توقتار سەرىكوۆ: ماقتانعانىم ەمەس، ءتورت ۇلىمنىڭ ءتورت ءۇيىر جىلقىسى بار
استانا. قازاقپارات - تانىمال ءانشى، قازاقستاننىڭ ەڭبەك سىڭىرگەن قايراتكەرى توقتار سەرىكوۆ بالالارىنا بەرگەن ەنشىسى تۋرالى ايتتى.
ول بۇل تۋرالى «ايگەرىم سەيفوللانىڭ سىرلاسۋى» باعدارلاماسىندا ءسوز قوزعادى.
جۇلدىزدى جۇپ توقتار سەرىكوۆ پەن بەيبىت سەيدۋاليەۆا باعدارلامادا قوناق بولىپ، بالا تاربيەسى تۋرالى ايتىپ، استاناعا كوشپەي ءجۇرۋىنىڭ سەبەبىن ءبولىستى.
«استاناعا كوشكىمىز كەلىپ ەدى. ءبىراق استانا سۋىق. نەگىزى ءالى دە ەلورداعا كوشكىمىز كەلەدى. كوشپەۋىمىزدىڭ سەبەبى اۋا رايىندا ەمەس. قازىر بالالارىمىزدىڭ جاعدايىنا قاراپ كوشە الماي ءجۇرمىز. مىنا جاقتاعى مەكتەپكە باۋىر باسىپ قالدى جانە ۇستازدارى وتە مىقتى»، - دەدى توقتار سەرىكوۆ.
ءانشىنىڭ ايتۋىنشا، بالالارى قالادا وقىسا دا، اۋىلعا ءجيى بارادى ەكەن. ءتىپتى اۋىلدا ءۇيىر-ءۇيىر جىلقىسى بار كورىنەدى.
«بالالارىمدى اۋىلعا، اتقا جاقىن ەتىپ تاربيەلەگىم كەلەدى. قارا شاڭىراقتا ءىنىم عانا بار. بۇرىنعىداي اكە جوق، شەشە جوق. سوندا دا ءجيى بارىپ تۇرامىز. مەنى ماقتانىپ وتىر دەپ ويلاپ قالماسىن، ءبىراق ايتايىن. اۋىلدا شارۋاشىلىعىم بار. ءتورت ۇلىما ءتورت ءۇيىر جىلقى جىبەرىپ قويعانمىن. ءارقايسىسى ءوز ۇيىرىندە قانشا باس بارىن جاقسى بىلەدى. ەنشىلەپ، سولاي قويىپ قويعانىم بار. ونى دۇنيە، بايلىق رەتىندە ەمەس، يەسى مەن ەكەنمىن عوي، اكەمنىڭ ءبىر ىسىنە جارايدى ەكەنمىن عوي دەگەن ويى بولسىن دەپ جاساپ قويعانمىن. اساۋ ۇيرەتەتىن جاسقا جەتپەدى. ءبىراق باسقاسىنىڭ ءبارىن بىلەدى»، - دەدى توقتار سەرىكوۆ.
ونەر يەسى بالالارى ءۇشىن تەك جىلقى ەمەس، توبەت، تازى دا ساتىپ الىپتى.
«ۇلدارىمنىڭ ءبىر-ءبىر ءيتى بار، توبەت تە، تازى دا. ەندى بۇركىت، قارشىعاعا قىزىعىپ ءجۇر. ءبىراق بۇل جاعى قيىنداۋ بولىپ تۇر. ونى بالاداي باعۋ كەرەك. وعان مەنىڭ ۋاقىتىم جەتپەيدى. ءوزىم تاربيەنى اۋىلدان الدىم، سوندىقتان ەلگە جاقىن بولسىن دەپ جاساپ جاتىرمىن»، - دەدى ول.
ەسكە سالايىق، بيىل جازدا اۋىلعا بارىپ قايتقان ءانشى مارقۇم اناسىنا ارنالعان جانتەبىرەنتەرلىك جازبا جاريالاعان ەدى.
«اۋىلعا بارىپ قايتتىم. سول باياعى قالپىندا تۇر. تەك مەن ساعىنىپ باراتىن ادامداردىڭ تابىلماعانى بولماسا. التىندارىم-اي، ءبىر كورسەم ارمانىم بولماس ەدى عوي. اناشىمنىڭ جالعىز باۋىرى نۇرات ناعاشىما امانداسىپ قايتتىم. ناعاشىمدا قارتتىقتىڭ كەمەسىنە ءمىنىپ الىپتى، تۇسكىسى جوق. انامدى كورگەندەي، يىسكەپ، ماۋقىمدى باسقان بولدىم. اماندىعىڭدى تىلەيمىن، اللادان ناعاشى»، - دەپ جازعان ەدى ول.
