توي ءۇشىن قارىزعا باتۋدىڭ قاجەتى جوق - نۇرلان بايجىگىت ۇلى

يمام قازاقتىڭ بولمىسىندا باسەكەلەستىك پەن وزگەدەن اسىپ تۇسۋگە دەگەن ۇمتىلىس بار ەكەنىن اتاپ ءوتتى. ونىڭ ايتۋىنشا، بۇل قاسيەت ابايدىڭ شىعارمالارىندا دا سىنالعان.

- جالپى، توي - قازاقتىڭ بولمىسىندا وتكەنى بار ءداستۇر. الايدا ءبىر-بىرىمىزدەن اسىپ تۇسۋگە دەگەن باسەكەلەستىك تە سوزسىز بار. كەشەگى ۇلى دانا اباي اتامىز بەس جامان قاسيەتكە تەڭەپ كەتكەن وسەك، وتىرىك، ماقتانشاقتىق سونىڭ ىشىندەگى ماقتانشاقتىعىمىز، الدىمىزعا جان سالعىمىز كەلمەيتىندىگى ءار قاشان كوزگە كورىنىپ تۇرادى،- دەدى نۇرلان بايجىگىت ۇلى.

ونىڭ سوزىنشە، قوعامدا ماقتانۋدىڭ دا پايدالى تۇستارى بار. الايدا ادامنىڭ جەتىستىگى ءبىلىم، عىلىم جانە سپورت سياقتى سالالارداعى ناتيجەسىمەن ولشەنگەنى ءجون.

- نەگىزىندە، كەيبىر ماسەلەلەردە ماقتانعانىمىز جاقسى عىلىممەن، بالالارىمىزدىڭ وزات جەتىستىگىمەن، عىلىمداعى دارەجەمىزبەن، بىلىمدەگى وزاتتىعىمىزبەن، سپورت دەڭگەيىندە الەمدى باعىندىرۋمەن ماقتانساق بولادى. ءبىراق بۇگىن ماقتاپ، ەرتەڭ ۇمتىلىپ قالاتىن، نەمەسە جاي عانا بۇگىن ماقتانساق، ەرتەڭ بەتىمىزگە باسىلاتىن دۇنيەلەرگە ەلىكتەپ جۇگىرىپ جۇرگەن جاعدايىمىز بار،-دەدى يمام.

نۇرلان بايجىگىت ۇلى تويدىڭ قازاق داستۇرىندەگى ورنىن جوققا شىعارۋعا بولمايتىنىن ايتتى.

- شىن مانىندە، توي بولۋ كەرەك شىعار. تويدىڭ ورنى بار، تويدىڭ قۋانىش ەكەندىگى بەلگىلى. پايعامبارىمىز مۇحاممەد س. ا. ۋ. ۇيلەنگەندە توي بەرگەنى بەلگىلى، جالپى قازاققا بۇل جات دۇنيە ەمەس. الايدا تىم ىسىراپشىلدىققا بەرىلىپ، كەيدە بىرەۋدەن اسىپ تۇسۋگە تىرىسۋ - بىزدە تويدىڭ ءوزى، شىن مانىندە، ماقتانىش، ياعني ءوزىنىڭ ءبىر شىڭعا جەتكەنىن كورسەتۋ عانا بولىپ قالدى. ەڭ قيىنى - قارىزعا باتىپ توي بەرىپ، سول ادامداردىڭ بۇگىن ماقتاۋىن الىپ، ەرتەڭ داتتاۋىنا قالماۋدى ويلايتىن ادام جوقتىڭ قاسى، تەك «ەرتەڭ نە بولسا دا، بۇگىن اتىم شىقسا ەكەن» دەگەن ماسەلە عانا الدىڭعى ورىندا تۇر - دەدى ول.

نۇرلان بايجىگىت ۇلىنىڭ ايتۋىنشا، توي جاساۋ ءۇشىن قارىزعا كىرۋ ماسەلەسىنە توقتالىپ، مۇنداي جاعدايدا ادامنىڭ نيەتى ماڭىزدى ەكەنىن ايتتى. ونىڭ سوزىنشە، ءداستۇردى جالعاستىرۋدىڭ ءوز ءجونى بار، الايدا ەلگە كورسەتۋ، ماقتانۋ نەمەسە وزگەدەن اسىپ ءتۇسۋ ءۇشىن قارىزعا باتۋدىڭ قاجەتى جوق. قارىز الۋعا ءماجبۇر بولعان ادام ونى وتەۋگە ناقتى نيەت ەتىپ، جاۋاپكەرشىلىكپەن قاراۋى كەرەك. ال قارىزدى «كەيىن كورەرمىز» دەگەن نيەتپەن الۋ ادامدى ءبىر قارىزدان ەكىنشىسىنە جەتەلەۋى مۇمكىن. سوندىقتان تويدىڭ ماقساتى وزگەنىڭ ماقتاۋىنا يە بولۋ ەمەس، قۋانىشتى شاماسىنا قاراي اتاپ ءوتۋ بولۋى ءتيىس.

بۇعان دەيىن قوعامدا تويشىلدىقتىڭ ماڭىزى قانداي ەكەنىن جازعانبىز.