تۇسىك جانە ۋاقىتىنان بۇرىن بوسانۋدىڭ سەبەبى نەدە
الماتى. KAZINFORM - وزدىگىنەن تۇسىك تاستاۋ - تابيعي قۇبىلىس، مەديتسينالىق نەمەسە حيرۋرگيالىق تۇسىككە جاتپايدى. بۇل تۋرالى Kazinform اگەنتتىگىنىڭ تىلشىسىنە اكۋشەر-گينەكولوگ گۇلجاحان جۇمادۋللايەۆا ايتتى.
الماتى وبلىستىق اكۋشەرلىك گينەكولوگيا جانە پەريناتولوگيا ورتالىعىنىڭ ديرەكتورى گۇلجاحان جۇمادۋللايەۆانىڭ ايتۋىنشا، وزدىگىنەن تۇسىك تاستاۋ - جۇكتىلىكتىڭ 20-اپتاسىنا دەيىن ۇرىقتى وزدىگىنەن جوعالتۋ.
ال، جۇكتىلىكتىڭ 20-اپتاسىنان كەيىن بۇل مەزگىلىنەن بۇرىن بوسانۋعا جاتادى.
- ءبىرىنشى تريمەستردە بولاتىن بارلىق تۇسىكتىڭ جارتىسىنا جۋىعى اتا-انانىڭ ۇرىعىندا نەمەسە جۇمىرتقاسىندا تۇقىم قۋالايتىن نەمەسە وزدىگىنەن بولۋى مۇمكىن حروموسومالىق اۋىتقۋلاردان تۋىندايدى. حروموسومالار - تۇقىم قۋالاۋشىلىقتىڭ نەگىزگى بىرلىكتەرى. ول گەندەردى الىپ جۇرەتىن دەنە جاسۋشالارىنىڭ ىشىندەگى كىشكەنتاي قۇرىلىمدار. گەندەر ادامنىڭ بارلىق فيزيكالىق قاسيەتىن انىقتايدى، مىسالى، جىنىس، شاش جانە كوزدىڭ ءتۇسى جانە قان توبى. حروموسومالىق ماسەلەلەردىڭ كەزدەيسوق پايدا بولادى جانە اتا-انانىڭ دەنساۋلىعىنا بايلانىستى ەمەس. سونداي- اق ايەلدىڭ وزىنە بايلانىستى، ەگەر اياعى اۋىر كەلىنشەك دەنساۋلىعىنا نەمقۇرايلى قارايتىن بولسا، دۇرىس تاماقتانباسا جۇكتىلىكتىڭ العاشقى اپتالارىندا تۇسىك تاستاۋى مۇمكىن، - دەپ ءتۇسىندىردى دارىگەر.
جاتىر موينىنىڭ جەتكىلىكسىزدىگى - جۇكتىلىكتىڭ مەرزىمىنەن بۇرىن اياقتالۋىنا اكەلەدى.
- مەرزىمىنەن بۇرىن بوسانۋدىڭ 60-70 پايىزى جاتىر موينىنىڭ جەتكىلىكسىزدىگىنەن بولادى. بۇل ەڭ الدىمەن قىز بالانىڭ ءوسىپ جەتىلۋىنە بايلانىستى. ەگەر جاس ءوسىپىرىم كەزىندە باكتەريالىق نەمەسە ۆيرۋستىق اۋرۋلارمەن اۋىرسا، ول ايەلدىڭ گورمونالدىق جۇيەسى دۇرىس جەتىلمەيدى. مۇنداي كەزدە جاتىر موينى اشىلىپ كەتىپ، ۋاقىتىنان بۇرىن سۋى كەتەدى، تولعاق باستالادى دا بالا مەرزىمىنەن بۇرىن تۋادى، - دەيدى گۇلجاحان جۇمادۋللايەۆا.
مامان جۇكتىلىكتى جوسپارلاۋ كەرەكتىگىن تىلگە تيەك ەتتى.
ەسكە سالايىق، بۇعان دەيىن الماتى دارىگەرلەرى باۋىرى زاقىمدانعان جۇكتى ايەلدى امان الىپ قالعان بولاتىن.
