توتەنشە جاعدايلار ءمينيسترى ەل تۇرعىندارىنا ۇندەۋ جاريالادى
توتەنشە جاعدايلار ءمينيسترى سىرىم ءشارىپحانوۆ قازاقستاندىقتارعا ۇندەۋ جاسادى، دەپ حابارلايدى Kazinform.
"30-جەلتوقساننان 3-قاڭتار ارالىعىندا ت ج م بولىمشەلەرى توتەنشە جاعدايلارعا جەدەل دەن قويۋ ءۇشىن قىزمەتتىڭ كۇشەيتىلگەن رەجيمىنە كوشتى. كۇشتەر مەن قۇرالدار تۇراقتى ازىرلىكتە تۇر.
مەرەكە كۇندەرى اۋا رايىنىڭ قولايسىزدىعىنا بايلانىستى ازاماتتاردان داۋىلدى ەسكەرتۋلەردى، اۋا رايىنىڭ وزگەرۋىن، جولداردىڭ جابىلۋى تۋرالى حابارلامالاردى باقىلاۋدى، سونداي-اق الىس ساپارعا شىقپاۋدى سۇرايمىن.
اۋىلدىق جەرلەردە تۇراتىن تۇرعىندارعا اۋا رايى ناشارلاعان جاعدايدا الىس قاشىقتىققا جاياۋ جۇرۋدەن باس تارتۋدى ۇسىنامىن.
قازىرگى ۋاقىتتا اۋا-رايىنىڭ كۇرت جىلىنۋىنا بايلانىستى ەلىمىزدىڭ كەيبىر وڭىرلەرىندە سۋ ايدىندارىندا مۇزدىڭ جۇقارعانى بايقالادى. وسىعان بايلانىستى ازاماتتاردان جۇقا مۇزعا شىقپاۋدى جانە ءقاۋىپسىز ءجۇرىس-تۇرىس ەرەجەلەرىن قاتاڭ ساقتاۋدى سۇرايمىن!" دەلىنگەن حابارلامادا.
سونداي- اق، مينيستر جاڭاجىلدىق ءىس-شارالاردى ۇيىمداستىرۋشىلار مەن ازاماتتاردى ءورت قاۋىپسىزدىگى ەرەجەلەرىنىڭ تالاپتارىن ساقتاۋعا شاقىردى. ءۇي-جايدا وتشاشۋلار مەن ورتكە اكەلۋى مۇمكىن باسقا دا ءورت ءقاۋىپتى جارىق اسەرى بار قۇرالداردى پايدالانۋعا بولمايتىنىن ەسكەرتتى.
"پيروتەحنيكالىق قۇرالداردى ابايسىز قولدانۋ ءورتتىڭ پايدا بولۋىنا عانا ەمەس، سونىمەن قاتار جاراقات پەن مەرتىگۋگە اكەلۋى مۇمكىن ەكەنىن ەسكە سالامىن.
سونىمەن قاتار، تۇرمىستىق ءورت قاۋىپسىزدىگى ەرەجەلەرىن ساقتاپ، بالالاردى ەرەسەكتەردىڭ قاراۋىنسىز قالدىرماۋ قاجەت.
قاراپايىم ەرەجەلەردى ساقتاۋ ءسىزدىڭ جانە جاقىندارىڭىزدىڭ ءومىرى مەن دەنساۋلىعىن ساقتاۋعا مۇمكىندىك بەرەدى.
جاڭا جىل وتباسىلىق مەرەكە ەكەنىن ەسكەرە وتىرىپ، ونى ۇيدە وتباسىمەن قارسى الۋدى ۇسىنامىن"،-دەپ ءتۇيدى ءسوزىن سىرىم ءشارىپحانوۆ.
