تەست تاپسىرىپ، تالانتىڭدى انىقتاۋعا بولادى - مامان كەڭەسى

استانا. KAZINFORM - ارنايى تەست تاپسىرۋ ارقىلى ءوز تالانتىڭىزدى انىقتاۋعا بولادى. ناتيجەسىندە قانداي كاسىپپەن اينالىساتىنىڭىزدى انىقتاپ، ءوز باعىتىڭىزدى بىلە الاسىز. بۇل تۋرالى «بۇگىن LIVE» باعدارلاماسىنا قوناق بولعان بەرىك اسەمبايەۆ ايتىپ بەردى.

- مەنىڭ جۇمىسىم وتە وڭاي. ادامدار كليفتون ۋنيۆەرسيتەتى دايىنداعان تەستتى 60 دوللار تولەپ تاپسىرادى دا، ناتيجەسىندە 34 تالانتىن انىقتاپ، الدىما كەلەدى. ال مەن ول ادامعا ەرەكشەلىكتەرىن ايشىقتاپ بەرەمىن. بۇل تەستتە 120 سۇراق قويىلادى. ءارقايسىسىنا جاۋاپ بەرۋگە 20 سەكۋند ۋاقىت بەرىلەدى. نەگە 20 سەكۋند؟ سەبەبى ءسىز كوپ ويلانباۋىڭىز كەرەك. يدەالدى تۇرعىدان جاۋاپ بەرۋگە تىرىسپاۋ كەرەك. سول كەزدە ناقتى، شىنايى جاۋابى شىعادى. بۇل ءادىس ەۋروپا مەن ا ق ش-تا كەڭىنەن قولدانىلادى. ءبىراق مەن ەشكىمگە «سەن وسىنداي مامان بول، سەنىڭ وسىلاي ىستەگەنىڭ دۇرىس» دەپ ايتپايمىن. تەك قانا ء«سىزدىڭ وسى قابىلەتىڭىز كوبىرەك، وسىنداي دۇنيەلەرگە يكەمىڭىز بار» دەپ باعىت-باعدار بەرەمىن، - دەيدى مامان.

كوۋچتىڭ ايتۋىنشا، ءاربىر ادامعا ورتاق 34 تالانت بار. ادامدار سول تالانتتاردىڭ ناقتى قايسىسىنا بەيىم ەكەنىن انىقتاي الۋ كەرەك.

- كەز كەلگەن ادام تالانتتى. مۇمكىن، الەمدە ميلليونداعان تالانتتىڭ ءتۇرى بولار. ال كليفتون ۋنيۆەرسيتەتى بەلگىلەگەن 34 تالانت ادامداردىڭ بارىندە بار، بارىنە بىردەي تۇسىنىكتى تالانتتار. ياعني، ءسىزدىڭ قورشاعان ورتامەن قارىم- قاتىناسىڭىزعا بايلانىستى، ءسىز مۇلدە بايقاماعان كۇيدە اقىرىن داميدى. مىسالى، ءبىزدى بەلگىلى ءبىر قوندىرعى دەپ قاراستىرساق، ونىڭ 34 باتىرماسى بار. ولاردىڭ 10 ى ءتۇرلى تۇسكە بويالىپ، ايرىقشالانىپ تۇر. ياعني بۇل - تالانتتار ادامدا اۆتوماتتى تۇردە جۇرەتىن تالانتتار. ال قالعاندارى بويىمىزدا بار بولسا دا، سانالى تۇردە قوسىپ وتىرۋعا ءتيىستى تالانتتار. مەن بۇگىنگە دەيىن 200 گە جۋىق ادامعا كومەكتەستىم. 20- 30، ءتىپتى 40 جاستاعى ادامدار مەنىڭ الدىما كەلىپ، «مەن نەمەن اينالىسۋىم كەرەك؟» دەپ باعدار سۇراپ جاتادى، - دەيدى مامان.

ول بالالاردىڭ تالانتىن اشۋ ءۇشىن اتا-انالارعا دا كەڭەسىن ايتتى.

- كليفتون ۋنيۆەرسيتەتى اتا-انالارعا بالاسىنىڭ كۇشتى تۇسىن ودان ءارى كۇشەيتۋگە كەڭەس بەرەدى. ياعني ادام ءوزىنىڭ مىقتى تۇسىمەن جۇمىس ىستەۋى كەرەك. ءبارىن بىردەي جاقسارتۋعا تىرىسۋدىڭ قاجەتى جوق. سەبەبى ءوزىڭنىڭ يكەمىڭ كەلمەيتىن دۇنيەلەردى ۇيرەنۋگە كوپ ۋاقىت كەتەدى. ال ءوز قابىلەتىڭدى ارى قاراي اشۋعا جۇمىس ىستەسەڭ، جەتىستىككە تەز جەتەسىڭ، - دەيدى بەرىك اسەمبايەۆ.

ايتا كەتەيىك، بىرنەشە اي بۇرىن مەملەكەت باسشىسى وزىنە جالعان پسيحولوگتەر مەن كوۋچتار ۇستىنەن ءجيى شاعىم تۇسەتىنىن ايتقان ەدى.

ودان بولەك، ەمحانالاردا پسيحولوگتار كوپشىلىككە تەگىن كومەك كورسەتەدى.