرىلىپ، باسقا دا شارالار قابىلدانىپ جاتىر، جالپى، ەگەر بۇل بىزگە زيان تيگىزبەسە، وندا ويلانۋعا بولادى (مەن مۇنى ەرتەڭ ىستەۋ كەرەك دەپ ايتپايمىن، ءبىراق بۇل تۋرالى ويلانىڭىزدار). مەن اتاعان تاۋارلارعا عانا ەمەس، كەيبىر باسقالارىنا دا سىرتقى نارىققا جەتكىزۋگە بەلگىلى ءبىر شەكتەۋلەر تۋرالى ايتىپ وتىرمىن»، - دەدى ول ۇكىمەتكە تاپسىرماسىندا.
اۆتور
زارينا تۋعانبايەۆا
