پۋتين كرەملدە ا ق ش پرەزيدەنتىنىڭ ارنايى وكىلدەرىمەن كەلىسسوزدەر جۇرگىزىپ جاتىر
ماسكەۋ. KAZINFORM - رەسەي پرەزيدەنتى ۆلاديمير پۋتين كەلىسسوز جۇرگىزۋ ءۇشىن ماسكەۋگە كەلگەن ا ق ش پرەزيدەنتى دونالد ترامپتىڭ ارنايى وكىلدەرى ستيۆ ۋيتكوفف پەن دجارەد كۋشنەردى كرەملدە قابىلداپ جاتىر، دەپ حابارلايدى اگەنتتىكتىڭ ماسكەۋدەگى مەنشىكتى ءتىلشىسى.
كرەملدەگى كەلىسسوزدەرگە رەسەي پرەزيدەنتىنىڭ كومەكشىلەرى يۋري ۋشاكوۆ پەن ۆلاديمير مەدينسكي، سونداي-اق ۆلاديمير پۋتيننىڭ شەت مەملەكەتتەرمەن ينۆەستيتسيالىق-ەكونوميكالىق ىنتىماقتاستىق جونىندەگى ارنايى وكىلى، رەسەيدىڭ تىكەلەي ينۆەستيتسيالار قورىنىڭ باسشىسى كيريل دميتريەۆ تە قاتىسىپ جاتىر.
بۇعان دەيىن رەسەي پرەزيدەنتىنىڭ كومەكشىسى يۋري ۋشاكوۆ ۆلاديمير پۋتيننىڭ امەريكالىق وكىلدەرمەن ۋكرايناداعى قاقتىعىستى رەتتەۋ ماسەلەلەرىن تالقىلايتىنىن حابارلاعان بولاتىن.
ا ق ش تاراپى كيەۆ جانە ەۋروپالىق سەرىكتەستەرمەن كەلىسىلگەن ۇسىنىستاردى دا تالقىلاۋدى جوسپارلاپ وتىر.
ا ق ش وكىلدەرى مىنگەن ۇشاق 12-قاراشا كۇنى تاڭەرتەڭ ۆنۋكوۆو اۋەجايىنا قوندى. كەلىسسوز جۇرگىزۋشىلەردى كيريل دميتريەۆ قارسى الدى.
ساپار الدىندا ابۋ-دابيدە رەسەي، ا ق ش جانە ۋكراينا وكىلدەرى ەكى كۇن بويى كەلىسسوز جۇرگىزدى. كەلىسسوز قورىتىندىسى بويىنشا دجارەد كۋشنەر رەتتەۋ ۇدەرىسىن ودان ءارى ىلگەرىلەتۋ ءۇشىن ەۋروپا ەلدەرىنىڭ قاتىسۋى قاجەت ەكەنىن اتاپ ءوتتى.
بۇعان دەيىن ا ق ش پرەزيدەنتىنىڭ ارنايى وكىلى ستيۆ ۋيتكوفف وسلودا ۋكراينا جانە ەۋروپا وكىلدەرىمەن كەلىسسوزدەر جۇرگىزگەننەن كەيىن سانكت-پەتەربۋرگكە كەلگەنى حابارلانعان بولاتىن.
ستيۆ ۋيتكوففتىڭ ماسكەۋگە بۇعان دەيىنگى ساپارى قازان ايىنىڭ سوڭىندا بولعان ەدى.
