توت باسپايتىن بولاتتان جانە ەمالدانعان كاسترولدەردە پىسىرۋگە بولمايتىن تاعامدار
كوبىنەسە كاسترولدەر توت باسپايتىن بولاتتان، ەمالدان جانە اليۋمينيدەن جاسالادى. كاسترولدىڭ ءارتۇرلى ءتۇرى دەنساۋلىققا قانداي زيان تيگىزۋى مۇمكىن، ال تاعامعا قالاي اسەر ەتەدى؟ بۇل سۇراقتارعا ەلەنا پارەتسكايا جاۋاپ بەردى، - دەپ حابارلايدى doctorpiter.
توت باسپايتىن بولاتتان جاسالعان كاسترول جانە ونىڭ كەمشىلىكتەرى
بۇل كاسترولدىڭ ەڭ تانىمال ءتۇرى بولعانىمەن، ول اللەرگياسى بار ادامدار ءۇشىن زيان. سەبەبى توت باسپايتىن بولاتتا كۇشتى اللەرگەن، كانسەروگەندىك قاسيەتى بار نيكەل بار.
«مۇنداي كاسترولدە كوكونىس تاعامدارى مەن اشى تاعامداردى دايىنداۋعا بولمايدى، ويتكەنى كوكونىستەن شىققان شىرىن مەتالمەن ارەكەتتەسىپ، زيان نيكەل تۇزى پايدا بولادى»، - دەپ ءتۇسىندىردى ەلەنا پارەتسكايا.
ال توت باسپايتىن بولاتتان جاسالعان كاسترولدەردىڭ جابىسپايتىن جابىنى بار تۇرلەرى دە كەزدەسەدى. ولار سالىستىرمالى تۇردە قاۋپى از بولعانىمەن، مۇنداي كاسترولدە تاماق ساقتاۋعا بولمايدى.
«مۇنداي كاسترولدە قۋىرىلعان تاعامداردى، بورش، سورپا جانە قىشقىل تۇزدىقتاردى ساقتاۋ ۇسىنىلمايدى. ونىمدەگى قىشقىلدار مەتال، جابىنمەن ارەكەتتەسىپ، ۋلى قوسىلىستار تۇزەدى. سونىمەن قاتار، مەتالل وكسيدتەرى تاعامنىڭ ساپاسى مەن دامىنە تەرىس اسەر ەتۋى مۇمكىن»، - دەدى مامان.
ەمالدانعان كاسترولدەر
بۇل كاسترول تاماق ىدىستىڭ مەتالىنا ءتيىپ كەتپەۋى، اۋىر مەتالداردىڭ زياندى توتىقتارى مەن تۇزدارى پايدا بولماۋى ءۇشىن ويلاپ تابىلعان. مۇنداي كاسترول ىشكى جانە سىرتقى جاعىنان ەمال قاباتىمەن جابىلعان.
«كاسترول بەتى جابىلعان ەمالدىڭ ءتۇسى قارا، سۇر، كوك بولۋى شارت. ال باسقا ءتۇستى ەمالدار ادام دەنساۋلىعىنا قاۋىپ توندىرەدى. باسقا ءتۇستى ەمالدار قىزعان كەزدە ونىممەن بايلانىسىپ، قۇرامىنا ەنەدى، كەيىننەن اعزادا جينالىپ، جاعىمسىز سالدار تۋدىرادى. اسىرەسە قوڭىر، قىزىل جانە سارى ەمالمەن، سونداي-اق باسقا رەڭكتەرمەن جابىلعاندار اسا قاۋىپتى»، - دەيدى ول.
ەمال قاپتالعان كاسترول قانداي بولۋى كەرەك؟
ول تەگىس، جىلتىر، كۇڭگىرت جەرلەرى جانە ماي داقتارى بولماۋى شارت. ەگەر ەمال قاباتى قالىڭ بولسا، بۇل ءونىمنىڭ ساپاسى تومەن ەكەنىنىڭ بەلگىسى.
«ەمالمەن قاپتالعان كاسترولدە تاماق ساقتاۋعا بولادى، ءبىراق كاسترولدىڭ بىردە-ءبىر سىزىعى بولماۋى كەرەك. سونداي-اق، كاسترولدى مەتال قىلشاقپەن قىرىپ جۋۋعا مۇلدە بولمايدى، ودان دا كاسترولدى تۇز نەمەسە سودا قوسىلعان سۋعا تولتىرىپ، ءبىرشاما ۋاقىتقا قالدىرۋ كەرەك، كەيىن گۋبكامەن جۋعان ءجون»، - دەيدى مامان.
ەڭ قاۋىپتى كاسترولدەر
«اليۋمينيدەن جاسالعان كاسترولدەردە قىشقىل تاعام دايىنداۋعا بولمايدى، بۇل بورش، شي، قىمىزدىق سورپاسى، كومپوت. سەبەبى بۇل تاعامدارمەن كاسترولدەگى مەتال يوندارى ارەكەتتەسۋى مۇمكىن»، - دەپ قورىتىندىلادى ەلەنا پارەتسكايا.
