تولىق ادام: ابايدىڭ تاعىلىمىن ارقالاعان ۇرپاق

Nazarbayev University «تولىق ادام» تۇجىرىمداماسىن جۇزەگە اسىرادى، دەپ حابارلايدى El.kz اقپارات اگەنتتىگى.

اتالعان ۋنيۆەرسيتەت بۇگىندە الەمنىڭ ۇزدىك جوعارى وقۋ ورىندارىنىڭ قاتارىنا كىرەدى. 250 دەن استام زەرتحاناسى بار ۋنيۆەرسيتەتتە قاتەرلى ىسىكتى ەمدەيتىن پرەپارات ازىرلەنىپ، سال اۋرۋىمەن اۋىراتىن بالالاردى جاتتىقتىراتىن كەشەن قۇراستىرىلعان، عارىشقا جىبەرىلەتىن روبوتتار جاسالىپ، قازاق تىلىندە سويلەيتىن سيفرلىق اۆاتار ىسكە قوسىلعان. بۇل جۇمىستارمەن ستۋدەنتتەر دە اينالىسادى. الايدا اعىلشىن تىلىندە ءبىلىم بەرىپ، جاستاردى عىلىمعا باۋليتىن ۋنيۆەرسيتەت تەك قانا بىلىكتىلىگى جوعارى مامانداردى دايارلاۋمەن شەكتەلمەيدى، سونداي-اق ولاردىڭ بويىنا دۇرىس قاسيەتتەردى ءسىڭىرۋدى ماقسات ەتەدى. وسى ماقساتتا جوعارى وقۋ ورنىندا «تولىق ادام» تۇجىرىمداماسى جۇزەگە اسىرىلماق.

«تولىق ادام» تۇجىرىمداماسى ۇلتىمىزدىڭ ۇلى ويشىلى اباي قۇنانباي ۇلىنىڭ اتتاس ءپالساپاسىنا نەگىزدەلگەن. وعان سايكەس، تولىققاندى ادام بولۋ ءۇشىن بويدا ءۇش-اق قاسيەت بولۋى كەرەك - ىستىق قايرات، نۇرلى اقىل، جىلى جۇرەك. ءبىلىم ورداسىنداعى تاربيە جۇمىسى وتكەن جىلدىڭ سوڭىندا NU قامقورشىلىق كەڭەسىنىڭ شەشىمىمەن رەسمي تۇردە بەكىتىلگەن. وعان بىردەن-ءبىر سەبەپ - قازىرگى كەزدە ساپالى ءبىلىم بەرۋدەن بولەك، ول ءبىلىمدى يگى ماقساتتارعا قولداناتىن، ادامزات پەن ءوز ەلىنىڭ الدىنداعى جاۋاپكەرشىلىكتى سەزىنەتىن پاتريوتتاردى ءوسىرۋ ماڭىزدى.

ستۋدەنتتەرمەن جۇمىس جۇرگىزۋ دەپارتامەنتىنىڭ باس مەنەدجەرى دانا ابيلتايەۆانىڭ ايتۋىنشا، بۇل رەتتە كورسەتكىشتەر وتە جاقسى. ماسەلەن، وقۋ بىتىرگەن تۇلەكتەردىڭ بارلىعىنىڭ %92 ى قازاقستان ەكونوميكاسىنىڭ ءتۇرلى سالالارىندا ەڭبەك ەتۋدە. سونداي-اق ۋنيۆەرسيتەتتىڭ تاعى ءبىر ستراتەگيالىق باعىتى - شەتەلدە تۇرىپ جاتقان قازاقستاندىق مامانداردى ەلىمىزدە جۇمىس ىستەۋگە جاقسى جاعداي جاساۋ ارقىلى قايتارۋ. قازىرگى كەزدە شەتەلدە اكادەميالىق سالادا ەڭبەك ەتىپ جۇرگەن ءبىراز قازاقستاندىق ۋنيۆەرسيتەتكە جۇمىسقا تۇرىپ، تابىستى عىلىمي جۇمىستار جۇرگىزۋدە.

اتالعان دەپارتامەنت جوعارى وقۋ ورنىنداعى تاربيە جۇمىسىمەن اينالىسادى. ول 2,1 مىڭ ستۋدەنت مۇشەلىك ەتەتىن 127 ستۋدەنتتىك ۇيىمنىڭ جۇمىسىن ۇيلەستىرىپ، ولارعا تالىمگەرلىك جاسايدى. 2024 -جىلى دەپارتامەنت 434 شارا وتكىزگەن، ولاردىڭ 110 ى «تولىق ادام» ءپالساپاسىن دارىپتەۋگە باعىتتالعان.

