ەڭ تومەنگى جالاقى قاشان كوتەرىلەدى - جۇمانعارين جاۋابى

بۇگىن قۇرىلتاي وتىرىسىنان كەيىن وتكەن باسپا ءسوز ءماسليحاتىندا ب ا ق وكىلدەرى ۆيتسە-پرەمەردەن ەڭ تومەنگى جالاقى مولشەرىنىڭ قاشان كوتەرىلەتىندىگىن سۇراعان ەدى. ساۋالعا جاۋاپ بەرگەن سەرىك جۇمانعارين بۇل ماسەلە ۇكىمەت پەن پرەزيدەنت اكىمشىلىگى دەڭگەيىندە تالقىلانىپ جاتقانىن اتاپ ءوتتى.

- سوندىقتان تاياۋ ۋاقىتتا ناتيجەسى بەلگىلى بولادى دەپ ويلايمىن. مەرزىمىن ايتا المايمىن. بۇل تاياۋ بولاشاقتىڭ ماسەلەسى. ەگەر كوتەرىلەتىن بولسا، وندا كەلەسى جىلى، - دەدى ۆيتسە-پرەمەر.

ايتا كەتەيىك، ۇلتتىق ەكونوميكا مينيسترلىگى 2019-2026-جىلدار ارالىعىندا ەلىمىزدە نەگىزگى الەۋمەتتىك تولەمدەر ايتارلىقتاي وسكەنىن مالىمدەگەن ەدى.

ۇسىنىلعان دەرەكتەرگە سايكەس، ەڭ تومەنگى جالاقى 2 ەسە ءوسىپ، 42,5 مىڭ تەڭگەدەن 85 مىڭ تەڭگەگە دەيىن ۇلعايدى. ەڭ تومەنگى زەينەتاقى مولشەرى شامامەن 2 ەسە ءوسىپ، 36,1 مىڭ تەڭگەدەن 69 مىڭ تەڭگەگە دەيىن جەتتى. جان باسىنا شاققانداعى ج ءى و 715,5 مىڭ تەڭگەدەن 1661,6 مىڭ تەڭگەگە دەيىن جوعارىلادى.