توقايەۆ سۋ تاسقىنىنا قارسى ءىس- شارالاردى ۇيلەستىرۋ رەسپۋبليكالىق شتابىنىڭ وتىرىسىن وتكىزدى
استانا. KAZINFORM - مەملەكەت باسشىسى سۋ تاسقىنىنا قارسى ءىس- شارالاردى ۇيلەستىرۋ جانە سۋ تاسقىنى سالدارىن جويۋ جونىندەگى رەسپۋبليكالىق شتابتىڭ وتىرىسىن وتكىزدى.
قاسىم-جومارت توقايەۆ قازىرگى ۋاقىتتا احۋال ءالى دە وتە كۇردەلى ەكەنىن اتاپ ءوتتى.
ونىڭ ايتۋىنشا، بەس ايماقتا، ياعني اتىراۋ، باتىس قازاقستان، شىعىس قازاقستان، اقمولا جانە سولتۇستىك قازاقستان وبلىستارىندا سۋ تاسقىنىنىڭ ەكىنشى تولقىنى بولۋى مۇمكىن.
قالعان التى وبلىستا، اتاپ ايتقاندا، قوستاناي، قاراعاندى، اقتوبە، اباي، پاۆلودار، ۇلىتاۋدا جاعداي تۇراقتالا باستاعان.
مەملەكەت باسشىسى ادامداردى دەر كەزىندە قاۋىپسىز جەرگە كوشىرۋ جانە قارعىن سۋدان زارداپ شەككەن ازاماتتارعا قاجەتتى كومەك بەرۋ قازىرگى باستى مىندەت ەكەنىنە نازار اۋداردى.
پرەزيدەنت ءوزىنىڭ تاپسىرماسى بويىنشا مەملەكەتتىك ماتەريالدىق رەزەرۆتەن ارناۋلى تەحنيكا جانە باسقا دا جابدىقتار الۋعا رۇقسات ەتىلگەنىن ايتتى.
- مەن شىعىندى وتەۋ ءۇشىن ءتيىمدى تاسىلدەر قاراستىرۋ جونىندە ناقتى تاپسىرما بەردىم. بۇل ماقساتقا بيۋدجەت قاراجاتىمەن قاتار «قازاقستان حالقىنا» قورى مەن ءىرى بيزنەس وكىلدەرى بولگەن قارجى جۇمسالادى. سونداي- اق تاعى ءبىر وتە ماڭىزدى ماسەلە. بۇل - سۋ باسقان ايماقتارداعى ەپيدەميولوگيالىق احۋال. جاعدايدى قاتاڭ باقىلاۋدا ۇستاۋ قاجەت. كوكتەمگى ەگىس ناۋقانىنا دا دايىندالۋ كەرەك. سۋ استىندا قالعان ەلدى مەكەندەردە ەشقانداي زاڭ بۇزۋشىلىققا جول بەرمەۋ قاجەت. مەنىڭ تاپسىرماممەن ۇكىمەت باسشىسى جانە ونىڭ ورىنباسارلارى قازىر ايماقتاردا ءجۇر. ولار جاعداي تۇراقتالعانشا بارلىق جۇمىستى ۇيلەستىرەدى، ەلمەن بىرگە بولادى، - دەدى قاسىم-جومارت توقايەۆ.
مەملەكەت باسشىسى تابيعي اپاتتان زارداپ شەككەن ايماقتارداعى ازىق-تۇلىك قاۋىپسىزدىگى ماسەلەسىن ايرىقشا باقىلاۋدا ۇستاۋ جانە باعانىڭ وسۋىنە جول بەرمەۋ قاجەت ەكەنىنە تاعى دا نازار اۋداردى.
سونداي- اق ازاماتتار ءۇشىن اۋە جانە تەمىر جول كولىكتەرىنە بيلەتتىڭ قىمباتتاۋىنا جول بەرۋگە بولمايتىنىن ەسكەرتتى.
- ۇكىمەت پەن اكىمدىكتەر زارداپ شەككەن ادامداردى ورنالاستىرۋ، ولارعا قاجەتتى كومەك بەرۋ ماسەلەلەرىن تەز ارادا شەشۋگە ءتيىس. قازىر بۇل جۇمىستار اتقارىلىپ جاتىر. ەۆاكۋاتسيالىق پۋنكتتەردەگى جاعدايدى تۇراقتى باقىلاۋدا ۇستاۋ كەرەك. جوعالعان قۇجاتتاردى قالپىنا كەلتىرۋ، قۇقىقتىق جانە پسيحولوگيالىق كومەك كورسەتۋ پۋنكتتەرىن جەدەل ۇيىمداستىرۋ قاجەت. ايتپاقشى، جوعالعان قۇجاتتار دا پروبلەما بولادى. ادامدار ۇيلەرىن اسىعىس تاستاپ كەتتى. قۇجاتتارىن قالپىنا كەلتىرۋگە كومەكتەسۋ كەرەك. جاعداي وتە كۇردەلى اۋدانداردا قوعامدىق شتابتار ورنالاستىرىلىپ، ءتۇسىندىرۋ جۇمىستارى جۇرگىزىلسىن، - دەدى پرەزيدەنت.
