تيمۋر سۇلەيمەنوۆ: بازالىق مولشەرلەمەنى كەز كەلگەن ۋاقىتتا وزگەرتۋىمىز مۇمكىن
استانا. KAZINFORM - الەم ەكونوميكاسىنداعى جاعداي مەن قازاقستاننىڭ ءوز ىشىندەگى احۋال كۇرت وزگەرسە بۇگىن قابىلدانعان بازالىق مولشەرلەمە كەنەت وزگەرۋى مۇمكىن. بۇل تۋرالى ۇلتتىق بانك ءتوراعاسى تيمۋر سۇلەيمەنوۆ ايتتى.
- الەم ەكونوميكاسىنداعى كونيۋنكتۋرا كۇرت وزگەرسە سىرتقى جانە ىشكى سىن-قاتەرلەر ىسكە اسقان جاعدايدا ۇلتتىق بانكتىڭ اقشا-كرەديت ساياسات جونىندەگى كوميتەتى بازالىق مولشەرلەمە بويىنشا كەزەكتەن تىس شەشىم قابىلداۋعا حاقىلى. بۇل كوميتەت الەم نارىعىنداعى احۋالدى مۇقيات باعىپ، ونىڭ بىزدەگى ينفلياتسيا پروتسەستەرىنە ىقپالىن باعالاپ وتىرادى، - دەدى تيمۋر سۇلەيمەنوۆ.
سونداي-اق الەم ەكونوميكاسىنداعى قازىرگى جاعداي تەڭگەمەن ساقتالعان دەپوزيتتەردىڭ كولەمىنە قالاي اسەر ەتەتىنى تۋرالى پىكىر ءبىلدىردى.
- بىلتىر قاراشا ايىنىڭ اياعى مەن جەلتوقسان ايىندا تەڭگەگە قىسىم كوپ بولدى. كەيبىر ساراپشىلار وسى كەزدە تەڭگەمەن ساقتاۋلى دەپوزيت يەلەرى دوللارعا كوشەدى دەگەن قاۋىپتەرىن ايتىپ جاتتى. ءبىرىنشى توقساننىڭ ستاتيستيكاسىن كورىپ وتىرمىز. ادامداردىڭ تەڭگەگە دەگەن سەنىمى سول كۇيىندە. ونىڭ ۇستىنە تەڭگەمەن ساقتالاتىن دەپوزيتتەردىڭ پايىزدىق مولشەرلەمەسى دە اقىلعا قونىمدى - ينفلياتسيانىڭ كەرى اسەرىن جاۋىپ كەتىپ جاتىر. بۇل ازاماتتارعا اقشاسىن قۇنسىزدانۋدان ساقتاۋعا كومەكتەسىپ وتىر. سوندىقتان دا دەپوزيتتەردىڭ دوللارسىزدانۋ دەڭگەيى 22,5 پايىز دەڭگەيىندە. بۇل تاريحي كورسەتكىشتەردىڭ ەڭ تومەنگى شەگىنە جاقىن. سوندىقتان قازاقستاندىقتار ۇلتتىق ۆاليۋتاعا سەنىم ارتاتىنىن سانداردىڭ ءوزى كورسەتىپ تۇر. ادامدار اقشاسىن تەڭگەمەن ساقتاپ وتىر، - دەدى تيمۋر سۇلەيمەنوۆ.
ايتا كەتەيىك، بۇگىن ۇلتتىق بانك بازالىق مولشەرلەمە تۋرالى جاڭا شەشىم قابىلدادى.