ستۋدەنتتەر وتكىزەتىن شارالاردىڭ اراسىندا قازاق ءتىلى مەن مادەنيەتىن دارىپتەۋ جونىندەگى شارالارعا سۇرانىس ارتقانىن ايتا كەتۋ كەرەك. وعان قوسا وسى تاقىرىپقا شەتەلدەن كەلگەن وقىتۋشىلار مەن ستۋدەنتتەردىڭ قىزىعۋشىلىعى ارتۋدا. كەيبىر وقىتۋشىلار ءتىپتى قازاق ءتىلىن تولىعىمەن مەڭگەرىپ العان.

سونداي-اق Kazakh Stage ،NU Orchestra ،«Kiye» Qazaq Dance Club ،Kerim ،Shyraq ۇيىمدارى ستۋدەنتتەر اراسىندا وتە تانىمال. تاعى ءبىر ايتا كەتەتىن جايت، وقۋعا تۇسكەن ستۋدەنتتەر اراسىندا قازاق مەكتەبىن بىتىرگەندەر سانى ارتىپ كەلەدى، قازىرگى كەزدە كورسەتكىش %50 عا جاقىندادى، - دەيدى ستۋدەنتتەرمەن جۇمىس جۇرگىزۋ دەپارتامەنتىنىڭ ديرەكتورى بەيبىت اسقار ۇلى.

اتالعان تۇجىرىمدامانىڭ جۇزەگە اسىرىلۋىنىڭ وڭ ناتيجەسى رەتىندە ستۋدەنتتەر اراسىندا قايىرىمدىلىق شارالارىنىڭ ارتقانىن ايتۋعا بولادى. ماسەلەن، ۋنيۆەرسيتەتتە « قىزىل جارتى اي» مەن «بالالاردى دامىتۋ قورى» سىندى ۇيىمدارعا ستۋدەنتتەر بەلسەنە ارالاسا باستاعان. وعان قوسا بيىلعى كوكتەمدە وتكەن «استانا بال» قايىرىمدىلىق شاراسىنا 3,5 مىڭ قاتىسۋشى كەلىپ، ەرەكشە قاجەتتىلىكتەرى بار جانە مۇمكىندىگى شەكتەۋلى بالالارعا كومەك رەتىندە قاراجات جينالدى. جينالعان سوما وتكەن جىلعى كورسەتكىشتەن ەكى ەسە وسكەن. شارانىڭ نەگىزگى تاقىرىبى «جىلى جۇرەك» بولعان.

ءوزىن-ءوزى باسقارۋ جۇيەسى - تاربيە جۇمىسىن ءتيىمدى جۇرگىزۋدىڭ تاعى ءبىر مىقتى قۇرالى. وقۋ جىلىندا جاقسى جوبالار جاساپ، ۋنيۆەرسيتەت ومىرىنە بەلسەنە ارالاسقان ستۋدەنتتىك ۇكىمەتتىڭ پرەزيدەنتى ەراسىل قادىرجانوۆ ءبىلىم الۋشىلاردىڭ داۋىسى بويىنشا ۇزدىك دەپ تاڭدالىپ، «تولىق ادام» سىيلىعىن الدى.

بۇل تاربيە بەرۋ جۇيەسى تەك قانا ءبىلىم بەرۋگە ەمەس، وعان قوسا ستۋدەنتتەردى جاقسى ءتۇسىنىپ-بىلۋگە، ولارعا جايلى جانە ىڭعايلى ورتادا ءوزىن- ءوزى تانۋعا مۇمكىندىك بەرەدى. جاستار بولاشاقتا كىم بولعىسى كەلەتىنىن شەشىپ، ول ماقساتقا قالاي جەتۋ كەرەگىن ۇيرەنەدى، بويلارىنا ۇلتىمىزدىڭ مادەنيەتى مەن قۇندىلىقتارىن ءسىڭىرىپ، وتاندىق ۋنيۆەرسيتەت قابىرعاسىندا كوزى اشىق، كوكىرەگى

وياۋ XXI عاسىر ادامدارىنا اينالادى. ءبىز ءبىلىم ورداسىنىڭ قاۋىمداستىعى جانە اتا-انالاردىڭ كومەگىمەن الەمدىك دارەجەدەگى بىلىممەن سۋسىنداعان، بويىنا بار جاقسى قاسيەتتەردى سىڭىرگەن بولاشاق كوشباسشىلاردى، ەلىمىزدىڭ پاتريوتتارىن وسىرۋگە تالپىنامىز، - دەپ قورىتىندىلادى NU ۆيتسە-پرەزيدەنتى قاديشا دايروۆا.