توقايەۆ قازاقستاننىڭ ۋكرايناداعى جاعدايعا قاتىستى ۇستانىمىن ءتۇسىندىردى
استانا. KAZINFORM - بەرليندە گەرمانيا كانسلەرى فريدريح مەرتسپەن كەلىسسوزدەر قورىتىندىسى بويىنشا وتكەن باسپا ءسوز ءماسليحاتىندا قازاقستان پرەزيدەنتى قاسىم-جومارت توقايەۆ ۆلاديمير پۋتيندى «كورنەكتى مەملەكەت قايراتكەرى» دەپ سانايتىنىن ايتتى، دەپ حابارلايدى Kazinform.
- وسى ماسەلەگە قاتىستى جەكە ۇستانىمىمدى تۇسىنىستىكپەن قابىلداعانى ءۇشىن پرەزيدەنت پۋتينگە ريزاشىلىعىمدى بىلدىرەمىن. ويتكەنى ءبارىمىز، مەملەكەت باسشىلارى، سونىڭ ىشىندە رەسەي پرەزيدەنتى دە ۋكراينا اۋماعىنداعى اسكەري قيمىلداردى توقتاتۋدى قولدايمىز. پرەزيدەنت پۋتينمەن قارىم-قاتىناسىم وتە جاقسى. مەن ونى كورنەكتى مەملەكەت قايراتكەرى دەپ سانايمىن، - دەدى توقايەۆ.
سونداي-اق ول پۋتيندى ورتالىق ازيا، سونىڭ ىشىندە قازاقستان ءۇشىن، ەۋروپا جانە بۇكىل الەم ءۇشىن وڭتايلى تۇلعا دەپ سانايتىنىن ايتتى.
- مەن ونى وتە جاقسى بىلەمىن. ونىڭ بويىنان تاريحى قىم-قيعاش الىپ ەلدىڭ باسشىسىنا ءتان قاسيەتتەردىڭ ءبارى تابىلادى. ارينە، ءبارىمىز ۋكراينادا بولىپ جاتقان جاعدايعا الاڭدايمىز،- دەدى پرەزيدەنت ARD تەلەارناسىنىڭ سۇراعىنا جاۋاپ بەرە وتىرىپ.
مەملەكەت باسشىسى قازاقستاننىڭ اۋەل باستان بىرىككەن ۇلتتار ۇيىمى جارعىسىنىڭ ەرەجەلەرىن ۇستانىپ كەلە جاتقانىن اتاپ ءوتتى.
- ءبىز بارلىق مەملەكەتتىڭ اۋماقتىق تۇتاستىعى قاعيداتىن ساقتاۋعا جانە قۇرمەتتەۋگە ۇندەپ كەلەمىز. ۋكراينا حالقىنا، ونىڭ تاريحىنا، مادەنيەتى مەن داستۇرىنە، تىلىنە زور قۇرمەتپەن قارايتىنىمىزدى بۇرىننان ايتىپ ءجۇرمىز. مەن سوعىستى دەرەۋ توقتاتۋ تۋرالى ايتپادىم. قازىرگى جاعدايدا مۇنىڭ وڭاي ەمەس ەكەنىن تۇسىنەمىن. مەنىڭ مەڭزەگەنىم: ۋكراينا اۋماعىنداعى اسكەري ءىس-قيمىلدى ۋاقىتشا دوعارىپ، ديپلوماتيالىق پروتسەسكە كوشۋ نەمەسە قانداي دا ءبىر كەلىسسوز باستاۋ ەدى، - دەدى قازاقستان پرەزيدەنتى.
ول رەسەي دە، ۋكراينا دا قازاقستاننىڭ جاقسى دوستارى ەكەنىن اتاپ ءوتتى.
- رەسەيگە قاتىستى قازاقستان مەن رەسەي اراسىندا ۇزىندىعى 7597 شاقىرىم بولاتىن ورتاق شەكارا بار ەكەنىن ۇمىتپاۋ كەرەك. بۇل - الەمدەگى ەڭ ۇزىن شەكارا. بۇل وسى ەلمەن دوستىق قارىم-قاتىناستى دامىتۋعا اسەر ەتەتىن فاكتور ەمەس پە؟ قازاقستان اۋماعىندا ەلىمىزدىڭ 2,7 ميلليون رەسەيلىك ەتنوس وكىلى تۇرادى. ەلىمىزدە پراۆوسلاۆ شىركەۋى دە بار، ءبىز وعان ۇلكەن قۇرمەتپەن قارايمىز. سوندىقتان وسى جايتتاردىڭ بارلىعىن ەسكەرۋ قاجەت. ماسەلەگە بىردەن كەسىپ شەشىم شىعارۋعا بولمايدى.
قازاقستانعا بەيبىتشىلىك پەن تۇراقتىلىق قاجەت. ونسىز ءبىز ەشقاشان تابىستى ەل بولا المايمىز. قازىر ءبىز دامۋىمىزدا ەلەۋلى جەتىستىكتەرگە جەتىپ كەلەمىز. كورسەتكىشتەر العا قاراي ىلگەرىلەۋ بار ەكەنىن نانىمدى كورسەتىپ وتىر. سوندىقتان پرەزيدەنت رەتىندە ەلىمىزدە بەيبىتشىلىك پەن تۇراقتىلىقتى قامتاماسىز ەتۋ ءۇشىن قولدان كەلگەننىڭ ءبارىن جاسايمىن. بۇل قازاقستانمەن كورشىلەس اۋماقتا بەيبىتشىلىككە قول جەتكىزۋگە جانە سوعىستى توقتاتۋعا قولدان كەلگەنشە ۇلەس قوسۋ ءۇشىن قاجەت،- دەدى مەملەكەت باسشىسى.
ايتا كەتەلىك قاسىم-جومارت توقايەۆ گەرمانياعا رەسمي ساپارمەن باردى. سونىمەن قاتار قاسىم-جومارت توقايەۆ پەن فرانك-ۆالتەر شتاينمايەر بىرلەسكەن دەكلاراتسيا قابىلدادى. سونداي- اق پرەزيدەنت قاسىم-جومارت توقايەۆ كانتسلەر فريدريح مەرتسپەن كەلىسسوز جۇرگىزدى.
