توعىز جاسىندا 9 كولىك پەن 1 پاتەر يەلەنگەن شاباندوزبەن سۇحبات
استانا. KAZINFORM - بۇگىندە اتسەيىس پەن سايىپكەرلەر اراسىندا 9 جاستاعى حامزا مەن جۇمىرتۇياقتىڭ ەسىمدەرى تانىمال. بالا كەزدەن الاماننان توپ جارىپ جۇرگەن شاباندوز بيىل كوشپەندىلەر ويىندارىندا دا جۇلدەلى 2-ورىنعا يە بولدى.
اناسىنىڭ ايتۋىنشا، ول 9 جاسىندا 9 كولىك، 1 پاتەر، 70-80 ميلليون تەڭگە يەلەنىپ ۇلگەرگەن.
Massaget.kz ءتىلشىسى ات قۇلاعىندا وينايتىن بالامەن جانە ونىڭ اناسى دينارا حانىممەن سۇحباتتاستى.
نەبارى 9 جاسىندا قازاقستان تۇگىلى الەمدى شابىسىنا قاراتقان حامزا مارلان ۇلى جارىسقا قالاي دايىندالعانىن، جۇمىرتۇياق تۋرالى كوپشىلىك بىلە بەرمەيتىن مالىمەتتەر ايتتى.
«كوشپەندىلەر ويىندارى جاقسى، ويداعىداي ءوتتى. جۇمىرتاياقپەن 5 اي دايىندالدىم. ءبىزدى اكەم دايىندادى. جۇمىرتۇياق «اقىلباي» شارۋاشىلىعىنا تيەسىلى. جىلقى مارات اعانىڭ (قوجالىق يەسى - ەسك.) شارۋاشىلىعىندا تۇرادى، ءوزىمىزدىڭ قول-تۋمامىز، سول قوجالىقتان شىققان. اكەم، مارلان بەكتەنوۆ - باپكەر، شاباندوز – مەن»، - دەيدى بالا.
شاباندوز 4-سىنىپتا وقيدى. اناسىنىڭ ايتۋىنشا، جارىسقا بايلانىستى ساباقتان ءجيى قالادى. مەكتەپتە كوتەرمەلەۋ جوق، وزىنە تيەسىلى باعانى الادى.
«مەكتەپتە مۇعالىمدەر «ماقتانامىز، ماقتان تۇتامىز» دەپ ايتادى. مەكتەپتە مەنى ءبارى تانيدى. ءبىراق ساباقتى 3 كە وقيمىن»، - دەيدى بالا.
حامزا بولاشاقتا جوعارى دەڭگەيدەگى، الەمدىك ارەنادا ونەر كورسەتەتىن شاباندوز بولعىسى كەلەدى. ول ەكى قىزدان كەيىن دۇنيەگە كەلگەن. اتا-اناسى ات ۇستارىن ەركەلەتىپ وسىرگەن.
«حامزا - ەكى قىزدان كەيىن دۇنيەگە كەلگەن ۇل. سوندىقتان ول وتە ەركە بولىپ ءوستى. 4 جاسىندا اكەسى ءوز تاربيەسىنە الىپ، ات قوراعا اپارىپ، اتقا مىنگىزدى. 5 جاستان باستاپ بايگەگە شىعىپ ءجۇردى، 6 جاسىندا العاشقى كولىگىن جەڭىپ الدى. جىلقىعا دەگەن ىنتاسى جاقسى، اكەسى جانىندا، باپكەرى، ءوزى ءبارىن ۇيرەتەدى»، - دەيدى اناسى.
ال حامزانىڭ ايتۋىنشا، شاباندوز بولۋ - ءوز نيەتى. ول بۇل قالاۋىن اكەسىنە ايتقان، اكەسى ءوز كەزەگىندە بالا ءسوزىن جەرگە قالدىرماعان.
«تۋعاننان اتقا جاقىن بولدى. 9-10 ايىندا اتقا وتىرىپ، 1 جاسىندا كوكەسى اعاش ات سىيلاعان، سول كەزدە اتقا وتىرماي، تۇرىپ شاباتىن. سودان اتقۇمار ەكەنى بەلگىلى بولدى»، - دەيدى دينارا حانىم.
حامزانىڭ اتتان قۇلاعان كەزى كوپ بولعان. الايدا بالا بۇدان قورقىپ قالماعان. دينارا حانىمنىڭ ايتۋىنشا، شاباندوزدىڭ اياعىن شىعارعان، جامباسىن دا شىتىناتقان، باسىن دا جارعان كەزى بولعان. قازىر دەنساۋلىعى جاقسى.
