پۋتين ۋكرايناعا الدىن الا شارتسىز كەلىسسوزدەردى قايتا باستاۋ جونىندە ۇسىنىس جاسادى

استانا. KAZINFORM - كەلىسسوز 15-مامىردا ىستامبۇلدا ءوتۋى مۇمكىن، دەپ مالىمدەدى پرەزيدەنت كرەملدە سويلەگەن سوزىندە. بۇل تۋرالى BBC اگەنتتىگى حابارلادى.

ونىڭ ءسوز سويلەۋى شامامەن 20 مينۋتقا سوزىلىپ، ماسكەۋ ۋاقىتى بويىنشا تۇنگى 1:30 دا باستالدى.

- كەلىسسوزدەر بارىسىندا جاڭا بىتىمگە قول جەتكىزۋىمىز مۇمكىن، - دەدى پۋتين، ءارى «ەندى دوپ ۋكراينانىڭ الاڭىندا» ەكەنىن قوستى.

سونداي-اق پۋتين ماسكەۋ باتىس ەلدەرى مەن كييەۆ ۇسىنعان جاڭا بىتىمگە كەلىسپەيتىنىن اڭعارتتى.

بۇعان دەيىن، 10-مامىر سەنبى كۇنى ا ق ش، گەرمانيا، ۇلى بريتانيا، فرانسيا، پولشا جانە ۋكراينا باسشىلارى ماسكەۋگە 12-مامىردان باستاپ 30 كۇندىك ءبىتىم جاريالاۋدى ۇسىنعان ەدى.

بۇل ۇسىنىس ماسكەۋ بۇعان دەيىن ءبىرجاقتى تۇردە جاريالاعان ءۇش كۇندىك بىتىمگەرشىلىكتىڭ جالعاسى بولار ەدى.

كيەۆ ازىرگە رەسەي پرەزيدەنتىنىڭ ۇسىنىسىنا قاتىستى پىكىر بىلدىرگەن جوق.