توتەنشە جاعدايلار ءمينيسترى بىلتىرعى سۋ تاسقىنىنىڭ نەگىزگى سەبەپتەرىن اتادى
استانا. KAZINFORM - توتەنشە جاعدايلار ءمينيسترى شىڭعىس ءارىنوۆ سەناتتا وتكەن ۇكىمەت ساعاتىندا وتكەن جىلعى كوكتەمدەگى سۋ تاسقىنىنىڭ سەبەبى مەن سالدارىن ءتۇسىندىردى.

جالپى، سۋ تاسقىنى سالدارىنان ەلىمىزدىڭ 12 ءوڭىرى زارداپ شەكتى، 200 دەن استام ەلدى مەكەننىڭ تىنىس-تىرشىلىگى مەن ينفراقۇرىلىمى بۇزىلدى.
وعان قوسا، 11 مىڭنان استام تۇرعىن ءۇيدى، 25 مىڭنان استام ساياجايلار مەن ۋچاسكەلەردى، 453 عيماراتتى سۋ باسىپ، 150 اۆتوجول ۋچاسكەلەرى مەن 11 كوپىردى سۋ شايدى. 12 مىڭنان استام مال شىعىنى تىركەلدى.
- سۋ تاسقىنىنىڭ نەگىزگى سەبەبى - قىس پەن كوكتەم مەزگىلىندەگى گيدرومەتەورولوگيالىق جاعدايدىڭ كۇرت وزگەرۋى بولدى. كۇن سۋىتا باستاعاندا توپىراقتىڭ جوعارى ىلعالدىلىعى ونىڭ بەتكى قاباتىندا كوپ ىلعال جينالىپ، قاتۋىنا اكەلدى. ال قىس كەزىندە جىلىمىق بولعاندا توپىراق پەن قالىڭ قار جامىلعىسىنىڭ بەتىندە مۇز قابىقشاسى پايدا بولدى. كوكتەمنىڭ باسىندا قار تەز ەرىپ، اۋا تەمپەراتۋراسى جوعارىلاپ، جاۋىن-شاشىن كوپ مولشەردە ءتۇستى، - دەدى ت ج ءمينيسترى.
قاردىڭ تەز ەرۋى، توپىراقتىڭ ىلعالدىلىعى، قار جامىلعىسىنداعى سۋدىڭ ەداۋىر مولشەرى انومالدى سۋ تاسقىنىنا اكەپ سوقتى.
سونداي-اق، رەسەي فەدەراتسياسىنىڭ يريكلين سۋ قويماسى تولىپ، سۋدى بىردەن ارتىق مولشەردە توككەندىكتەن، جايىق وزەنى ارناسىنان شىعىپ، ەلىمىزدىڭ باتىس وڭىرلەرىندەگى جاعدايدى قيىنداتتى.
اقتوبە جانە قارعالى سۋ قويمالارىنىڭ تولۋىنا بايلانىستى قارعالى جانە ەلەك وزەندەرىنە سۋ توگىلدى. ونىڭ سالدارىنان اقتوبە قالاسىنداعى ساياجاي ۋچاسكەلەرىن سۋ باستى.
- وڭىرلەردىڭ مۇنداي اۋقىمدى سۋ تاسقىنىنا جەتكىلىكسىز دايىندىعى جانە سۋ تاسقىنىنا قارسى ءىس-شارالاردى ۋاقىتىلى ىسكە اسىرماۋى اسەر ەتتى. مەملەكەت باسشىسى جەكەلەگەن لاۋازىمدى تۇلعالارعا قاتىستى تارتىپتىك شارالار قابىلدادى. قۇتقارۋ وپەراتسيالار كۇندىز-ءتۇنى جۇزەگە اسىرىلدى. بۇل ءۇشىن بۇرىن-سوڭدى بولماعان اۋە اۆياتسياسى تارتىلدى. تەمىر جول ارقىلى سۋ تاسقىنى كۇردەلى وڭىرلەرگە ارنايى جانە ينجەنەرلىك تەحنيكا جاپپاي تاسىمالداندى. جالپى 120 مىڭنان استام ادام قۇتقارىلدى، 35 ميلليون تەكشە مەتردەن استام سۋ سورىلدى، - دەپ ءتۇسىندىردى سالا ءمينيسترى.
بۇعان دەيىن سەنات ءتوراعاسىنىڭ ورىنباسارى جاقىپ اسانوۆ جىل سايىن تاسقىننىڭ سەبەبىمەن ەمەس، تەك سالدارىمەن كۇرەسە بەرسەك، ەشقانداي بيۋدجەتتىڭ اقشاسى جەتپەيتىنىن ايتقان ەدى.
ايتا كەتەيىك، ەلىمىزدىڭ 4 مينيسترلىگى بىرلەسىپ، سۋ تاسقىنىن بولجاۋعا جانە مودەلدەۋگە مۇمكىندىك بەرەتىن Tasqyn اقپاراتتىق جۇيەسىن ازىرلەۋدە. Tasqyn جۇيەسى بويىنشا العاشقى سۋ تاسقىنى بولجامى اقپان ايىندا جاريالانادى.
اۆتور
ايجان سەرىكجان قىزى