«بايگەدەن كەيىن ەرنى كوگەرگەن جوق. بۇل شاڭنان شىعار. دەنساۋلىعى جاقسى. بۇل بايگەدە ءجيى كەزدەسەتىن جاعداي. ءتىسى، بەتى شاڭ بولىپ تۇرادى. ۇيدەگىلەر تۇماۋراتىپ جاتقاندا، حامزا اتتىڭ جانىندا جۇرگەن سوڭ اۋىرمايدى. ونىڭ دا پايداسى بار»، - دەيدى اناسى.
بالانىڭ اناسى ۇلىنىڭ اۋقىمدى بايگەسى مەن ەنشىلەگەن سىيلارى تۋرالى ءسوز قوزعادى.
«قازىر 9 جاسىندا 9 كولىك، 1 پاتەر، 70-80 ميلليون تەڭگەدەي يەلەنىپ وتىر. بيىلعى اۋقىمدى بايگەسى «جولان جۇيرىگى» مەن «كوشپەندىلەر ويىندارى» بولدى. كەمەل توقايەۆتىڭ اسىندا دا ءبىرىنشى بولىپ كەلدى. تاريحتا قالاتىن بايگەلەر عوي. جۇلدەنى ات يەسىمەن بولىسەمىز. مۇندا جىلقى يەسىنىڭ پايىزى، باپكەرىنىڭ پايىزى، جىلقىنى باپتايتىن بالانىڭ پايىزى مەن شاباندوز بالانىڭ پايىزى بار. سوندا جۇلدە 4 كە بولىنەدى. جەڭىپ العان پاتەر استانادان بەرىلدى. جەڭىپ العان كولىكتەردى ساتىپ جىبەردىك. جىلقىنى باپتاۋدا قانداي دا ءبىر ەرەكشەلىك جوق. ءبارى نە بەرەدى، سول بەرىلەدى. بۇل - ماڭداي تەرمەن كەلگەن جەڭىس. اتىڭ بابىڭدا تۇرسا، مىندەتتى تۇردە شابادى عوي»، - دەيدى دينارا حانىم.
حامزانىڭ سوزىنشە، اكەسى ءار جارىستا ءتۇرلى ءادىس ايتادى.
«اسىقپاي وتىرىپ كەل دە، اياعىنا دەيىن ۇستا» دەيدى. قاشاتىن ات بولسا، قاشاسىڭ، ۇستايتىن ات بولسا، ۇستايسىڭ. كۇنىنە 3 رەتتەن باسقا جىلقىلارمەن دايىندالدىم. جۇمىرتۇياققا بايگە الدىندا عانا مىنەمىن»، - دەيدى ول.
حامزانىڭ ەسىندە قالعان بايگەسى - كوشپەندىلەر ويىندارى.
«ەكىنشى بولىپ كەلگەنىمە وزىمە عانا وكپەلىمىن. جۇمىرتۇياققا رەنجي المايمىن. كىنا وزىمنەن. ات بولماي كەلە جاتسا، توقتاتۋ كەرەك. تىڭ كەلە جاتسا، وتىرا قالۋ كەرەك. تىزگىندى ۇستاپ سويلەسەسىڭ. بايگە الدىندا اكەم جىلقىنى دايىنداپ، سويلەسەدى»، - دەيدى بالا.
بالانىڭ اناسى الداعى جوسپارلارىمەن ءبولىستى.
«باۋىرجان مىرزابايەۆ سەكىلدى شاپسا دەگەن ارمانىمىز بار. شەتەلدە ارنايى مەكتەپ بار ەكەن، سوعان جىبەرسەك دەگەن ويدامىز»، - دەيدى ول.
حامزانىڭ «ميلليونەر» دەگەن جەكە اتى بار. ول بايگەگە قوسىلىپ، كوكتەمدە 2 رەت جەڭىسكە جەتكەن. ال كەلەسى جارىسى الماتىدا بولماق. سۇحبات اياعىندا شاباندوز بارشا قازاقستاندىققا العىس ءبىلدىردى.
ەسكە سالايىق، بۇعان دەيىن ەل اۋزىندا جۇرگەن كابيرحاننىڭ يەسى تىلەك مۇحانبەتقاليەۆپەن سۇحباتتاسقان ەدىك.
