توقايەۆ ۇكىمەت ۇسىنعان شارالار تۋرالى: بيۋدجەتتى ۇلتتىق قوردان قوسىمشا قارجى الماي-اق تولىقتىرۋعا مۇمكىندىك بەرەدى
استانا. KAZINFORM - پرەزيدەنت قاسىم-جومارت توقايەۆ ۇكىمەتتىڭ كەڭەيتىلگەن وتىرىسىندا بيۋدجەت جانە سالىق كودەكستەرىن جەدەل قابىلداۋدى تاپسىردى.

- جاڭا ءوندىرىس ورىندارىن اشۋ، ينفراقۇرىلىمدى دامىتۋ جانە ۇدەرىستەردى سيفرلاندىرۋ ءۇشىن ينۆەستور قارجىسىن تارتۋ قاجەت ەكەنى تۇسىنىكتى. ءبىر جاعىنان مەملەكەت تە ەكونوميكاعا سالىناتىن ينۆەستيتسيا كولەمىن ۇلعايتا بەرەدى. سوندىقتان ۇكىمەت بارلىق قارجىنى باستى باسىمدىقتارعا ساي ءبولۋى كەرەك. بۇل - ۇكىمەت پەن اكىمدەر بۇلجىتپاي ورىنداۋعا ءتيىس نەگىزگى بيۋدجەت قاعيداتىنىڭ ءبىرى. ەلىمىزدە جاڭا ءارى بارىنشا قاتاڭ بيۋدجەت ەرەجەلەرى قولدانىسقا ەنگىزىلگەنىنە ەكى جىل بولدى. الايدا، شىن مانىندە، بۇل جۇيە جۇمىس ىستەپ تۇرعان جوق. نەلىكتەن ولاي بولدى؟ وعان ۇكىمەت ءوزى جاۋاپ بەرۋگە ءتيىس، - دەدى پرەزيدەنت.
قاسىم-جومارت توقايەۆ ترانسفەرتتەردى ەسەپتەگەن كەزدە بارلىق ديسپروپورتسيانى ەسكەرۋ ماڭىزدى ەكەنىن اتاپ ءوتتى.
- ۇكىمەت ۇسىنعان شارالار بيۋدجەتتى ۇلتتىق قوردان قوسىمشا قارجى الماي-اق تولىقتىرۋعا مۇمكىندىك بەرەدى. ءبىراق ناقتى ەسەپتەپ، جاناما فاكتورلاردىڭ ءبارىن ەسكەرۋ كەرەك. سول سەبەپتى جاڭا بيۋدجەت جانە سالىق كودەكستەرىن تىڭعىلىقتى ازىرلەپ، قىسقا مەرزىمدە قابىلداۋ مىندەتى تۇر. مەملەكەت قارجىسىن بارلىق دەڭگەيدەگى بيۋدجەتكە راتسيونالدى ءارى ءادىل ءبولۋدىڭ ماڭىزى زور. ءتىپتى اۋىلدىق وكرۋگتەرگە دەيىن قامتىلۋعا ءتيىس. جالپى سيپاتتاعى ترانسفەرتتەردى ەسەپتەگەن كەزدە بارلىق ديسپروپورتسيانى ەسكەرگەنىمىز ءجون. رەسپۋبليكالىق بيۋدجەتتەن، ەڭ الدىمەن، كەنجەلەپ قالعان بەلگىلى ءبىر ءوڭىردى جالپى ەلدىڭ دامۋ دەڭگەيىنە جاقىنداتاتىن جوبالار قارجىلاندىرىلۋعا ءتيىس. ايتسە دە بارشا ايماقتىڭ ماسەلەلەرى مەن قاجەتتىلىكتەرى ۇكىمەتتىڭ ءجىتى نازارىندا بولۋى كەرەك. وڭىرلەردىڭ دامۋ قارقىنى باسەڭدەۋىنە جانە الەۋمەتتىك- ەكونوميكالىق جاعدايدىڭ ناشارلاۋىنا مۇلدەم جول بەرۋگە بولمايدى، - دەدى قاسىم-جومارت توقايەۆ.
ايتا كەتەيىك ەلوردادا پرەزيدەنت قاسىم-جومارت توقايەۆتىڭ توراعالىعىمەن ۇكىمەتتىڭ كەڭەيتىلگەن وتىرىسى ءوتىپ جاتىر. ءىس-شارانى اشقان پرەزيدەنت ۇكىمەت پەن اكىمدەر جۇمىسىنىڭ تيىمدىلىگى ازاماتتاردىڭ تۇرمىس ساپاسىنا قاراي باعالاناتىن ايتتى. سونىمەن قاتار، مەملەكەت باسشىسى ۇكىمەت الەۋمەتتىك كومەك ماسەلەسىنە كەلگەندە تىم ساقتىق تانىتىپ وتىرعانىن ايتقان ەدى.