توعىز ايدا 144 مىڭ قازاقستاندىق اۆتوكولىك ءوندىرىلدى
استانا. KAZINFORM - بۇگىن ۇكىمەت وتىرىسىندا ونەركاسىپ جانە قۇرىلىس ۆيتسە-ءمينيسترى قۋاندىق قاجكەنوۆ ماشينا جاساۋ سالاسىنىڭ دامۋ بارىسى جونىندە مالىمدەدى.
ونىڭ سوزىنشە، اتالعان سەكتور بيىل توعىز اي ىشىندە 22,8 پايىزعا ءوسىم كورسەتتى.
- وسى سالادا كولىك قۇرالدارىن، اۋىل شارۋاشىلىعى جانە تەمىر جول تەحنيكاسىن، سونداي-اق تۇرمىستىق تەحنيكانى ءوندىرۋ كولەمى ارتتى. توعىز ايدا شامامەن ءجۇز قىرىق ءتورت مىڭ اۆتوكولىك قۇرالى ءوندىرىلدى. ونىڭ ىشىندە ءجۇز وتىز التى مىڭنان استامى - جەڭىل اۆتوموبيلدەر، مىڭ سەگىز جۇزگە جۋىعى - اۆتوبۋستار، بەس مىڭ سەگىز جۇزگە جۋىعى - جۇك جانە ارنايى تەحنيكا، - دەدى قۋاندىق قاجكەنوۆ.
مۇنداي وسىمگە ىشكى سۇرانىستىڭ ارتۋى جانە بۇرىن ىسكە قوسىلعان جوبالاردىڭ جوسپارلى وندىرىستىك قۋاتىنا جەتۋى اسەر ەتكەن.
- سالاعا سالىقتىق جانە كەدەندىك جەڭىلدىكتەر دە قوسىمشا قولداۋ كورسەتىپ كەلەدى. اتاپ ايتقاندا، تۇرمىستىق تەحنيكانى وتكىزۋ كەزىندە قوسىلعان قۇن سالىعىنان بوساتۋ شاراسى كەلەسى جىلدىڭ سوڭىنا دەيىن قولدانىلادى. وسىعان بايلانىستى، وندىرىستەگى وتاندىق ۇلەستى ارتتىرۋ، جانە Samsung سياقتى ءىرى حالىقارالىق كومپانيالاردى تارتۋ ءۇشىن وسى جەڭىلدىكتىڭ قولدانىلۋ مەرزىمىن ۇزارتۋ ۇسىنىلادى، - دەدى ۆيتسە-مينيستر.
ايتا كەتەيىك، بۇعان دەيىن ەلىمىزدە بۇرىن وندىرىلمەگەن جاڭا ءونىم تۇرلەرى شىعارىلا باستاعانىن جازعانبىز.