جيىن بارىسىندا دەنساۋلىق ساقتاۋ مينيسترلىگىنە اۋىل شارۋاشىلىعى مينيسترلىگىمەن بىرگە ەلىمىزدەگى سانيتاريالىق-ەپيدەميولوگيالىق جانە ەپيزووتيالىق جاعدايعا باقىلاۋدى كۇشەيتىپ، تاۋلىك بويى مونيتورينگ جۇرگىزۋ، سونداي-اق كوپپاتەرلى ۇيلەرگە، الەۋمەتتىك جانە باسقا دا نىساندارعا دەزينفەكتسيا جاساۋ جونىندە تاپسىرما بەرىلدى.
سۋ تاسقىنىنا بايلانىستى جۇقپالى اۋرۋلاردىڭ تارالىپ جاتقانى جانە ەپيدەميولوگيالىق جاعدايدىڭ ناشارلاعانى تۋرالى الەۋمەتتىك جەلىلەردە جاريالانعان اقپارات راستالمادى.
ونەركاسىپ جانە قۇرىلىس مينيسترلىگىنە تۇرعىن ۇيلەردى، الەۋمەتتىك ينفراقۇرىلىمدى، كوممۋنالدىق شارۋاشىلىق نىساندارىن قايتا قالپىنا كەلتىرۋ جۇمىستارىن ۇيلەستىرۋ ءۇشىن جەدەل توپ جاساقتاۋ جونىندە تاپسىرما بەرىلدى
- سۋ باسقان وڭىرلەردىڭ اكىمدەرى قاجەتتى قارجىلاندىرۋ تۋرالى ەسەپتى جەدەل شتابقا تەز ارادا بەرۋى كەرەك. سونداي- اق اۋماقتى قوقىستان، قيراعان ۇيلەر مەن قۇرىلىستاردىڭ ۇيىندىلەرىنەن تازارتقان ءجون. زارداپ شەككەن وڭىرلەرگە اۋىل شارۋاشىلىعى، كولىك، دەنساۋلىق ساقتاۋ، سۋ رەسۋرستارى، توتەنشە جاعدايلار، ەكولوگيا، عىلىم جانە جوعارى ءبىلىم ۆيتسە-مينيسترلەرىن جىبەرۋ قاجەت. ايتپاقشى، سۋ تاسقىنىنا ۇشىراماعان وڭىرلەردە مەنىڭ تاپسىرماممەن «تازا قازاقستان» ناۋقانى باستالدى. مەن اكىمدەردىڭ بارىنە بۇل بىررەتتىك ناۋقان ەمەس ەكەنىن ەسكەرتتىم. باسقاشا ايتقاندا، سەنبىلىككە شىعىپ، جۇمىس ىستەگەن سىڭاي تانىتىپ، كوزبوياۋشىلىق جاساۋعا بولمايدى. كورشىلەس ەلدەردەگى سەكىلدى بىزگە دە قازاقستاندى كوگالداندىرۋ، وڭىرلەر مەن قالالاردىڭ اۋماقتارىن تازارتۋ جۇمىستارىن ۇنەمى جۇرگىزۋ كەرەك، - دەدى قاسىم-جومارت توقايەۆ.
مەملەكەت باسشىسى ازاماتتار ءۇشىن تۇرعىن ۇيلەردى قالپىنا كەلتىرۋ جۇمىستارىنا ناقتى ۋاقىت رەجيمىندە مونيتورينگ جۇرگىزۋ جونىندە تاپسىرما بەردى.
سونداي-اق جىل سوڭىنا دەيىن سۋ تاسقىنىنا قارسى شارالاردى باسقارۋدىڭ ۇزاقمەرزىمدى ستراتەگياسىن انىقتاپ، ءتيىستى باعدارلامالىق قۇجاتتاردى قابىلداۋ مىندەتىن جۇكتەدى.
جيىن بارىسىندا پرەمەر- مينيستر ولجاس بەكتەنوۆ، توتەنشە جاعدايلار ءمينيسترى شىڭعىس ءارىنوۆ، ونەركاسىپ جانە قۇرىلىس ءمينيسترى قانات شارلاپايەۆ، دەنساۋلىق ساقتاۋ ءمينيسترى اقمارال ءالنازاروۆا، اۋىل شارۋاشىلىعى ءمينيسترى ايداربەك ساپاروۆ، اتىراۋ وبلىسىنىڭ اكىمى سەرىك شاپكەنوۆ، اقتوبە وبلىسىنىڭ اكىمى اسحات شاحاروۆ، باتىس قازاقستان وبلىسىنىڭ اكىمى ناريمان تورەعالييەۆ، قوستاناي وبلىسىنىڭ اكىمى قۇمار اقساقالوۆ، سولتۇستىك قازاقستان وبلىسىنىڭ اكىمى عاۋەز نۇرمۇحامبەتوۆ، شىعىس قازاقستان وبلىسىنىڭ اكىمى ەرمەك كوشەربايەۆ، ماڭعىستاۋ وبلىسىنىڭ اكىمى نۇرلان نوعايەۆ بايانداما جاسادى.
