توعىزقۇمالاقتان ەل چەمپيوناتىندا تۇركىستاندىق قىزدار توپ جاردى

اقتوبە قالاسىندا توعىزقۇمالاقتان ايەلدەر اراسىنداعى قازاقستان رەسپۋبليكاسىنىڭ كوماندالىق چەمپيوناتى ءوز مارەسىنە جەتتى، دەپ حابارلايدى Kazinform.

ق ر توعىزقۇمالاق فەدەراتسياسىنىڭ باسپا ءسوز قىزمەتى ءبىر اپتاعا سوزىلعان تارتىستى دودادا تۇركىستاندىق ارۋلار الدىنا جان سالماعانىن جازدى.

فينالدىق باسەكەنى تاماشالاۋعا توعىزقۇمالاق سپورتى فەدەراتسياسى پرەزيدەنتى ءاليحان بايمەنوۆ قاتىسىپ، جۇلدەگەر كوماندالاردى جەڭىستەرىمەن قۇتتىقتادى.

جارىسقا اباي، الماتى، باتىس قازاقستان، قوستاناي، قىزىلوردا، ماڭعىستاۋ، پاۆلودار، تۇركىستان جانە اقتوبە وبلىستارى مەن الماتى قالاسىنىڭ قۇراما كوماندالارىنان قۇرالعان 70 تەن استام زياتكەر قاتىسىپ، ويىننىڭ «كلاسسيكا» جانە «بليتس» تۇرىنەن ءوزارا جەڭىمپاز كوماندانى انىقتادى.

جارىس ناتيجەسى بويىنشا تۇركىستان وبلىسىنىڭ ايەلدەر قۇراماسى مىقتىلىق تانىتىپ، جالپىكوماندالىق ەسەپتە ءبىرىنشى ورىننان كورىندى. ال ەكىنشى ورىندى قىزىلوردالىق ويىنشىلار يەلەنسە، ءۇشىنشى ورىندى پاۆلودار وبلىسىنان كەلگەن كوماندا ەنشىلەدى.

بليتس ءتۇرىنىڭ ناتيجەسى مىناداي:

1- ورىن - تۇركىستان وبلىسى

2- ورىن - پاۆلودار وبلىسى

3- ورىن - اقتوبە وبلىسى.

اۆتور كۇنسۇلتان وتارباي