تۋريزم جانە سپورت مينيسترلىگىنىڭ فۋتبول كلۋبتارىنداعى لەگيونەرلەردى قىسقارتۋعا شاماسى جەتپەي وتىر

Туризм және спорт министрлігінің футбол клубтарындағы легионерлерді қысқартуға шамасы жетпей отыр
Фото: kff.kz

استانا. KAZINFORM - قازاقستان فۋتبول فەدەراتسياسى 1 كومانداداعى لەگيونەرلەر سانىن 8 دەن 12 گە دەيىن ارتتىرىپ جىبەرگەن. ال ونى قايتا قىسقارتۋعا تۋريزم جانە سپورت مينيسترلىگىنىڭ شاماسى جەتپەي وتىر.

بۇگىن ءماجىلىستىڭ الەۋمەتتىك-مادەني دامۋ كوميتەتى وتكىزگەن ءىس-شارادا دەپۋتات قازىبەك يسا فۋتبول كلۋبتارىنداعى لەگيونەرلەر ماسەلەسىن كوتەردى.

«2021-جىلى 1 جىلدا فۋتبول كلۋبتارىنا 133 ميلليارد تەڭگە بولىنگەن ەكەن. ونىڭ 111 ميلليارد تەڭگەسى - وبلىستىق بيۋجەتتەردەن. وسى اقشانىڭ ءبارى لەگيونەرلەردى بايىتۋعا جۇمسالىپ جاتىر. ويتكەنى، 2021-جىلى پرەمەر-ليگادا 371 فۋتبولشىنىڭ 150 ءى لەگيونەر بولعان. قورجىنىمىزعا مەدال سالاتىن بوكس، كۇرەس جانە اۋىر اتلەتيكانىڭ ۇشەۋى قوسىلىپ جۇمساعان اقشادان فۋتبولعا كەتكەن اقشا ءۇش ەسە كوپ. ونىڭ 80 پايىزى لەگيونەرلەرگە كەتەدى. 30 جىلدا سالعانىمىز جالعىز ستاديون. ال فۋتبولعا بولىنەتىن بيۋجەتى بىزدەن 2 ەسە از وزبەكستان 10 ستاديون سالعان جانە ەۋروپالىق ستاندارتتارعا ساي»، - دەگەن ول ەلىمىزدە فۋتبولعا بولىنەتىن قارجى كولەمىنە، لەگيونەرلەر سانىنا قاتىستى شەكتەۋ ەنگىزىلگەنىمەن، ونىڭ ساقتالمايتىنىن ايتتى.

تۋريزم جانە سپورت ۆيتسە-ءمينيسترى سەرىك جاراسبايەۆتىڭ سوزىنە قاراعاندا، وتكەن جىلدىڭ سوڭىندا فۋتبول فەدەراتسياسى ءوز تاراپىنان لەگيونەرلەرگە قاتىستى ءبىرقاتار وزگەرىس ەنگىزگەن.

«بۇرىن ءبىر كوماندادا 8 لەگيونەر بولسا، قازىر ونىڭ سانىن 12 گە دەيىن ارتتىردى. ونىمەن تۋريزم جانە سپورت مينيسترلىگى كەلىسپەدى. ءبىز ءوز تاراپىمىزدان فۋتبول فەدەراتسياسىنا بۇلاي جاساماۋ كەرەكتىگىن ايتىپ، بىرنەشە حات جىبەرگەن ەدىك. بۇگىندە ولار قوعامدىق بىرلەستىك بولعاننان كەيىن وزدەرى بۇكىل وبلىستىڭ كلۋبتارىن جيناپ، داۋىسقا سالىپ، بەكىتىپ الدى. ءبىراق قازىرگى ۋاقىتتا ءبىز پرەزيدەنت اكىمشىلىگىمەن جانە ۇكىمەتپەن بىرلەسىپ، بۇل ماسەلەنى قاراستىرىپ جاتىرمىز»، - دەدى ۆيتسە-مينيستر.

ايتا كەتەيىك، ءماجىلىستىڭ الەۋمەتتىك-مادەني دامۋ كوميتەتىندە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە دەنە شىنىقتىرۋ جانە سپورت ماسەلەلەرى بويىنشا وزگەرىستەر مەن تولىقتىرۋلار ەنگىزۋ، سونداي-اق نورمالاردى شەكتەن تىس (شەكتەن تىس) زاڭنامالىق رەتتەۋدى الىپ تاستاۋ تۋرالى» زاڭ جوباسى تالقىلاندى.

سوڭعى جاڭالىقتار