توپ-10: شەتەلدىك تۋريستەرگە قازاقستاننىڭ قانداي وڭىرلەرى تارتىمدى
الماتى. KAZINFORM - بىلتىر الماتى وبلىسىندا كەلەتىن تۋريستەر ايتارلىقتاي ارتقان، ال شىمكەنت قالاسى مەن اقتوبە وبلىسىندا بۇل كورسەتكىش تومەندەدى.
Kazakh Tourism كومپانياسى «eQonaq» جۇيەسىنە تىركەلگەن ورنالاستىرۋ ورىندارى بويىنشا مالىمەتتەردى تالداپ، شەتەلدىك تۋريستەر اراسىندا تانىمال قازاقستاندىق وڭىرلەردى انىقتادى. وتكەن جىلدىڭ ۇزدىك ۇشتىگى 2023 - جىلمەن سالىستىرعاندا وزگەرىسسىز قالدى. تالداۋ «eQonaq» اقپاراتتىق جۇيەسىنە تىركەلگەن 525 مىڭنان استام پايدالانۋشىنىڭ دەرەكتەرىن قامتىدى.
زەرتتەۋ قورىتىندىسى بويىنشا الماتى شەتەلدىك تۋريستەر ءۇشىن ەڭ تانىمال قازاقستاندىق قالا مارتەبەسىن ساقتادى. 2024 - جىلى وڭتۇستىك استانا 534340 شەتەلدىك قوناقتى قابىلداعان. وتكەن جىلمەن سالىستىرعاندا مەگاپوليسكە كەلگەن ساياحاتشىلار سانى 70 مىڭعا جۋىق ادامعا ارتتى.
رەيتينگتىڭ ەكىنشى ساتىسىنا ەلوردا جايعاستى. 2024 -جىلى «eQonaq» جۇيەسىنە تىركەلگەن 269320 شەتەلدىك مەيمان استانادا توقتاعان.
2023 - جىلمەن سالىستىرعاندا 2024 -جىلى الماتى وبلىسىندا شەتەلدىك تۋريستەر سانى %59 عا ارتىپ، 134763 ادامعا جەتتى. بۇل ناتيجەسىنىڭ ارقاسىندا الماتى وبلىسى ەڭ تارتىمدى قالالار تىزىمىندە ۇزدىك ۇشتىككە ەندى.
اتىراۋ جانە ماڭعىستاۋ وبلىستارى ءتورتىنشى جانە بەسىنشى ورىنداردى يەلەندى. مۇنايلى وڭىرگە وتكەن جىلى 106 974 شەتەلدىك تۋريست كەلسە، ماڭعىستاۋ وبلىسى 71 462 شەتەلدىك قوناقتى قابىلدادى (2023 -جىلى - 67 633 ادام) .
قاراعاندى وبلىسىنىڭ شەتەلدىك تۋريستەر ءۇشىن تارتىمدىلىعى ارتا ءتۇستى. ايماق رەيتينگتە بىردەن ءۇش ساتىعا كوتەرىلىپ، التىنشى ورىندى يەلەندى. 2024 - جىلى وڭىرگە 50474 شەتەلدىك تۋريست كەلدى، بۇل وتكەن جىلمەن سالىستىرعاندا %35 عا ارتىق.
ال اقتوبە وبلىسى 2023 -جىلمەن سالىستىرعاندا ءبىر ساتى تومەندەدى. وندا شەتەلدىك قوناقتار سانى شامامەن 1500 ادامعا ازايىپ، 45063 تۋريست بولدى.
ءتىزىمنىڭ سەگىزىنشى جانە توعىزىنشى ورىندارىنا اقمولا جانە جامبىل وبلىستارى جايعاستى. بۇل ەكى وڭىردە دە 2024 - جىلى شەتەلدىك تۋريستەر سانىنىڭ ءوسۋى بايقالادى. اقمولا وبلىسى 44976 شەتەلدىك قوناقتى قابىلداسا، جامبىل وبلىسىندا بۇل كورسەتكىش 44226 ادامعا جەتتى.
ونىنشى ورىندى ءۇش ساتى تومەندەگەن شىمكەنت قالاسى يەلەندى. «eQonaq» جۇيەسىنىڭ دەرەكتەرى بويىنشا، 2024 -جىلى مەگاپوليستىڭ ورنالاسۋ ورىندارىنا 39887 شەتەلدىك تۋريست توقتاعان. بۇل كورسەتكىش 2023 -جىلمەن سالىستىرعاندا شامامەن 900 ادامعا از.
ەسكە سالايىق، بۇعان دەيىن 2025 -جىلى الماتىدا ءتۋريزمدى دامىتۋ ءۇشىن نە ىستەلەتىنىن جازعانبىز.
