توقايەۆ ميۋنحەندە Alatau City مەگاجوباسىن تانىستىردى
استانا. KAZINFORM - پرەزيدەنت باۆاريانىڭ ىسكەرلىك توپ وكىلدەرىنىڭ نازارىن قازاقستاننىڭ اگروونەركاسىپ كەشەنىندەگى مول الەۋەتكە اۋداردى، دەپ جازدى اقوردا.
باۆاريا اۋىل شارۋاشىلىعىنا ارنالعان ماشينا جاساۋ، عىلىمي نەگىزدى ەگىن شارۋاشىلىعى، سۋ ۇنەمدەيتىن تەحنولوگيالار جانە تاماق ونەركاسىبى سالالارىندا وزىق قۇزىرەتكە يە. وسى ارتىقشىلىقتاردى ەسكەرە وتىرىپ، شاعىن ۇلگىلى شارۋاشىلىقتاردى دامىتۋعا قاتىستى ورتاق جوبانى ىسكە قوسۋ ۇسىنىلدى. بۇل باستاما اياسىندا ەۋروپا ستاندارتتارىنا ساي جوعارى ساپالى اگروونىمدەردى وندىرۋگە جانە وڭدەۋگە باسىمدىق بەرىلەدى.
بۇدان بولەك، قاسىم-جومارت توقايەۆ ميۋنحەندە بيزنەسكە، ينۆەستيتسيا مەن يننوۆاتسياعا ارنالعان بىرەگەي الاڭ رەتىندە Alatau City مەگاجوباسىن تانىستىردى.
باۆاريالىق كومپانيالار الاتاۋ قالاسىن ينجەنەرلىك جانە سەرۆيستىك بولىمشەلەرىن ورنالاستىراتىن، ۇزدىك شەشىمدەردى كورسەتەتىن، جەرگىلىكتى سەرىكتەس ىزدەپ، ينۆەستيتسيالىق جوبالاردى ىسكە اسىراتىن الاڭ رەتىندە قولدانا الادى.
پرەزيدەنت پايىمىنشا، اتالعان باستامالاردىڭ ءساتتى بولۋى، سايىپ كەلگەندە، بىلىكتى كادرلارعا بايلانىستى.
سوندىقتان قاسىم-جومارت توقايەۆ ەلىمىز باۆارياداعى كاسىپتىك ءبىلىم بەرۋدىڭ دۋالدى جۇيەسىنە قىزىعۋشىلىق تانىتاتىنىن مالىمدەدى. مەملەكەت باسشىسى قازاقستاندا باۆاريالىق ءىرى ونەركاسىپ جوبالارىن ىسكە اسىرۋ كەزىندە كاسىبي دايارلىق پەن ينجەنەرلىك قۇزىرەتتى دامىتۋدى ەسكەرگەن ءجون دەپ سانايدى.
مەملەكەت باسشىسى ءسوزىن قورىتا كەلە، الماتى قالاسىندا باۆاريا ەكونوميكاسىنىڭ وكىلدىگىن اشۋدى ۇسىندى. اتالعان مەكەمە قازاقستاندا عانا ەمەس، بۇكىل ورتالىق ازيادا نەمىس كاسىپورىندارىنىڭ مۇددەسى ءۇشىن جۇمىس ىستەي الادى.
ايتا كەتەيىك، باۆاريا بيزنەسى قازاقستانمەن ءوزارا ءتيىمدى كووپەراتسيانى دامىتۋعا قىزىعۋشىلىق تانىتتى.
