تورەعالي تورەالىنىڭ ادۆوكاتى: ءبىز اپەللياتسياعا بەرەمىز، قوعامدىق جۇمىسقا تارتۋعا كەلىسپەيمىز
ءانشى تورەعالي تورەالى الماتى كوشەلەرىنىڭ بىرىندە ۇستالعان ەدى. ونەر يەسىنىڭ ادۆوكاتى ەلنۋرا كىشكەنەبايەۆا ءبىرقاتار سۇراققا جاۋاپ بەردى.

ءانشىنىڭ قورعاۋشىسى ول كولىك تىزگىندەگەن كەزدە ەشقانداي ەسىرتكى قولدانباعانىن، ءتىپتى ساراپتاما قورىتىندىسىندا دا ەسىرتكى جوعى انىقتالعانىن ايتتى.
«ەسىرتكى قولدانعان جوق. ول اڭگىمە پوليتسيا تاراپىنان سۇيەنە وتىرىپ ايتىلعان. ءبىراق ەكسپەرتتىڭ بەرگەن قورىتىندىسىمەن ءبىز كەلىسپەي ءوزىمىز تاعى جەكە ساراپتاما تاعايىندادىق. ول قورىتىندى بويىنشا ەشقانداي ەسىرتكى جوق ەكەنىن ءبىز انىقتادىق. جاڭادان اشىلعان ءمان-جايلار بويىنشا سوتقا تالاپ ارىز بەرەمىز. بۇل جونىندە الداعى ۋاقىتتا قاراستىرامىز»، - دەيدى قورعاۋشى.
ادۆوكات ەلنۋرا كىشكەنەبايەۆا 40 ساعاتتىق جۇمىسقا تارتۋ جازاسىمەن كەلىسپەيتىندەرىن ايتتى.
«40 ساعاتتىق قوعامدىق جۇمىسقا تارتۋعا ءبىز كەلىسپەيمىز. تاعىلىپ وتىرعان ايىپ بيلىك وكىلىن قورلاۋ. دەگەنمەن مەنىڭ قورعاۋىمداعى ازاماتتىڭ ءىسى ارەكەتى بيلىك وكىلىن قورلاۋ بولىپ تابىلمايدى. بيلىك وكىلدەرىنە قارسى ەشقانداي قورلاۋ ءىس-ارەكەتتەرىن بايقاعان جوقپىز، كورگەن جوقپىز. ءتىپتى مەنىڭ قورعاۋىمداعى ازاماتتى پوليتسيا قىزمەتكەرلەرى توقتاتقان كەزدە ول كولىگىنەن ءتۇسىپ «اسسالاۋماعالەيكۇم» دەپ امانداسقان. ەگەر قورلاۋ، بالاعات بولسا ول سولاي قۇزىرلى ورگان وكىلدىرىنە سىيلاستىق تانىتار ما ەدى؟ بەينەجازبالاردى ءبىز سوت بارىسىندا كوردىك، ءبىراق ولاي ايتىلعان، قورلاۋ سوزدەرىن بايقامادىق»، - دەيدى ەلنۋرا كىشكەنەبايەۆا.
ول تەرگەۋ كەزىندە كوپتەگەن ءۋاج ايتىلماعانىن جەتكىزدى.
«تەرگەۋ كەزىندە ايتىلماعان ۋاجدەر كوپ. پوليتسيا تاراپىنان بەرىلگەن بەينەجەتوندار. ولار ونداعى ۆيدەودان وزدەرىنە ۇتىمدى جاعىن كورسەتكەن. ال بىزگە ۇتىمدى جاعى دۇرىس كورسەتىلمەگەن. سوتتا ءبىز بەينەجازبالاردى سۇراتقان كەزدە ناقتى پوليتسيا تاراپىنان زاڭسىز ءىس-ارەكەتتەرىن ءبىز بايقادىق»، - دەيدى ول.
سونداي-اق، قورعاۋشى سوت تولىق اياقتالماعانىن ايتتى.
«سوت مۇنىمەن تولىققاندى اياقتالعان جوق. الدا ءالى اپەللياتسيالىق شاعىم تۇسىرۋگە ابدەن قۇقىعىمىز بار. ءبىز قورعاۋىمىزداعى ازاماتتى اقتاپ، ونىڭ ەشقانداي كىناسى جوق ەكەنىن دالەلدەپ شىعۋعا ارەكەت جاسايمىز»، - دەيدى ول.
ادۆوكات ونەر ادامدارىن قورعاۋ قيىن ەمەس ەكەنىن دە جەتكىزدى.
«ونەر ادامىنا ادۆوكات بولۋ قيىن ەمەس. ولدا ءوزىمىز سەكىلدى قاراپايىم ادام. ەشقانداي ەركەلىگى جوق. بارلىعىن ءوز رەتىمەن قابىلداپ وتىردى. كەتكەن قاتەلىكتەرى بولسا، جازاسىن وتەپ وتىردى. زاڭ بارىنە ورتاق ەكەنىن ول جاقسى بىلەدى. زاڭعا باعىنادى. ال تىكەلەي مىنا قىلمىستىق ءىس بويىنشا كەلىسپەيتىن تۇستارىن ايتىپ ءوتتى»، - دەيدى ادۆوكات.
ايتا كەتەيىك، الماتىدا تانىمال ءانشى تورەعالي تورەالى ۇستالعان ۆيدەو تاراعان بولاتىن. كەيىنىرەك ونىڭ ەسىرتكىگە ماس بولىپ ۇستالعانى بەلگىلى بولدى.
ەسكە سالايىق، بۇعان دەيىن TikTok-تا ءانشى تورەعالي تورەالى بەلگىسىز ەر ادامدى ۇرىپ تاستاعان دەلىنگەن ۆيدەو تاراعانى حابارلانعان بولاتىن. كەيىنىرەك الماتى وبلىسى پوليتسيا دەپارتامەنتى باستىعىنىڭ تەرگەۋ بويىنشا ورىنباسارى رۋستام ءابدىراحمانوۆ بۇل ىسكە قاتىستى پىكىر بىلدىرگەن ەدى. سونىمەن قاتار، ءانشى ۋاقىتشا ۇستاۋ يزولياتورىنا قاماۋعا الىنعانى بەلگىلى بولدى.
كەيىن ءانشىنىڭ ءوزى دە جانجال نەدەن شىققانىن تۇسىندىرگەن. ونىڭ ايتۋىنشا، جاڭا كليپتىڭ ءتۇسىرىلىمى بارىسىندا جانجال شىققان. جابىرلەنۋشى ولاردان كوزىن الماي، جۇمىسىنا كەدەرگى كەلتىرگەن. ناتيجەسىندە جانجال سوڭى ءانشى تاراپىنان توبەلەسكە ۇلاسقان. ال كەيىن تورەعالي تورەالى سوققىعا جىققان جىگىتپەن تاتۋلاسقانى بەلگىلى بولدى. سونىمەن قاتار، ء ىس توقتاتىلدى.
«تورەعالي تورەالىگە قاتىستى ق ر قىلمىستىق كودەكسىنىڭ 293-بابى 1-بولىگى نەگىزىندە تىركەلگەن قىلمىستىق ءىس بويىنشا تاراپتار تاتۋلاسقانىن حابارلايمىز. ناتيجەسىندە قىلمىستىق ىسكە قاتىستى تەرگەۋ تاراپتاردىڭ تاتۋلاسۋىنا بايلانىستى توقتاتىلادى»، - دەلىنگەن پوليتسيا دەپارتامەنتى حابارلاماسىندا.
Massaget.kz