توتەنشە جاعدايلار مينيسترلىگى جاتاقحانالار قاۋىپسىزدىگىن ەرەكشە باقىلاۋعا الماق

كەلىپ تۇسكەن شاعىمداردىڭ 60 پايىزى ءورت قاۋىپسىزدىگى تالاپتارى قۇرىلىس ساتىسىندا بۇزىلاتىنىن كورسەتىپ وتىر. بۇل تۋرالى سەناتتا ازاماتتىق قورعاۋ جۇيەسىن جەتىلدىرۋ تاقىرىبىنداعى پارلامەنتتىك تىڭداۋ بارىسىندا توتەنشە جاعدايلار ءمينيسترى سىرىم ءشارىپحانوۆ ايتتى، دەپ حابارلايدى Kazinform.

«قازىر ۇكىمەتتىڭ جەتى فۋنكسياسى مينيسترلىككە، ال مينيسترلىكتىڭ 1 فۋنكسياسى جەرگىلىكتى اكىمدىكتەرگە بەرىلدى. اكىمشىلىك رەفورما اياسىندا «ازاماتتىق قورعاۋ تۋرالى» زاڭنان 56 فۋنكسيانى الىنىپ تاستالدى، تاعى 53 ى ازىرلەنگەن زاڭ جوباسى بويىنشا ىسكە اسىرىلادى. ۇسىنىلعان زاڭ جوباسى مەملەكەت باسشىسىنىڭ تاپسىرمالارىنا، ۇكىمەتتىڭ 2023 -جىلعا ارنالعان زاڭ جوبالاۋ جۇمىستارىنىڭ جوسپارىنا سايكەس ازىرلەندى جانە ازاماتتىق قورعاۋ سالاسىنداعى قاۋىپسىزدىكتى قامتاماسىز ەتۋ جونىندەگى شارالاردى ىسكە اسىرۋدى كوزدەيدى»، - دەدى س. ءشارىپحانوۆ.

بۇل تۇرعىدا اتالعان قۇجات اياسىندا ەسكەرىلگەن قادامدارعا توقتالدى.

«بىرىنشىدەن، ءورت قاۋىپسىزدىگىن قامتاماسىز ەتۋگە قاتىستى. وبەكتىلەردى جوبالاۋ جانە سالۋ كەزىندە بولعان ءورت قاۋىپسىزدىگى تالاپتارىن بۇزۋ فاكتىلەرى، ءورتتىڭ تۋىنداۋ قاۋپىن سەيىلتۋ جانە ونىڭ جاعىمسىز سالدارىن ازايتۋ ماقساتىندا كەشەندى شارالار قابىلداۋدى تالاپ ەتەدى. مينيسترلىككە كەلىپ تۇسكەن شاعىمداردىڭ 60 پايىزى ءورت قاۋىپسىزدىگى تالاپتارىن جوبالاۋ كەزىندە جانە قۇرىلىس ساتىسىندا بۇزىلاتىنىن كورسەتىپ وتىر. ماسەلەن، «STOP قۇرىلىس» توبى مۇشەلەرىنىڭ ءبىر عانا وتىنىشىندە الماتى قالاسىندا ءورت قاۋىپسىزدىگى تالاپتارىن بۇزعان 11 تۇرعىن ءۇي كەشەنىنىڭ بار ەكەنىن كورسەتتى. الماتى قالاسىنداعى 13 ادامنىڭ ءومىرىن قيعان حوستەلدەگى قايعىلى وقيعا قوعامدىق رەزونانس تۋدىردى. اتالعان جاعدايلارعا جەكە ۇيلەر مەن كوتتەدجدەردى جاتاقحانا ەتىپ قايتا جابدىقتاۋ ءۇردىسىنىڭ ءوسۋى ىقپال ەتىپ وتىر. اسىرەسە مۇنداي ءىس ارەكەتتەر استانا، الماتى جانە شىمكەنت قالالارىندا بايقالدى. وسىنداي فاكتىلەردىڭ الدىن الۋ ءۇشىن بيىكتىگى 28 مەتردەن اساتىن عيماراتتار مەن ادامدار جاپپاي شوعىرلاناتىن نىسانداردى پايدالانۋعا قابىلداۋ كەزىندە مينيسترلىكتىڭ (توتەنشە جاعدايلار مينيسترلىگى) قاتىسۋىن قايتارۋ بويىنشا نورما ازىرىلەندى»، - دەدى مينيستر.

ونىڭ ايتۋىنشا، مەملەكەت باسشىسىنىڭ قۇرىلىستى جوبالاۋ كەزىندە ءورت قاۋىپسىزدىگى تالاپتارىن كۇشەيتۋ تۋرالى تاپسىرماسىن ورىنداۋ ماقساتىندا مينيسترلىككە ارنايى تەحنيكالىق شارتتاردى كەلىسۋ وكىلەتتىگىن بەرۋ قاراستىرىلعان. بۇل نورما ءورت قاۋىپسىزدىگى تالاپتارىن ورىنداۋدان نەگىزسىز اۋىتقۋ فاكتىلەرىنىڭ الدىن الۋعا مۇمكىندىك بەرەدى.

اۆتور

رۋسلان عابباسوۆ