توقايەۆ: 2024 - ايرىقشا ماڭىزدى جىل، ويتكەنى وسى كەزەڭ ەلىمىزدىڭ الداعى بەس جىلداعى دامۋىنا نەگىز بولادى

قاسىم-جومارت توقايەۆ  سۇحباتىندا 2024 -جىلدىڭ ەرەكشە ماڭىزدى جىل بولاتىنىن اتاپ ءوتتى، دەپ حابارلايدى Kazinform.

- 2023 -جىل ەلىمىز ءۇشىن ماڭىزدى وقيعالارعا تولى جىل بولدى. ءبىز نەگىزگى ساياسي رەفورمالاردى اياقتاپ قالدىق. كونستيتۋتسيالىق سوت جۇمىسىن باستادى. ءماجىلىس جانە بارلىق دەڭگەيدەگى ءماسليحات دەپۋتاتتارى جاڭا ەرەجە بويىنشا سايلاندى. العاش رەت اۋدان جانە وبلىستىق ماڭىزى بار قالا اكىمدەرىن سايلادىق. اۋىل جانە اۋداندىق ماڭىزى بار قالا اكىمدەرىن سايلاۋ جالعاستى. بىلتىر 700 گە جۋىق اۋىل اكىمى سايلاندى. ءبىز ءادىل جانە باسەكەلى ەكونوميكا جۇيەسىن قۇرۋعا كىرىستىك. ەكونوميكانى ءارتاراپتاندىرۋ جانە مونوپوليادان ارىلتۋ، ينفراقۇرىلىمدى جاڭعىرتۋ، بيزنەستى قولداۋ، ينۆەستيتسيا تارتۋ جۇمىستارىمەن مىقتاپ اينالىستىق، - دەدى مەملەكەت باسشىسى.

ونىڭ ايتۋىنشا، الەۋمەتتىك سالادا قوردالانىپ قالعان ماسەلەلەر بىرتىندەپ شەشىلە باستادى.

ەلىمىزدىڭ تۇكپىر-تۇكپىرىندە ءبىلىم وشاقتارى، ونىڭ ىشىندە، «جايلى مەكتەپتەر» بوي كوتەرۋدە.

اۋىلداردا دەنساۋلىق ساقتاۋ نىساندارى سالىنىپ جاتىر. الەۋمەتتىك تۇرعىدان وسال توپتاعى ازاماتتارعا كەشەندى تۇردە قولداۋ كورسەتۋ ءۇشىن الەۋمەتتىك كودەكس قابىلداندى.

زياندى ەڭبەك جاعدايىندا جۇمىس ىستەيتىن ازاماتتار ءۇشىن ارنايى تولەماقى ەنگىزىلدى.

تابيعاتتى قورعاۋعا جاۋاپتى مەكەمەلەردىڭ قىزمەتكەرلەرىنە ولاردىڭ ءومىرى مەن دەنساۋلىعىنا تونەتىن قاۋىپ-قاتەرگە قاتىستى ۇستەمەاقى تولەنەتىن بولدى.

مەديتسينا قىزمەتكەرلەرىنىڭ، مەكتەپتە، كوللەدجدە جانە بالاباقشادا جۇمىس ىستەيتىن پەداگوگتەردىڭ جالاقىسى ءوستى.

ۇلتتىق قوردان بالالارعا قارجى بەرۋ ماسەلەسىن رەتتەيتىن زاڭ كۇشىنە ەندى.

نەگىزگى ەكونوميكالىق كورسەتكىشتەردى، ونىڭ ىشىندە ينفلياتسيا دەڭگەيىن ەسكەرە وتىرىپ ەڭ تومەنگى جالاقىنى انىقتايتىن ادىستەمە قابىلداندى.

- وسى جۇمىستىڭ ءبارى 2024 -جىلى دا جالعاسادى. ءبىز تياناقتى جانە جوسپارلى ارەكەت جاسايمىز، ماقساتقا جەتۋ ءۇشىن ۇزدىكسىز العا ۇمتىلامىز. بۇل - ايرىقشا ماڭىزدى جىل بولماق. ويتكەنى وسى كەزەڭ ەلىمىزدىڭ الداعى بەس جىلداعى دامۋىنا نەگىز بولادى، - دەيدى پرەزيدەنت.

ال جاڭا جىلدا ەلىمىزدىڭ الدىندا قانداي مىندەتتەر تۇرعانى جايلى ساۋالعا قاسىم-جومارت توقايەۆ جاڭا ەكونوميكالىق ۇلگىگە كوشەتىنىمىزدى جەتكىزدى.

- 2029 -جىلعا قاراي جالپى ىشكى ءونىمدى قازىرگىدەن ەكى ەسەگە ارتتىرۋ ماسەلەسىن باستى ستراتەگيالىق ماقسات رەتىندە بەلگىلەدىم. كوپ ۇزاماي ۇكىمەتتىڭ كەڭەيتىلگەن وتىرىسى وتەدى. وندا ەلىمىزدىڭ بىلتىرعى الەۋمەتتىك- ەكونوميكالىق دامۋ قورىتىندىسى شىعارىلىپ، الداعى جۇمىستىڭ امال-تاسىلدەرى ايقىندالادى. ۇلتتىق قۇرىلتايدىڭ وتىرىستارى يدەولوگيا سالاسىنداعى ماسەلەلەردى، ۇلتتىڭ جاڭا ساپاسىن قالىپتاستىرۋ ءىسىن، قوعامنىڭ قۇندىلىقتار جۇيەسىن جاڭعىرتۋ جايىن تالقىلايتىن ءتيىمدى پىكىرتالاس ورنىنا اينالدى. بۇعان دەيىن جازدىگۇنى شاقىرىلىپ كەلە جاتقان قۇرىلتايدىڭ وتىرىسىن بيىل ءسال ەرتەرەك، كوكتەمدە وتكىزەتىن شىعارمىز. وسىلايشا، بيىل ەكونوميكالىق، قوعامدىق-ساياسي جانە گۋمانيتارلىق سالالاردا اتقارىلاتىن جۇمىستىڭ نەگىزگى باعىت-باعدارى ءبىرىنشى توقساندا-اق ايقىندالادى، - دەدى مەملەكەت باسشىسى.