تۇتىنۋشى قۇقىعى: تاۋارلاردى فوتو- ۆيدەوعا تۇسىرۋگە بولا ما
استانا. KAZINFORM - الەۋمەتتىك جەلىلەردە كەيبىر تاۋارلاردىڭ ساپاسى مەن ساقتالۋ مەرزىمىنە قاتىستى داۋلى ۆيدەولار تاراپ جاتادى. وسى ورايدا تۇتىنۋشىلار نەمەسە قوعام بەلسەندىلەرى تاۋارلاردى فوتو-ۆيدەوعا ءتۇسىرىپ، تاراتۋعا قۇقىلى ما؟

بۇل ساۋالعا استانا قالاسىنىڭ ساۋدا جانە تۇتىنۋشى قۇقىعىن قورعاۋ دەپارتامەنتىنىڭ باسشىسى نۇرعالي ەگەمبەرديەۆ جاۋاپ بەردى.
«ساۋدا مينيسترلىگى تۇتىنۋشىلاردىڭ مۇددەسىن قورعاۋ جانە قامتاماسىز ەتۋ ماقساتىندا «ساپالى ءونىم» قوعامدىق تۇجىرىمداماسىن ىسكە قوستى. جوبا ىشكى نارىقتاعى ازىق-تۇلىك قاۋىپسىزدىگىن قامتاماسىز ەتۋ بويىنشا ۇيلەستىرۋدى كوزدەيدى. نەگىزگى باعىتى - نورماتيۆتەردىڭ بۇزىلۋىن، تۇتىنۋشىلاردىڭ قۇقىعىن جانە باسەكەلەستىكتى جوسىقسىز بۇزاتىن ارەكەتتەردى انىقتاۋ. ول ءۇشىن كەرەكتى زاڭنامالىق قۇرالدار مەن بازالىق جيىنتىقتار بار»، - دەدى نۇرعالي ەگەمبەرديەۆ استانا قالالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.
دەپارتامەنت باسشىسىنىڭ ايتۋىنشا، قولدانىستاعى تۇتىنۋشى قۇقىعىن قورعاۋ زاڭناماسىندا قوعامدىق بىرلەستىكتەرگە مىناداي مۇمكىندىكتەر بەرەدى:
- تاۋاردىڭ تۇتىنۋشىلىق قاسيەتتەرىن زەرتتەۋ؛
- تاۋاردىڭ ساپاسى مەن قاۋىپسىزدىگىنە ساراپتاما جۇرگىزۋگە باستاماشىلىق جاساۋ؛
- ءونىمنىڭ ساپاسى تۋرالى قوعامدىق پىكىردى انىقتاۋ ءۇشىن حالىققا ساۋالناما جۇرگىزۋ؛
- تاۋاردىڭ ساپاسىن باعالاۋ ماقساتىندا مەملەكەتتىك ورگاندارعا جۇگىنۋ؛
- تۇتىنۋشىلاردىڭ مۇددەسى ءۇشىن سوتقا تالاپ قويۋ؛
- ءونىمنىڭ ساپاسى مەن قاۋىپسىزدىگىن زەرتتەۋ ناتيجەسى تۋرالى اقپاراتتى تاراتۋ.
«قوعام بەلسەندىلەرى تاۋاردى ساتۋ ورىندارىنا بارعان كەزدە جاسالاتىن بارلىق ارەكەتتەردى فوتو-اۋديو جانە بەينەتىركەۋدى قولدانۋعا قۇقىلى. بۇگىنگى تاڭدا ىشكى نارىقتا ازىق-تۇلىك قاۋىپسىزدىگىن قامتاماسىز ەتۋ مەملەكەت باسشىسى قويعان باستى مىندەت»، - دەيدى ول.
اۆتور
داۋلەت ىزتىلەۋ