تۇتقىنداعى وڭتۇستىك كورەيا پرەزيدەنتىنە ايىپ تاعىلدى
استانا. KAZINFORM - وڭتۇستىك كورەيا پرەزيدەنتتىگىنەن ۋاقىتشا شەتتەتىلگەن يۋن سوك ەلعا تەرگەۋ ورىندارى بۇلىك باستاماق بولعان دەگەن ايىپ تاقتى، بىلتىر ونىڭ ەلدە اسكەري رەجيم ەنگىزۋ تۋرالى شەشىمىنىڭ كۇشىن پارلامەنت جويعان ەدى. بۇل تۋرالى Yonhap اگەنتتىگى حابارلادى.

وسىلايشا يۋن سوك ەل ەل تاريحىندا قىزمەتتە وتىرعاندا تۇتقىنعا الىنىپ، رەسمي تۇردە قىلمىستىق ايىپ تاعىلعان العاشقى پرەزيدەنتكە اينالدى. يۋن تۇتقىندالماي تۇرىپ پارلامەنت وعان يمپيچمەنت جاريالاپ، پرەزيدەنت وكىلەتىن اتقارۋدان شەتتەتىلگەن. الايدا ونىڭ وكىلەتىن قايتا قالپىنا كەلتىرۋگە كونستيتۋتسيالىق سوتتىڭ قۇزىرەتى جەتەدى.
يۋن سوك ەل 15-قاڭتاردا ۇستالدى، ال 19-قاڭتار، جەكسەنبى كۇنى سەۋلدىڭ وكرۋگتىك سوتى ونى قاماۋعا الۋعا سانكسيا بەردى. Yonhap اگەنتتىگىنىڭ حابارلاۋىنشا، ونى سوتقا دەيىنگى قاماۋ مەرزىمى دۇيسەنبى كۇنى اياقتالعانعا دەيىن وعان نە رەسمي ايىپ تاعىلۋى، بولماسا ونى بوساتۋ كەرەك بولاتىن. بيلىكتەن قۋىلعان پرەزيدەنتتىڭ قورعاۋشىلارى پروكۋرورلاردىڭ وعان ايىپ تاعۋ تۋرالى شەشىمىن سىناپ، مۇنى «ەڭ ناشار تاڭداۋ» دەپ اتادى. ال وپپوزيتسيا ول شەشىمدى قۇپتادى.
2024-جىلعى 3-جەلتوقساندا يۋن پارلامەنتتىك وپپوزيتسيامەن ۇزاققا سوزىلعان تاجىكەدەن كەيىن وڭتۇستىك كورەيا اۋماعىندا اسكەري رەجيم ءتارتىبى ەنگىزىلگەنىن جاريالادى. وعان سايكەس، ەلدە ساياسي پارتيالارعا، نارازىلىق اكسيالارىنا، ەرەۋىلدەرگە تىيىم سالىندى، پرەزيدەنت جارلىعى پارلامەنت جۇمىسىنا توقتاۋ سالىپ، تسەنزۋرا مەن دالا سوتتارى ەنگىزىلدى.
يۋن پرەزيدەنت جارلىعىنىڭ كۇشىن جويۋعا جول بەرمەۋ ءۇشىن ءبىر مەزگىلدە اسكەرگە پارلامەنت مۇشەلەرىن تۇتقىنداۋعا بۇيرىق بەرگەن دەگەن كۇدىككە ءىلىندى. اسكەري ادامدار پارلامەنتتى باسىپ الۋعا ارەكەت جاساپ تۇرعان كەزدە دەپۋتاتتار ەلدە اسكەري جاعداي ەنگىزۋ تۋرالى جارلىقتىڭ كۇشىن جويۋدى قولداپ داۋىس بەرىپ ۇلگەردى. پارلامەنت پرەزيدەنت جارلىعىنىڭ كۇشىن جوياتىن شەشىم قابىلداعاننان كەيىن اسكەر كازارماعا ورالدى. وسىدان سوڭ دەپۋتاتتار يۋن سوك ەلعا يمپيچمەنت جاريالاۋ ماسەلەسىن داۋىسقا سالىپ، ءبىر رەت قاجەت داۋىس جيناي الماي، ەكىنشى رەت تالپىنعاندا عانا قابىلدادى.
بيلىكتەن شەتتەتىلگەن پرەزيدەنت 15-قاڭتاردا ۇستالدى. ونىڭ جاقتاستارى جاپپاي نارازىلىق ءبىلدىردى.