توقايەۆ موڭعول ءانشىسىنىڭ Silk Way Star كونكۋرسىندا كورەرمەننىڭ ىقىلاسىنا بولەنگەنىن ايتتى
استانا. KAZINFORM - بيىل موڭعوليادا Study in Kazakhstan ءبىلىم جارمەڭكەسى وتكىزىلەدى. بۇل تۋرالى اقوردادا موڭعوليا پرەزيدەنتى ۋحنااگين حۋرەلسۇحپەن كەلىسسوزدەردەن كەيىنگى بىرلەسكەن مالىمدەمە بارىسىندا مەملەكەت باسشىسى قاسىم-جومارت توقايەۆ ايتتى.
- كەلىسسوز بارىسىندا مادەني-گۋمانيتارلىق بايلانىسقا دا ءمان بەردىك. بىلتىر استانادا وتكەن Silk Way Star حالىقارالىق ۆوكالدىق كونكۋرسىندا موڭعوليا ءانشىسى، اتى - ميشەل ءبىرىنشى ورىن الىپ، كورەرمەننىڭ ىستىق ىقىلاسىنا بولەندى. مۇنداي جوبالار حالىقتارىمىزدىڭ عاسىرلار بويى قالىپتاسقان رۋحاني بايلانىسىن بەكەمدەيتىنى ءسوزسىز، - دەدى مەملەكەت باسشىسى.
سونداي-اق پرەزيدەنت ەلدەرىمىزدىڭ ءبىلىم، عىلىم سالاسىنداعى ىنتىماقتاستىعىن نىعايتۋعا مول مۇمكىندىك بار ەكەنىن ايتتى.
- قازاقستان موڭعول ازاماتتارىنا ءبىلىم گرانتتارىن ءبولىپ كەلەدى. ءبىز گرانت سانىن كوبەيتىپ، موڭعولياعا قاجەتتى مامانداردى دايىنداۋ ىسىنە اتسالىسۋعا ءازىرمىز. بيىل موڭعوليادا Study in Kazakhstan ءبىلىم جارمەڭكەسىن وتكىزۋ جوسپارلانىپ وتىر. سونىمەن قاتار ءبىز ۇلانباتىر قالاسىندا قازاقستاننىڭ ىرگەلى ۋنيۆەرسيتەتىنىڭ فيليالىن اشۋدى ۇسىندىق. بۇعان قوسا ەكى ەلدىڭ اراسىنداعى باۋىرلاستىق قارىم-قاتىناستى ودان ارى دامىتۋعا كەلىستىك. بۇل شارالار ەلدەرىمىزدىڭ دوستىعىن بەكەمدەۋگە، ساۋدا-ەكونوميكالىق جانە مادەني-گۋمانيتارلىق بايلانىستى كۇشەيتۋگە جول اشادى. وسى جۇمىستى جالعاستىرا بەرۋ ماڭىزدى دەپ سانايمىن، - دەدى قاسىم-جومارت توقايەۆ.
ايتا كەتەيىك، وتكەن جىلدىڭ قاراشاسىندا «Silk Way Star» حالىقارالىق جوباسىنىڭ گراند-فينالى مارەسىنە جەتىپ، جوبانىڭ جەڭىمپازى ميشەل دجوزەف (موڭعوليا) بولعان ەدى.
