توقايەۆ پۋتيندى تاريحي قۇجاتقا قول قويىلعانىنا 20 -جىل تولۋىمەن قۇتتىقتادى
استانا. KAZINFORM - قاسىم-جومارت توقايەۆ ۆلاديمير پۋتيندى قازاقستان-رەسەي مەملەكەتتىك شەكاراسى تۋرالى شارتتىڭ قابىلدانعانىنا 20 جىل تولۋىمەن قۇتتىقتادى.

قاسىم-جومارت توقايەۆ 2005-جىلى 18-قاڭتاردا ماسكەۋدە قول قويىلعان قازاقستان-رەسەي مەملەكەتتىك شەكاراسى تۋرالى شارتقا 20 جىل تولۋىنا وراي رەسەي فەدەراتسياسىنىڭ پرەزيدەنتى ۆلاديمير پۋتينگە قۇتتىقتاۋ جەدەلحاتىن جولدادى.
«جالپىعا بىردەي حالىقارالىق قۇقىق نورمالارىن باسشىلىققا العان بۇل تاريحي قۇجات الەمدەگى ەڭ ۇزىن قۇرلىق شەكاراسىن قۇقىقتىق تۇرعىدان راسىمدەۋگە بەرىك نەگىز قالادى جانە ەلدەرىمىزدىڭ مىزعىماس دوستىعىنىڭ، تاتۋ كورشىلىك پەن وداقتاستىق قاتىناستارىنىڭ سيمۆولىنا اينالدى»، - دەپ جازىلعان قازاقستان پرەزيدەنتىنىڭ جەدەلحاتىندا.
مەملەكەت باسشىسى كورشىلەس ەكى ەلدىڭ سان قىرلى ىنتىماقتاستىعى الداعى ۋاقىتتا دا دامىپ، بەكي تۇسەتىنىنە سەنىم ءبىلدىردى.