توقايەۆ پۋتيندى قازاقستانعا مەملەكەتتىك ساپارمەن كەلۋگە شاقىردى
استانا. KAZINFORM - مەملەكەت باسشىسى قاسىم-جومارت توقايەۆ رەسەي پرەزيدەنتى ۆلاديمير پۋتينمەن كەزدەسۋ وتكىزدى.
اڭگىمە بارىسىندا مەملەكەت باسشىسى ش ى ۇ سامميتىنە قاتىسۋعا كەلگەنى ءۇشىن ۆلاديمير پۋتينگە ريزاشىلىعىن ءبىلدىردى. سونداي-اق رەسەيدىڭ «شاڭحاي رۋحىن» نىعايتۋ ىسىنە جانە ۇيىمعا مۇشە ەلدەرمەن كوپجاقتى ىنتىماقتاستىقتى دامىتۋعا ايتارلىقتاي ۇلەس قوسقانىن اتاپ ءوتتى.
— شاڭحاي ىنتىماقتاستىق ۇيىمىنا ءتوراعالىق ەتۋ - وتە مارتەبەلى ءارى جاۋاپتى ميسسيا. ەرتەڭ ءبىزدىڭ ءتوراعالىعىمىز اياسىندا اتقارىلعان جۇمىستار تۋرالى باياندايمىن. ۇيىمنىڭ وزىندە رەفورما جۇرگىزىلىپ جاتىر. ايتسە دە بۇل وڭاي شارۋا ەمەس. ش ى ۇ حالىقارالىق ارەنادا لايىقتى بەدەلگە يە بولدى. مەنىڭ ويىمشا، بۇل - ەڭ تابىستى حالىقارالىق ۇيىمداردىڭ ءبىرى. سونىمەن قاتار بۇل - دەموكراتيالىق سيپاتتاعى ۇيىم، ياعني بارلىق مەملەكەتتىڭ تەڭدىك قاعيداتى ساقتالادى. ارينە، شانحاي ىنتىماقتاستىق ۇيىمىنىڭ الەۋەتىن نىعايتۋعا رەسەيدىڭ قوسقان ەلەۋلى ۇلەسىن اتاپ وتپەسكە بولمايدى. وسى ورايدا ءتوراعا قۇقىعىن پايدالانىپ، سىزگە العىس ايتقىم كەلەدى، - دەدى پرەزيدەنت.
مەملەكەت باسشىسى ستراتەگيالىق سەرىكتەستىك پەن وداقتاستىققا نەگىزدەلگەن قازاق-رەسەي قاتىناستارىنىڭ قازىرگى جاي- كۇيى مەن دامۋ پەرسپەكتيۆاسى جونىندە ايتتى.
قاسىم-جومارت توقايەۆ ۆلاديمير ءپۋتيننىڭ قازاقستانعا بىلتىر قاراشا ايىندا جاساعان تاريحي ساپارىنان كەيىن ەكىجاقتى ىنتىماقتاستىق قارقىندى دامىپ كەلە جاتقانىنا نازار اۋداردى.
- بۇعان دەيىن قول جەتكىزىلگەن ۋاعدالاستىقتاردىڭ جۇزەگە اسىرىلۋ بارىسىن ءوز باقىلاۋىمدا ۇستاپ وتىرمىن. ءسىزدىڭ ساپارىڭىز كەزىندە كەلىسىلگەن جوبالاردىڭ ماڭىزى زور جانە ەلدەرىمىزدىڭ ءوزارا ىقپالداستىعىنىڭ ستراتەگيالىق سيپاتىمەن ۇشتاسادى. سوندىقتان ولاردىڭ جۇزەگە اساتىنىنا ەش كۇمانىم جوق. ويتكەنى بۇل جوبالار قازاقستان مەن رەسەي فەدەراتسياسىنىڭ مۇددەسىنە ساي كەلەدى، - دەدى مەملەكەت باسشىسى.
قاسىم- جومارت توقايەۆ ۆلاديمير ءپۋتيندى بيىل كۇزدە ەلىمىزگە تاعى دا مەملەكەتتىك ساپارمەن كەلۋگە، سونىمەن بىرگە ۇقشۇ ۇجىمدىق قاۋىپسىزدىك كەڭەسىنىڭ وتىرىسىنا قاتىسۋعا شاقىردى.
ۆلاديمير پۋتين شىۇ سامميتىنە قاتىسۋعا شاقىرعانى ءۇشىن قاسىم- جومارت توقايەۆقا العىس ايتىپ، قازاقستان وسى ماڭىزدى ءىس- شارانىڭ دايىندىعىنا ايتارلىقتاي كۇش سالعانىن جەتكىزدى.
— سامميت، شىن مانىندە، مازمۇنى جاعىنان حالىقارالىق سيپاتقا يە. ەلدەرىمىزدىڭ ءبىرقاتار حالىقارالىق ۇيىمعا ءتوراعالىق ەتىپ وتىرعانىن اتاپ وتكىم كەلەدى. قازاقستان ش ى ۇ مەن ۇ ق ش ۇ- عا، ال رەسەي ب ر ي ك س پەن ت م د- عا ءتوراعا بولىپ وتىر. سوندىقتان ءبىر-ءبىرىمىزدى قولداپ، كومەكتەسەمىز. قازاقستانعا مەملەكەتتىك ساپارمەن كەلۋگە شاقىرعانىڭىز ءۇشىن العىس ايتامىن. البەتتە، مۇنى ۇ ق ش ۇ سامميتىنە ورايلاستىرعان تيىمدىرەك بولار ەدى. ەكىجاقتى قارىم- قاتىناسىمىزعا كەلەر بولساق، سىزدەرمەن ۇنەمى بايلانىستامىز. ەلدەرىمىز اراسىنداعى تاۋار اينالىمى ارتىپ، شامامەن 30 ميلليارد دوللارعا جەتتى. بۇل - وتە جاقسى كورسەتكىش. رەسەي قازاقستاننىڭ نەگىزگى ساۋدا- ەكونوميكالىق سەرىكتەستەرىنىڭ ءبىرى بولىپ قالا بەرەدى، - دەدى رەسەي پرەزيدەنتى.
كەزدەسۋدە پرەزيدەنتتەر ونەركاسىپتىك كووپەراتسيانى، ەنەرگەتيكا سالاسىنداعى ءوزارا ءتيىمدى سەرىكتەستىكتى دامىتۋ جانە ءوڭىرارالىق بايلانىستاردى جانداندىرۋ پەرسپەكتيۆالارىن جان-جاقتى تالقىلادى. تاراپتار ەكىجاقتى جانە كوپجاقتى فورماتتاعى تۇراقتى ساياسي ديالوگتى ساقتاۋعا ءوزارا نيەتتى ەكەنىن راستادى.
ەسكە سالا كەتەيىك، كەشە رەسەي پرەزيدەنتى ۆلاديمير پۋتين شىۇ سامميتىنە قاتىسۋ ءۇشىن قازاقستانعا كەلگەن بولاتىن.
ول بۇگىن ەلوردادا بىرنەشە ەلدىڭ پرەزيدەنتىمەن كەلىسسوز جۇرگىزدى.
تۇرىك پرەزيدەنتى رەجەپ تايپ ەردوعان ۆلاديمير پۋتيندى جاقىن ارادا تۇركياعا ساپارلاپ كەلۋگە شاقىردى.
