توقتاربەك تاڭاتقان ۇلى قىتايدىڭ ۇزدىك سپورتشىسى تىزىمىنە ەندى

قىتايدىڭ مەملەكەتتىك سپورت جانە دەنە شىنىقتىرۋ باس باسقارماسىنىڭ كادرلار مەكەمەسى حاڭجوۋدا وتكەن XIX ازيا ويىندارى جانە IV ازيا پارا ويىندارىنداعى ۇزدىك توپتار مەن ەڭ ۇزدىك سپورتشىلاردىڭ ءتىزىمىن جاريالادى. Kazinform بۇل تۋرالى قىتايدىڭ «ورتالىق حالىق راديوسىنا» سىلتەمە جاساپ حابارلايدى.

مەملەكەتتىك باس باسقارمانىڭ قويعان تالاپتارىنا ساي حاڭجوۋدا وتكەن XIX ازيا ويىندارى جانە IV ازيا پارا ويىندارىنداعى 96 توپ جانە 144 جەكە ازامات ۇزدىك سپورتشى تىزىمىنە ەندى.

سول ۇزدىك جەكە سپورتشىلاردىڭ ىشىندە شينجاڭنان ەكى سپورتشى تاڭداپ الىنعان. ونىڭ ءبىرى قانداسىمىز، قىتايلىق بوكسشى - توقتاربەك تاڭاتقان ۇلى.

اتاپ ايتقاندا، شينجاڭ ولكەلىك دەنە شىنىقتىرۋ مەكەمەسى بوكس سپورتىن باسقارۋ ورتالىعىنىڭ سپورتشىسى - توقتاربەك تاڭاتقان ۇلى، سونداي-اق شينجاڭ ولكەلىك دەنە شىنىقتىرۋ مەكەمەسى دەنە شىنىقتىرۋ №1-كومانداسىنىڭ سپورتشىسى - ابدۋحالىقجان ءمۇتالىپ.

ەستەرىڭىزگە سالا كەتەيىك، توقتاربەك قىتايداعى قازاقتار ءجيى قونىستانعان التاي ايماعى الاعاق قالاشىعىنا قارايتىن تارالاڭ دەگەن اۋىلدا 1996 -جىلى 18-قاراشادا دۇنيەگە كەلگەن.

ول 2017 -جىلى قازان ايىندا بوكستان قىتاي ۇلتتىق قۇراماسىنا قابىلدانعان.

توكيودا وتكەن وليمپيادا ويىندارىنا قاتىسقان قانداسىمىز «قىتايدىڭ بوكس كورولى» اتاعىن 2017، 2019، 2020 جانە 2021 -جىلدارى ءتورت رەت جەڭىپ العان. 2023 -جىلى تاشكەنتتە بوكستان الەم چەمپيوناتىنىڭ «كۇمىس» جۇلدەگەرى اتانعان، حاڭجوۋدا وتكەن XIX ازيا ويىندارىندا «التىن» مەدالدى ەنشىلەگەن بولاتىن.

اۆتور

بەيسەن سۇلتان