ۋتيل الىمىنا قارسى پەتيتسيا 50 مىڭ قول جينادى، ەندى ونى ۇكىمەت قارايدى
استانا. KAZINFORM - اكىمشىلىك راسىمدىك-پروتسەسسۋالدىق كودەكستىڭ 90-4-بابىنا سايكەس، 50000 قول جيناعان پەتيتسيا ونەركاسىپ جانە قۇرىلىس مينيسترلىگىنىڭ قاراۋىنا بەرىلەدى.
وسى كودەكستىڭ 90-5-بابى بويىنشا كەلىپ تۇسكەن ءوتىنىش ونى تىركەگەن ساتتەن باستاپ 40 جۇمىس كۇنىنە دەيىنگى مەرزىم ىشىندە قارالادى.
پەتيتسيانى قاراۋ بارىسىندا ونەركاسىپ جانە قۇرىلىس مينيسترلىگى كوميسسيانىڭ جۇمىسىن ۇيىمداستىرادى.
وعان مۇددەلى تاراپتاردىڭ، مەملەكەتتىك ورگاندار مەن قوعامدىق بىرلەستىكتەردىڭ وكىلدەرى كىرەدى.
پەتيتسيادا كوتەرىلەتىن ماسەلەلەر وسى كوميسسيا شەڭبەرىندە، زاڭنامادا بەلگىلەنگەن تارتىپپەن قارالادى.
ەسكە سالا كەتەيىك، بۇگىن ونەركاسىپ جانە قۇرىلىس ءمينيسترى قانات شارلاپايەۆ وسى ۋتيلالىمعا قارسى ونلاين پەتيتسيا جونىندە پىكىر بىلدىرگەن ەدى.
«ءتيىستى دەڭگەيدە داۋىس جيناعان پەتيتسيانى ۇكىمەت مىندەتتى تۇردە قاراستىرىپ، شەشىم شىعارۋى كەرەك. سوندىقتان وعان جەتكىلىكتى دەڭگەيدە قول قويىلسا، زاڭدا بەلگىلەنگەن تارتىپتە ۇكىمەت حالىقتىڭ تالاپتارىن تالقىلايدى. وسىنىڭ اياسىندا جۇمىس توبى قۇرىلىپ، ونى قاراستىرۋعا پارلامەنت دەپۋتاتتارىن شاقىرامىز»، - دەدى ق. شارلاپايەۆ سەناتتا تىلشىلەر سۇراعىنا جاۋاپ بەرە وتىرىپ.
بۇل تۇرعىدا ول ۇجىمدىق تالقىلاۋ اياسىندا پەتيتسياعا قاتىستى ۇكىمەت ءوز شەشىمىن جاريالايتىنىن ايتتى.
