توقايەۆ پەن حۋرەلسۇح قازاقستان مەن موڭعوليانى جالعايتىن اۆتوجول سالۋعا كەلىستى

- ءبىز ەجەلدەن توردە باسى، توسكەيدە مالى قوسىلعان، ىرگەسى اجىراماعان جۇرتپىز. دەگەنمەن، ەلدەرىمىز شەكارالاس ەمەس. سوندىقتان كولىك- تاسىمال سالاسىنداعى ىنتىماقتاستىعىمىز كورشىلەرىمىزگە تىكەلەي بايلانىستى. جول ەكى ەل اراسىنداعى ءوزارا بايلانىس كوزى، تىعىز قارىم-قاتىناس كەپىلى ەكەنى بەلگىلى. ءبىز بۇل ماسەلەنىڭ اسا وزەكتى ەكەنىن جاقسى ءتۇسىنىپ وتىرمىز. سوندىقتان حۋرەلسۇح مىرزا ەكەۋىمىز قازاقستان مەن موڭعوليا اراسىندا توتە جول اشۋعا مۇددەلى ەكەنىمىزدى راستادىق. كەزدەسۋ بارىسىندا ەلدەرىمىزدى جالعايتىن اۆتوكولىك جولىن سالۋ جونىندە ورتاق كەلىسىمگە قول جەتكىزدىك، - دەدى قاسىم-جومارت توقايەۆ.

پرەزيدەنتتىڭ ايتۋىنشا، بۇل جان-جاقتى ساراپتاپ، مۇقيات زەردەلەۋدى قاجەت ەتەتىن كۇردەلى ماسەلە.

- دەسەك تە، ەڭ باستىسى جول قۇرىلىسى بويىنشا ماقساتىمىز ءبىر. سول سەبەپتى ءبىز قۇرمەتتى پرەزيدەنت مىرزامەن جاسالعان ۋاعدالاستىققا سايكەس، الدىمەن بىرلەسكەن ۇكىمەتارالىق جۇمىس توبىن قۇرۋ تۋرالى شەشىمگە كەلدىك. اتالعان جۇمىس توبى وسى ماسەلە بويىنشا بارلىق تۇيتكىلدى قارايدى. كورشىلەس ەلدەرمەن كەلىسسوزدەر جۇرگىزەدى جانە جالپى جوبانىڭ ۋاقىتى ورىندالۋىن قاداعالايدى. الداعى ۋاقىتتا قازاقستان-موڭعوليا اۆتوجولى ەلدەرىمىزدىڭ اراسىنداعى ساۋدا- ساتتىقتى ارتتىرۋعا ەرەكشە سەرپىن بەرەتىنى انىق. بۇل جولدىڭ يگىلىگىن ىرگەلەس ەلدەر دە كورەتىن بولادى، - دەدى مەملەكەت باسشىسى.

قاسىم-جومارت توقايەۆ بىلتىر قىتايدا وتكەن شاڭحاي ىنتىماقتاستىق ۇيىمىنىڭ سامميتىندە ترانسالتاي سۇحبات الاڭىن قۇرۋدى ۇسىنعانىن ەسكە سالدى.

- التايدىڭ 4 جاعىن مەكەن ەتكەن مەملەكەتتەردىڭ ساۋدا، كولىك-لوگيستيكا، تۋريزم، مادەنيەت سالاسىنداعى ماسەلەلەر بويىنشا ورتاق مامىلەگە كەلۋىنە تولىق مۇمكىندىك بار. وسى رەتتە 4 ەلدىڭ كولىك-لوگيستيكا الەۋەتىن ءبىر ارناعا توعىستىرىپ، بىرلەسە جۇمىس ىستەي الامىز. بۇل قادام الىس-بەرىستى عانا ەمەس، التاي بىرەگەي تۋريستىك كلاستەرىن دامىتۋعا جول اشادى، - دەدى پرەزيدەنت.

بۇعان دەيىن قاسىم-جومارت توقايەۆ اقوردادا موڭعوليا پرەزيدەنتىن قارسى العانىن جازعان ەدىك.