تيمۋر سۇلەيمەنوۆ: قازاقستانداعى دوللاردى رەسەيلىكتەر جاپپاي ساتىپ الادى دەپ قورقۋدىڭ قاجەتى جوق
استانا. KAZINFORM - پارلامەنت پالاتالارىنىڭ بىرلەسكەن وتىرىسىنان كەيىن ب ا ق وكىلدەرىنىڭ سۇراعىنا جاۋاپ بەرگەن ۇلتتىق بانك ءتوراعاسى تيمۋر سۇلەيمەنوۆ رەسەيدىڭ ۆاليۋتا نارىعىنداعى قۇبىلىستاردىڭ قازاقستانعا اسەرى تۋرالى پىكىر ءبىلدىردى.
- كەيبىر ساراپشىلار «ماسكەۋ بيرجاسىنا» سالىنعان سانكسيادان كەيىن قازاقستانداعى دوللاردى رەسەيلىكتەر جاپپاي ساتىپ الادى دەگەن بولجام ايتىپ جاتىر. وسىعان بايلانىستى رەسەي رۋبلىن قازاقستاندا كونۆەرتاتسيالاۋعا تىيىم نەمەسە شەكتەۋ قويىلا ما؟ - دەپ سۇرادى جۋرناليست.
تيمۋر سۇلەيمەنوۆتىڭ پايىمداۋىنشا، ونداي شاراعا قاجەتتىلىك جوق.
«جوق، قازىرگى تاڭدا شەكتەۋدىڭ ەشقانداي قاجەتى جوق. ويتكەنى ءبىز كورىپ وتىرعان قۇبىلىس تەك 1-2 پروتسەنت كولەمىندە. مەنىڭشە 1-2 پروتسەنت ءۇشىن شەكتەۋ جاساۋدىڭ ەشقانداي قاجەتى جوق»، - دەدى ول.
سونداي-اق، ت. سۇلەيمەنوۆ تەڭگەنىڭ قازىرگى السىرەۋى قازاقستاندىق ەكسپورتتاۋشىلارعا قولايلى دەپ ەسەپتەيتىنىن ايتتى.
«وزدەرىڭىز كورىپ وتىرسىزدار، قازىرگى تاڭدا 1 رۋبلدىڭ باعامى 5,2 تەڭگە بولىپ تۇر. سوندىقتان ءيا، تەڭگەمىز كىشكەنە السىرەدى. بۇل دەگەن - ءبىزدىڭ ەكسپورتتاۋشىلارىمىز ءۇشىن وتە ءبىر ءتيىمدى قۇبىلىس. ويتكەنى ولاردىڭ تاۋارلارى ىشكى نارىقتا دا، سىرتقى نارىقتا دا باسەكەگە قابىلەتتىرەك بولادى»، - دەدى ۇلتتىق بانك باسشىسى.
