توتەنشە جاعدايلار ءمينيسترى مايقايىڭعا قاشان بارادى

استانا. KAZINFORM – ق ر توتەنشە جاعدايلار ءمينيسترى شىڭعىس ءارىنوۆ «مايقايىڭ التىن» كەن ورنىنداعى قازىرگى احۋالدى باياندادى.

4- قاڭتار كۇنى «مايقايىڭ التىن» كەن ورنىندا ۇلكەن ويىق ماڭىنداعى توپىراق وپىرىلىپ، 4 ادام مىنگەن اۆتوبۋس جەر استىنا ءتۇسىپ كەتكەن بولاتىن. ەكى ادام قايتىس بولىپ، ەكى ادام ءالى تابىلمادى.

«قازىر ىزدەۋ جۇمىستارىن جۇرگىزۋ ءۇشىن تاۋەكەلدەردى باعالاۋ بويىنشا ساراپتاما جۇرگىزىلۋدە، ويتكەنى وپىرىلۋ قاۋپى ءالى دە بار. ءبىز ءتىرى ادامداردى - قۇتقارۋشىلاردى جوعالتۋىمىز مۇمكىن. سوندىقتان، شامامەن 30- ناۋرىزعا دەيىن (ساراپتاما) اياقتالادى جانە ءبىز ىزدەۋ جۇمىستارىن نەمەسە جالپى جۇمىستى قايتا باستاۋ تۋرالى قوسىمشا شەشىم قابىلدايمىز»، - دەدى مينيستر ۇكىمەت ۇيىندە وتكەن باسپا ءسوز ءماسليحاتىندا.

اقپان ايىنىڭ باسىندا شىڭعىس ءارىنوۆ «مايقايىڭ التىن» كەنىشىنە مىندەتتى تۇردە باراتىنىن ايتقان ەدى.

«ول جوسپاردا بار. جاقىندا وڭتۇستىك وڭىرلەردى ارالاپ شىقتىم. الماتىنى ارالادىم، اقمولا وبلىسىندا بولدىم. الداعى 1-2 اپتادا مايقايىڭعا بارامىن»، - دەپ جاۋاپ بەردى ت ج ءمينيسترى ءتىلشى سۇراعىنا.

سونداي-اق، بۇگىن ق ر ت ج م ونەركاسىپتىك قاۋىپسىزدىك كوميتەتى ءتوراعاسىنىڭ ورىنباسارى مۇسا تانابايەۆ «مايقايىڭ التىن» ا ق كاسىپورنىنىڭ بايىتۋ فابريكاسى قانداي جاعدايدا جۇمىسىن جالعاستىراتىنىن ايتتى.

19- اقپاندا «مايقايىڭ التىنعا» قاراستى كەن بايىتۋ فابريكاسى 1- ساۋىرگە دەيىن جۇمىسىن توقتاتقان ەدى.