توپ-5: ەڭ كوپ ساتىلعان جاڭا كولىكتەردىڭ ءتىزىمى جاسالدى
استانا. KAZINFORM - بيىل قىركۇيەكتە ەلدە جاڭا اۆتوكولىكتەر ساۋداسى 5,2 پايىز ءوستى. بۇل تۋرالى قازاقستاننىڭ اۆتوكولىك وداعى (ق ا و) ءمالىم ەتتى.
- 2026-جىلعى قىركۇيەكتە رەسمي ديلەرلەر 19309 جاڭا جەڭىل جانە كوممەرتسيالىق اۆتوكولىك ساتتى، بۇل بىلتىرعى قىركۇيەكتەگىدەن (18353 كولىك) 5,2 پايىز كوپ. تامىزبەن سالىستىرعاندا، ساۋدا 1,1 پايىز ءوستى. قاڭتار-قىركۇيەك قورىتىندىسى بويىنشا 165678 جاڭا اۆتوكولىك ساتىلدى. بۇل 2025-جىلدىڭ سايكەس كەزەڭىمەن سالىستىرعاندا (161449 كولىك) 2,6 پايىزعا ارتىق، - دەپ اتالىپ وتكەن قازاقستاننىڭ اۆتوكولىك وداعى مالىمەتىندە.
ق ا و پرەزيدەنتى انار ماقاشيەۆانىڭ ايتۋىنشا، قازىر قازاقستانداعى اۆتوسالونداردا جاڭا اۆتوكولىكتى ساتىپ الۋدى جەڭىلدەتەتىن ءتۇرلى تەتىكتەر مەن كليەنتتەردى قولداۋ باعدارلامالارىنىڭ كەڭ سپەكترى بار.
- ستاندارتتى اۆتونەسيەدەن بولەك، ساتىپ الۋشىلار وندىرۋشىلەر مەن ديلەرلەردىڭ ارنايى ۇسىنىستارىن، سونىمەن قاتار trade-in باعدارلاماسىن پايدالانا الادى. مۇنداي قۇرالدار سۇرانىستى ساقتاپ، ەل اۆتوپاركىنىڭ جاڭارۋىنا ىقپال ەتەدى، - دەپ ءتۇسىندىردى ول.
ەڭ كوپ ساتىلعان برەند
2026-جىلعى قىركۇيەكتە 3067 اۆتوكولىك ناتيجەسىمەن ءبىرىنشى ورىندى Chevrolet الدى (4,2 پايىز). ەكىنشى قاتاردا 2932 اۆتوكولىگى وتكەن Hyundai تۇر (-29,5 پايىز). ءۇشىنشى ساتىعا Kia جايعاستى - 2584 اۆتوكولىك (29,1 پايىز).
ال ءتورتىنشى ورىنداعى Changan-نىڭ ساۋداسى 127,1 پايىزعا ارتىپ، 1501 اۆتوكولىككە جەتتى. بەستىكتى 1179 اۆتوكولىكپەن Chery تۇيىندەدى (28,3 پايىز).
سونىمەن قاتار وسى وندىقتىڭ تىزىمىندە Haval (1171 كولىك ساتىلدى؛ 88,9 پايىز)، Toyota (1 150 كولىك؛ 0,4 پايىز)، Jetour (900 كولىك؛ 1,3 پايىز)، Geely (636 كولىك؛ 26,4 پايىز) جانە BYD (560 كولىك؛ 32,4 پايىز) بار.
قازاقستاندا جەڭىل اۆتوكولىك ءوندىرىسى ارتتى
2026-جىلعى قاڭتار-قىركۇيەك ايلارىندا 136548 جەڭىل اۆتوكولىك ءوندىرىلدى. بۇل 2025-جىلدىڭ سايكەس كەزەڭىمەن سالىستىرعاندا 38 پايىزعا جوعارى.
ۇلتتىق ستاتيستيكا بيۋروسىنىڭ باسپا ءسوز قىزمەتىنىڭ دەرەگىنە سايكەس، قىركۇيەك ايىندا 19377 جەڭىل اۆتوكولىك شىعارىلدى. ءوندىرىس كولەمى وتكەن جىلدىڭ وسى ايىمەن سالىستىرعاندا 66,4 پايىزعا، ال اعىمداعى جىلدىڭ تامىز ايىمەن سالىستىرعاندا 35,5 پايىزعا كوپ.
- قازاقستاندا اۆتوكولىك وندىرۋمەن 12 كاسىپورىن اينالىسادى. جەڭىل اۆتوكولىك ءوندىرىسىنىڭ نەگىزگى كولەمى الماتى قالاسى مەن قوستاناي وبلىسىنا تيەسىلى. ولاردىڭ ۇلەسى تيىسىنشە 50,5 پايىز جانە 49,5 پايىزدى قۇرايدى، - دەلىنگەن ستاتيستيكالىق مالىمەتتەردە.
2026-جىلعى قاڭتار- قىركۇيەك ايلارىندا «اۆتوكولىكتەر، تىركەمەلەر جانە جارتىلاي تىركەمەلەر» ساناتى بويىنشا ونەركاسىپ ءونىمىنىڭ كولەمى اقشالاي ماندە 1,67 تريلليون تەڭگەگە جەتتى. وسى ساناتتاعى ونەركاسىپ ءوندىرىسىنىڭ يندەكسى وتكەن جىلدىڭ سايكەس كەزەڭىمەن سالىستىرعاندا 129,9 پايىز دەڭگەيىندە قالىپتاستى.
2026-جىلعى قىركۇيەكتە وندىرىلگەن ءونىم كولەمى 198,4 ميلليارد تەڭگە بولدى. بۇل كورسەتكىش اقشالاي ماندە 2026-جىلعى تامىزبەن سالىستىرعاندا 25,7 پايىزعا، ال 2025-جىلعى قىركۇيەكپەن سالىستىرعاندا 10,5 پايىزعا ءوستى.
بۇعان دەيىن حابارلانعانداي، وسى جىلى ونەركاسىپ جانە قۇرىلىس ءمينيسترى ەرسايىن ناعاسپايەۆ اۆتوكولىك ءوندىرىسى سالاسىنىڭ قارقىندى دامىپ كەلە جاتقانىن مالىمدەدى.
سوڭعى 5 جىلدا سالاعا 457 ميلليارد تەڭگەگە جۋىق ينۆەستيتسيا تارتىلدى. وتكەن جىلى 171 مىڭنان استام اۆتوكولىك شىعارىلىپ، ءوندىرىس كولەمى 18 پايىزعا ارتتى. بۇل وڭ ديناميكا بيىل دا ساقتالىپ وتىر. بيىلعى جوسپار - ءوندىرىس كولەمىن 11 پايىزعا ارتتىرىپ، 190 مىڭ كولىك شىعارۋ. جالپى بيىل اۆتوموبيل شىعارۋ سالاسى 131,1 پايىزعا ءوستى.
