تۇنگى اسپاندا جارقىراپ اققان نە
پەتروپاۆل. KAZINFORM - سولتۇستىك قازاقستان وبلىسىنىڭ كەي تۇرعىندارى وتكەن تۇندە اسپاننان جارقىراپ وتكەن بەلگىسىز نىساندى بايقاپ، ەرەكشە كورىنىستىڭ كۋاسى بولدى.
ولاردىڭ كەيبىرى بۇل ءساتتى ۇيالى تەلەفونعا ءتۇسىرىپ ۇلگەرگەن.
الەۋمەتتىك جەلىدە تاراعان بەينەجازبادان كۋاگەرلەردىڭ ەرەكشە اسەر العانىن بايقاۋعا بولادى.
وقيعا 12-قازان كۇنى ساعات 21:30 شاماسىندا بولعان. كۋاگەرلەردىڭ ءبىرى اسپاندا جارقىراپ وتكەن نىسان مەتەوريت بولۋى مۇمكىن ەكەنىن ايتادى.
م. قوزىبايەۆ اتىنداعى سولتۇستىك قازاقستان ۋنيۆەرسيتەتىنىڭ پروفەسسورى، بەلگىلى استروفيزيك اندرەي سولودوۆنيك بۇل قۇبىلىستى ءوز كوزىمەن كورمەگەن. بەينەجازبانى تاماشالاعان عالىمنىڭ پىكىرىنشە، اسپانداعى جارىق قۇبىلىسى وربيتادان شىققان عارىشتىق تەحنيكا بولشەكتەرىنىڭ اتموسفەرادا جانۋىنان پايدا بولۋى مۇمكىن.
- بوليد بولۋى مۇمكىن ەدى، ءبىراق، قوزعالىس جىلدامدىعى بىرنەشە ەسە باياۋ. بۇل زىمىران تاسىعىشتىڭ جوعارعى ساتىسىنىڭ قيراۋى نەمەسە وربيتادان شىققان جەرسەرىك بولۋى ىقتيمال.
مۇنداي بەينەجازبالار الەمنىڭ باسقا وڭىرلەرىندە دە بۇرىن تۇسىرىلگەن. قازىر بىزدە جەرسەرىكتەردىڭ سانى مىڭنان اسادى. سوندىقتان بۇل جۇمىسىن توقتاتقان اپپاراتتاردىڭ ءبىرى بولۋى مۇمكىن، - دەدى اندرەي سولودوۆنيك.
پروفەسسوردىڭ ايتۋىنشا، قازان ايىندا تۇنگى اسپاندا جارىق بوليدتەردى بايقاۋعا بولادى. وسى كەزەڭدە جەر بىردەن بىرنەشە ءىرى مەتەور اعىنىنىڭ وربيتاسىن كەسىپ وتەدى. نەگىزگى سەبەبى - كومەتالاردان بولىنگەن ۇساق بولشەكتەردىڭ جەر اتموسفەراسىنا اسا جوعارى جىلدامدىقپەن ەنۋى.
- مەتەوريت جەرگە قۇلاعان كەزدە ادامدار ونىڭ دىبىسىن ەستۋى مۇمكىن. وندايدا كۇن كۇركىرەگەندەي بولادى. ال اسپاندا تەك جارقىراپ ءوتىپ كەتسە، ول بوليد بولۋى مۇمكىن. ادەتتە، مۇنداي قۇبىلىس قاۋىپ توندىرمەيدى، نىسان اتموسفەرادا جانىپ، جەرگە جەتپەي توزاڭعا اينالادى،- دەدى استروفيزيك.
بۇعان دەيىن پەرسەيدتەر مەتەور اعىنى 13-تامىزعا قاراعان ءتۇنى شارىقتاۋ شەگىنە جەتەتىنىن جازعان ەدىك.
